| e-texts navigator |
| Wylie |
191b1 ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷས་བསྟན་ན་གནས་པའི་སྐྱེ་བོའི་ཚོགས་ལམ་པོ་ཆེ་དང་། ཚོང་འདུས་དང་། སུམ་མདོ་དང་། བཞི་མདོ
191b2 རྣམས་སུ་གླེང་བ་ཁ་ཅིག་གི་མཆིད་ནས་ནི་འདི་བུ་མོ་ཁོ་ན་ལེགས་ཏེ། སྔོན་གྱི་ལས་ཀྱི་རྣམ་པར་སྨིན་པས་གཟུགས་བཟང་ཞིང་ཁ་དོག་ཕུན་སུམ་ཚོགས་པར་གྱུར་ཏོ་ཞེས་མཆིའོ། །གཞན
191b3 དག་གི་མཆིད་ནས་ནི་འདི་བུ་མོ་མ་ལགས་ཀྱི་འོ་ན་ཅི་ཞེ་ན། ལས་སྣ་ཚོགས་པས་སྤྲུལ་པའི་སྒྱུ་འཕྲུལ་ལགས་སོ་ཞེས་མཆི་ལགས་པས། དེ་བས་ན་བུ་མོའི་མིང་སྒྱུ་འཕྲུལ་ཞེས་བགྱི་བར
191b4 གདགས་སོ་ཞེས་བཏགས་སོ། །བུ་མོ་སྒྱུ་འཕྲུལ་མ་མ་བརྒྱད་ལ་རྗེས་སུ་གཏད་དེ་ཞེས་བྱ་བ་དེས་ཆེན་མོར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །དེ་ལ་མཚན་མཁན་རྣམས་ཀྱིས
191b5 ལུང་བསྟན་པ། མཚན་ཕུན་སུམ་ཚོགས་པ་དུ་མ་དང་ལྡན་པ་ཞིག་བཙའ་བར་འགྱུར་ཞིང་སྟོབས་ཀྱིས་འཁོར་ལོས་བསྒྱུར་བར་འགྱུར་རོ་ཞེས་བསྟན་ཏོ། །ཡང་དེ་རྩེ་བར་བྱེད། དགའ
191b6 བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བཙས་སོ། །དེ་བཙས་པ་ན་གྲོང
191b7 ཁྱེར་དེ་དག་ཐམས་ཅད་སྣང་བ་རྒྱ་ཆེན་པོས་སྣང་བར་བྱས་ཏེ། སྒྱུ་འཕྲུལ་ལ་ཇི་ལྟ་བ་བཞིན་དུ་དེའི་གཟུགས་བཟང་པ་རྣམ་པ་ཐམས་ཅད་དུ་དཔྱད་པར་མི་ནུས་སོ། །དེའི་བཙས་པའི
iiif viewer powered by OpenSeadragon
