| e-texts navigator |
| Wylie |
260b1 སེམས་ཅན་རྣམས་ལ་བདེ་མང་མཛད་སླད་དུ། །ཐབས་ཀྱིས་སེངྒེའི་རྣམ་པར་རོལ་པ་མཛད། །སེངྒེ་རྣམ་པར་རྩེ་བ་ལ་དམིགས་པའི་གླེང་གཞིའི་ལེའུ་ཞེས་བྱ་སྟེ། ཉི་ཤུ་གཅིག་པའོ།། །།སྤྲིན
260b2 ཆེན་སྙིང་པོས་གསོལ་པ། མཚམས་སྦྱར་བ་ལ་ཚོགས་པའི་རྣམ་པ་འཇིག་རྟེན་དང་མཐུན་པར་འཇུག་པར་བྱ་བ་ལ་འཇུག་པའི་མདོ་ཞེས་བགྱི་བའི་ཆོས་ཀྱི་སྒོ་བཅུ་བཅོམ་ལྡན་འདས་ཀྱིས་མངོན
260b3 པར་མཚམས་སྦྱར་བར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མཚམས་རྟག་པར་བྱ་བའི་རྒྱལ་པོ་ལ་འཇུག་པ་ཞེས་བྱ་བའི་ཆོས་ཀྱི་སྒོ་དང་། ཐབས་ཀྱིས་ཤིན་ཏུ་རབ
260b4 ཏུ་ཞི་བར་བྱ་བ་ལ་འཇུག་པ་ཞེས་བྱ་བའི་ཆོས་ཀྱི་སྒོ་དང་། དད་པའི་སྦྲང་རྩི་འཇམ་པ་ཡང་དག་པར་རབ་ཏུ་གཟུང་བ་འཇུག་པ་ཞེས་བྱ་བའི་ཆོས་ཀྱི་སྒོ་དང་། སེངྒེ་རྣམ་པར་རྩེ་བ་མངོན་པར་འཕགས་པ
260b5 ལ་འཇུག་པ་ཞེས་བྱ་བའི་ཆོས་ཀྱི་སྒོ་དང་། རིམ་པ་སྟོན་པའི་དུས་དང་ཚོད་ལ་འཇུག་པ་ཞེས་བྱ་བའི་ཆོས་ཀྱི་སྒོ་དང་། རིམ་པ་དང་། རིམ་པ་མེད་པ་དང་། ཡུལ་དང་། ཡུལ་མ་ཡིན་པར་འཇུག་པ་ལ
260b6 མཁས་པའི་རྒྱལ་པོ་ཞེས་བྱ་བའི་ཆོས་ཀྱི་སྒོ་དང་། གདུལ་དཀའ་བ་དང་། དམུ་རྒོད་ཐབས་ཀྱིས་གཟུད་པ་ཞེས་བྱ་བའི་ཆོས་ཀྱི་སྒོ་དང་། མདའ་ལྟར་མགྱོགས་པར་ལུས་ལ་དཔལ་འཇུག་པ་ཞེས་བྱ
260b7 བའི་ཆོས་ཀྱི་སྒོ་དང་། མཆོད་པ་འདོད་པ་ཐམས་ཅད་འཐོབ་པ་ལ་འཇུག་པ་ཞེས་བྱ་བའི་ཆོས་ཀྱི་སྒོ་དང་། གནས་འོག་མའི་ལས་བྱེད་པའི་ཐབས་ལ་འཇུག་པ་ཞེས་བྱ་བའི་ཆོས་ཀྱི་སྒོ་སྟེ། བཅུ་པོ་དེ
iiif viewer powered by OpenSeadragon
