| e-texts navigator |
| Wylie |
63b1 རྩོམ་པ་དང་། རྟུལ་བ་དང་། སོ་སོར་རྟོག་པ་དང་། སྒྲུབ་པ་སྟེ། རིགས་ཀྱི་བུ། བརྩོན་འགྲུས་བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་དགེ་བའི་ཆོས་ཐམས་ཅད་སྡུད་པར
63b2 འགྱུར་བའོ། །དེ་ལ་རྩོམ་པ་ནི། གང་། རྟུལ་བ་ནི། གང་། སོ་སོར་རྟོག་པ་ནི། གང་། སྒྲུབ་པ་ནི། གང་ཞེ་ན། རིགས་ཀྱི་བུ། རྩོམ་པ་ཞེས་བྱ་བ་ནི། བྱང་ཆུབ་ཏུ་སེམས་བསྐྱེད་པའོ། །རྟུལ
63b3 བ་ཞེས་བྱ་བ་ནི། དགེ་བའི་རྩ་བ་ཐམས་ཅད་ཡང་དག་པར་སྒྲུབ་པའོ། །སོ་སོར་རྟོག་པ་ཞེས་བྱ་བ་ནི། སེམས་ཅན་ཐམས་ཅད་ལ་ཕན་པའི་དངོས་པོའོ། །སྒྲུབ་པ་ཞེས་བྱ་བ་ནི། དེ་བྱེད
63b4 པའི་ཆོས་ལ་བཟོད་པའོ། །གཞན་ཡང་རྩོམ་པ་ནི། ཐོས་པ་ཡོངས་སུ་ཚོལ་བའོ། །རྟུལ་བ་ནི། ཐོས་པ་སྟོན་པའོ། །སོ་སོར་རྟོག་པ་ནི། ཚུལ་བཞིན་ཡིད་ལ་བྱེད་པའོ། །སྒྲུབ་པ་ནི།
63b5 འཕགས་པའི་ཡང་དག་པའི་ལྟ་བའོ། །གཞན་ཡང་རྩོམ་པ་ནི། སེར་སྣའི་སེམས་ཚར་གཅོད་པའོ། །རྟུལ་བ་ནི། བདོག་པ་ཐམས་ཅད་ཡོངས་སུ་གཏོང་བའོ། །སོ་སོར་རྟོག་པ་ནི། སེམས
63b6 ཅན་ཐམས་ཅད་དང་ཐུན་མོང་དུ་བྱང་ཆུབ་ཏུ་ཡོངས་སུ་བསྔོ་བའོ། །སྒྲུབ་པ་ནི། རྣམ་པར་སྨིན་པ་ལ་མི་རེ་བའོ། །གཞན་ཡང་རྩོམ་པ་ནི། གཏོང་བ་ཆེན་པོ་སྒྲོག་པའོ། །རྟུལ་བ་ནི། གང
63b7 སློང་བ་པོ་རྣམས་ལ་དགེ་བའི་བཤེས་གཉེན་དུ་འདུ་ཤེས་པའོ། །སོ་སོར་རྟོག་པ་ནི། ཀྱེ་མའོ་ལོངས་སྤྱོད་འདི་དག་མི་རྟག་པའོ་སྙམ་པའོ། །སྒྲུབ་པ་ནི། བྱིན་ནས་འགྱོད་པ་མེད་པའོ། །
iiif viewer powered by OpenSeadragon
