| e-texts navigator |
| Wylie |
69b1 བརྟན་པ་དང་། ཐེར་ཟུག་དང་། ཞི་བ་ལགས་ཏེ། བསམ་གྱིས་མི་ཁྱབ་བོ། ཞེས་གཞན་དག་ལའང་བསྟན་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་བ། འོད་སྲུང་ཆེན་པོ་དང་རུས
69b2 གཅིག་པ། ལེགས་སོ། །ལེགས་སོ། །དེ་བཞིན་གཤེགས་པ་ནི། རྡོ་རྗེ་ལྟར་མི་ཤིགས་པའི་སྐུ་འཛིན་པ་ལ་ཞུགས་པ་ཡིན་ཏེ། དེ་ལྟར་ཡང་དག་པའི་ལྟ་བ་དང་། བསླབ་པ་ལ་གུས་པར་བྱའོ། །
69b3 དེ་བཞིན་གཤེགས་པ་རྡོ་རྗེ་ལྟར་མི་ཤིགས་པའི་སྐུ་དང་ལྡན་པར་ཡང་དག་པར་ལྟ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི། ཇི་ལྟར་མེ་ལོང་གི་ངོས་ལ་རང་བཞིན་གྱི་གཟུགས
69b4 བརྙན་སྣང་བ་དེ་བཞིན་དུ་དོན་དམ་པའི་སྐུ་གསལ་བར་མཐོང་ངོ་། རྡོ་རྗེ་ལྟར་མི་ཤིགས་པའི་སྐུའི་ཕུང་པོའི་ལེའུ་ཞེས་བྱ་སྟེ། གཉིས་པའོ།། །།རིགས་ཀྱི་བུ། གཞན་ཡང་ད་ནི།
69b5 མདོ་འདིའི་མིང་དང་། ཡོན་ཏན་དང་། ཚུལ་ཡང་དག་པར་གཟུང་བར་གྱིས་ཤིག་།མདོ་འདིའི་མདོ་ཐོས་ན། སེམས་ཅན་རྣམས་འགྲོ་བ་བཞིར་འགྲོ་བར་འགྱུར་པ་དེ་ནི། མི་སྲིད་དེ། མདོ་ཆེན
69b6 པོ་འདིའི་ཡོན་ཏན་དང་ཚུལ་སངས་རྒྱས་མང་པོས་བསྟན་པ་དེ་ལྟ་བུ་ངས་བསྟན་པར་བྱའོ། །གསོལ་བ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ལྟར་མདོ་འདིའི་མིང་ཡང་དག་པར
69b7 འཛིན་པ་ལགས། ཇི་ལྟར་མདོ་འདིའི་མིང་འཛིན་པའི་གྲངས་སུ་གཏོགས་པ་ལགས། བཀའ་སྩལ་བ། མདོ་འདི་ནི། ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་སྟེ། ཚངས་པར་སྤྱོད་པ། ཐོག་མར
iiif viewer powered by OpenSeadragon
