| e-texts navigator |
| Wylie |
166a1 ཆགས་དང་ཡང་བྲལ་མ་གྱུར། །འདོད་ཆགས་ལས་ཀྱང་རྒྱལ་མི་བྱེད། །དེ་ནི་བྱང་ཆུབ་མི་དཀོན་ནོ། །གང་དག་བསྐལ་པར་མི་སྐྱོ་ཞིང་། །མཐས་ཀྱང་འཇིག
166a2 པར་མི་འགྱུར་ལ། །འཁོར་བས་སྐྲག་པར་མི་འགྱུར་བ། །དེས་ནི་བྱང་ཆུབ་རྙེད་མི་དཀའ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་ནས། །འཇམ་དཔལ
166a3 གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། གང་ཆོས་ཀྱི་རྣམ་གྲངས་འདི་ལ་མོས་པར་བྱེད། ཐེ་ཚོམ་དུ་མི་བྱེད། ནེམ་ནུར་དུ་མི་བྱེད། ལུང་སྦྱིན་པར་བྱེད།
166a4 འཛིན་པར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་ལའང་རྒྱ་ཆེར་ཡང་དག་པར་སྟོན་པ་དེའི་ཕན་ཡོན་བསྔགས་པ་ཉི་ཤུ་ཡོད་པར་རིག་པར་བྱའོ། །ཉི་ཤུ་གང་ཞེ་ན།
166a5 ལྷས་བསྲུངས་པར་འགྱུར། ཀླུས་བསྲུངས་པར་འགྱུར། གནོད་སྦྱིན་གྱིས་བསྲུངས་པར་འགྱུར། སེམས་གཡེངས་པར་མི་འགྱུར། ཚེ་བརྗེས་ནས་ཀྱང་ཚེ་རབས་དྲན་པར་འགྱུར།
166a6 མངོན་པར་ཤེས་པ་ལྔ་ཐོབ་པར་འགྱུར། ཚེ་བརྗེས་མ་ཐག་ཏུ་བྱང་ཆུབ་སེམས་དཔའ་བྱམས་པ་མཐོང་བར་འགྱུར། དེ་སྟེ་ཆོས་ཀྱི་རྣམ་གྲངས་འདི་སེམས་མི་གཡེང་བར་ཡིད
166a7 ལ་བྱེད་ཅིང་གཉིད་ཀྱི་སྙོམ་པ་སེལ་ན། དེའི་རྨི་ལམ་དུ་སངས་རྒྱས་མཐོང་བར་འགྱུར་ཏེ། བྱང་ཆུབ་སེམས་དཔའ་མཐོང་བའང་རེ་བར་བྱའོ། །དེ་ཆོས་ཀྱི་རྣམ་གྲངས་འདི་ལ་མོས་ན་རྗེས
iiif viewer powered by OpenSeadragon
