| e-texts navigator |
| Wylie |
416b1 བོ་སྨད། །འཇིག་རྟེན་འདི་ནི་ཤིན་ཏུ་གཡོས། །གང་ཞིག་རྒྱུད་འདི་ཉན་པ་དང་། །ཤེས་ནས་འཆད་པར་བྱེད་པ་དང་། །དུས་རྣམས་ཀུན་ཏུ་འདོན་བྱེད་ན། །ཚེ་འདིར་འཇིགས་པ་ཀུན་བསལ་ཏེ། །ཤི
416b2 ནས་མཐོ་རིས་མྱུར་དུ་འཐོབ། གལ་ཏེ་གཞན་དུ་རྒྱུད་མཆོག་འདི། །བསྟན་ནས་བཤད་དམ་གསལ་ཕྱེ་ན། །དེ་ནི་སྡུག་བསྔལ་མང་མྱོང་ནས། །ཤི་ནས་མྱུར་དུ་དམྱལ་བར་འགྲོ་།རང་གིས
416b3 ཤིན་ཏུ་བཅང་བྱས་ཤིང་། །དངོས་གྲུབ་ཉིད་བཞིན་མངོན་བྱས་ན། །སྡུག་བསྔལ་མཐའ་དག་ངེས་ཟད་ནས། །མྱུར་དུ་བླ་མེད་ཐོབ་པར་འགྱུར། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི
416b4 རྒྱལ་པོ་ལས། སྦྱིན་སྲེག་གི་རིམ་པར་ཕྱེ་བའི་ལེའུ་སྟེ་བཞི་པའོ།། །།དཔལ་ལྡན་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས་ཀྱི་དངོས་གྲུབ་བརྟག་པ་ཞེས་བྱ་བ་རྫོགས
416b5 སོ། ། །།པཎྜི་ཏ་ཆེན་པོ་ཨ་མོ་གྷའི་ཞབས་ནུས་བ་ཅན་དང་། བོད་ཀྱི་ལོཙྪ་བ་མར་པ་བནྡྷེ་ཆོས་ཀྱི་དབང་ཕྱུག་གྲགས་པས་བསྒྱུར་ཅིང་ཞུས་པའོ། །སླད་ཀྱིས་གྲུབ་ཐོབ་ཆེན་པོ་ཀརྞ་ཤྲཱིའི་ཞལ་སྔ
416b6 ནས་ཉན་ཏེ་ཐར་པ་ལོཙྪ་ཉི་མ་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། རྒྱ་གར་སྐད་དུ། ཤྲཱི་ཀྲིཥྞ་ཡ་མཱ་རི་ཏནྟྲ་རཱ་ཛ་ཏྲི་ཀལྤ་ནཱ་མ། བོད་སྐད་དུ། དཔལ་གཤིན་རྗེའི་གཤེད་ནག་པོའི་རྒྱུད་ཀྱི
416b7 རྒྱལ་པོ་རྟོག་བ་གསུམ་པ་ཞེས་བྱ་བ། བཅོམ་ལྡན་འདས་དཔལ་གཤིན་རྗེ་གཤེད་ལ་ཕྱག་འཚལ་ལོ། །དོན་དམ་ཆོས་སྐུ་ཞི་བ་ཉིད། །གང་འདིར་ཁམས་གསུམ་རྣམ་རྒྱལ་ཏེ། །གཤིན་རྗེ་དགྲ་ཞེས་གྲགས་པ་ཡི། །འཁོར་ལོ་བསྐོར་བའི
iiif viewer powered by OpenSeadragon
