| e-texts navigator |
| Wylie |
443a1 རྫོགས་པར་འཚང་རྒྱ་བར་འགྱུར་རོ། །ཡང་བཅོམ་ལྡན་འདས་ཀྱིས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བསྟན་པ་ན། འཁོར
443a2 དེ་ན་སེམས་ཅན་ལྔ་ཁྲི་པོ་གང་དག་གིས་སྔོན་ཆོས་བཞི་པོ་འདི་དག་གོམས་པར་བྱས་པ་དེ་དག་གིས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་དང་ལྡན་ནོ། །དེ་ན་སྲོག
443a3 ཆགས་བརྒྱད་ཁྲི་བཞི་སྟོང་དག་གིས་ནི། དཔའ་བར་འགྲོ་བའི་ཏིང་ངེ་འཛིན་རབ་ཏུ་ཐོབ་པར་གྱུར་ཏོ། །དེ་ན་སྲོག་ཆགས་ཁྲག་ཁྲིག་སྟོང་ཕྲག་དགུ་བཅུ་རྩ་དགུ་དག
443a4 གིས་ནི|་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་རབ་ཏུ་ཐོབ་པར་གྱུར་ཏོ། །དེ་ན་སེམས་ཅན་སྔོན་བྱང་ཆུབ་ཏུ་སེམས་མ་བསྐྱེད་པ་ཁྲག་ཁྲིག་འབུམ
443a5 ཕྲག་དཔག་ཏུ་མེད་པ་དག་གིས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར
443a6 མི་ལྡོག་པར་གྱུར་ཏོ། །འདུས་པ་ཆེན་པོ་ཐེག་པ་ཆེན་པོའི་མདོ་བཅོ་ལྔ་པ་རིའི་སྙིང་པོའི་ལེའུ་ལས། བསམ་གཏན་མཚོན་པ་སྟེ་གཉིས་པ་རྫོགས་སོ།། །།དེ་ནས
443a7 དེ་ཉིད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་དཔལ་ལྷ་མོ་ཆེན་མོ་ལ་འདི་སྐད་ཅེས་སྨྲས་སོ། །དཔལ་ཆོག་ཤེས། གླིང་ཆེན་པོ་བཞི་པ་འདི་བྱང
iiif viewer powered by OpenSeadragon
