| e-texts navigator |
| Wylie |
7a1 ཀྱིས་ཇི་ལྟ་བ་དེ་བཞིན་དུ་འོད་དང་། སྐུས་ཀྱང་དེ་བཞིན་ནོ། །འཇམ་དཔལ། དེ་ལྟར་ཤེས་རབ་ཆེན་པོ་ལས་བྱུང་བ། སྙིང་རྗེ་ཆེན་པོས་ཡོངས་སུ་བསྒོས་པ། ཐབས
7a2 མཁས་པ་དང་། སྨོན་ལམ་གྱིས་བསྐྱེད་པ། ཚུལ་ཁྲིམས་ཡོངས་སུ་དག་པ་བསྒོམས་པའི་ཁྱད་པར་ལས་ཡང་དག་པར་སྐྱེས་པ། བསོད་ནམས་ཆེན་པོ་འདི་དག་ནི་ཉན་ཐོས་དང་།
7a3 རང་སངས་རྒྱས་ཐམས་ཅད་ཀྱིས་བསམ་གྱིས་མི་ཁྱབ་བོ། །འཇམ་དཔལ། རྒྱུ་གཉིས་ཀྱིས་དེ་བཞིན་གཤེགས་པའི་གཟུགས་ཀྱི་སྐུ་ཁྱད་པར་དུ་འཕགས་པ་ཡིན་ནོ། །རྒྱུ་གཉིས
7a4 གང་ཞེ་ན། སྨོན་ལམ་གྱི་དབང་དང་། འདུལ་བའི་སེམས་ཅན་རྣམས་ཀྱི་དགེ་བ་ཡོངས་སུ་སྨིན་པའི་དབང་སྟེ། འཇམ་དཔལ། རྒྱུ་དེ་གཉིས་ཀྱིས་ན་དེ་བཞིན་གཤེགས
7a5 པའི་གཟུགས་ཀྱི་སྐུ་ཁྱད་པར་དུ་འཕགས་པ་ཡིན་ནོ། །འཇམ་དཔལ། དེ་བཞིན་གཤེགས་པའི་གཟུགས་ཀྱི་སྐུ་ཁྱད་པར་དུ་འཕགས་པ་ཇི་ལྟ་བ་དེ་བཞིན་དུ་ཆོས་བསྟན་པའང
7a6 ཁྱད་པར་དུ་འཕགས་པ་ཡིན་ནོ། །འཇམ་དཔལ། དེ་བཞིན་གཤེགས་པའི་ཆོས་བསྟན་པ་ཇི་ལྟ་བ་དེ་བཞིན་དུ་འོད་ཀྱང་ཁྱད་པར་དུ་འཕགས་པ་ཡིན་ནོ། །འཇམ་དཔལ། ཇི
7a7 ལྟར་དེ་བཞིན་གཤེགས་པའི་འོད་ཁྱད་པར་དུ་འཕགས་པ་དེ་བཞིན་དུ་སྤྱོད་པའང་ཁྱད་པར་དུ་འཕགས་པ་ཡིན་ནོ། །འཇམ་དཔལ། དེ་བཞིན་གཤེགས་པ་ནི་སྐུས་འཇིག
iiif viewer powered by OpenSeadragon
