| e-texts navigator |
| Wylie |
112b1 བྱེད་མི་སྲིད་པ་དང་། སྲིན་བུའི་རིགས་བརྒྱད་ཅུ་དང་། ཉེས་དམིགས་ཆེན་པོའི་ལུས་འཛིན་པ་མ་ཡིན་པ་དང་། འདོད་པའི་བསམ་པ་རྣམ་པར་སྤངས་པ་དེའི་ལུས་ལ་རྨི་ལམ་དུ་བྱུང་ཡང
112b2 ཁུ་ཆུ་འབྱུང་མི་སྲིད་པ་དང་། འཆི་བའི་འཇིགས་པ་རྣམས་འོངས་པ་མཐོང་ན་འཇིགས་མི་སྲིད་པའོ། །གང་ཟག་དེ་ལྟ་བུ་ནི། ཕྱིར་མི་འོང་བ་ཞེས་བྱ་སྟེ། གང་ཟག་གསུམ་པའོ། །དེའང་ངེས
112b3 པར་ཕྱིར་མི་འོང་བས་ན། ཕྱིར་མི་འོང་བ་ཞེས་བྱ་སྟེ། གང་ཟག་དེ་ལ་ནི། ཕྱིར་མི་འོང་བ་ཐོབ་པ་ཞེས་ཀྱང་མི་བྱའོ། །སྔར་བསྟན་པའི་ཡོན་ཏན་རྣམས་ཀྱང་ཡོད་ལ་འདིར་སྐྱེས་ནའང་སྔར
112b4 བསྟན་པའི་ཉེས་པ་རྣམས་ཀྱིས་མི་གོས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། འོང་བ་དང་འགྲོ་བའི་ཚུལ་གྱིས་རྒྱུ་བར་བྱེད་ཀྱང་ཕྱིར་མི་འོང་བའི་གྲངས་སུ་གཏོགས
112b5 ཏེ|་སེམས་བསྐྱེད་མ་ཐག་པའི་ལུང་བསྟན་པས་སངས་རྒྱས་སུ་ལུང་བསྟན་པ་དང་། སེམས་བསྐྱེད་མ་ཐག་ཏུ་རིང་པོ་མི་ཐོགས་པར་སངས་རྒྱས་སུ་འགྱུར་བ་ཡིན་ཏེ། གང
112b6 ཟག་དེ་ལྟ་བུ་ནི། གང་ཟག་གསུམ་པའོ། །དགྲ་བཅོམ་པ་ཟག་པ་ཟད་པ་ནི། གང་ཟག་བཞི་པ་སྟེ། དགྲ་བཅོམ་པ་ཞེས་བྱ་བ་ནི། ཉོན་མོངས་པ་མེད་པ། ཁུར་བོར་བ།
112b7 རང་གི་དོན་གྱི་བྱ་བ་བྱས་བ། དོན་གྲུབ་པ། ས་བཅུ་ཐོབ་པ་ཞེས་བྱ་བའི་དོན་ཏོ། །དོན་གཞན་ཡང་རྒྱས་པར་བྱེད་དེ། མི་སྐྱེ་བའི་ཆོས་ལ་བཟོད་པའི་ལུང་བསྟན་པས་ལུང་བསྟན་པ་དང་།
iiif viewer powered by OpenSeadragon
