| e-texts navigator |
| Wylie |
107b1 རྟེན་ལས་འདས་པའི་ཆོས་དང་། ཆོ་ག་དང་། སྤྱོད་ཡུལ་རྣམས་ཡོད་དོ། ཐར་པ་ནི། བུམ་པའི་གཟུགས་བཞིན་དུ་རྟག་པ་དང་། བརྟན་པ་དང་། ཐེར་ཟུག་པ་མ་ཡིན་གྱི། བུམ་པ་ནི།
107b2 ཆག་པར་འགྱུར་ཏེ། རྒྱུའི་སྒོ་ནས་བཞག་པ་ཙམ་དུ་ཟད་དོ། །ཐར་པ་ནི། བྱས་པ་མ་ཡིན་པའི་ཕྱིར་ཆག་པར་མི་འགྱུར་ལ། ཐར་པ་གང་ཡིན་པ་དེ་ནི། བཅོས་མ་མ་ཡིན་པའི
107b3 ཁམས་ཡིན་ཏེ། དེ་ནི། དེ་བཞིན་གཤེགས་པའོ། །སྲེད་པ་ཟད་པ་སྲེད་པ་ཟད་པ་ཞེས་བྱ་བ་ནི། སངས་རྒྱས་སུ་གྱུར་པའི་མོད་ལ་བདག་དབང་པོར་གྱུར་ཅིག་ཅེའམ། དབང
107b4 ཕྱུག་ཆེན་པོའམ། མི་མཇེད་ཀྱི་བདག་པོ་ཚངས་པར་གྱུར་ཅིག་ཅེས་བྱ་བའི་སྲེད་པ་དང་། འདོད་པ་གཞན་དེ་ན་མེད་དེ། ཡོད་ཅེས་བྱ་བའམ། སྐྱེ་བར་འགྱུར་ཞེས་བྱ་བ་མི་སྲིད་དོ། །
107b5 སྲེད་པ་ཟད་པ་གང་ཡིན་པ་དེ་ནི། སངས་རྒྱས་སོ། །དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འདོད་ཆགས་དང་བྲལ་བ་འགོག་པ་འདོད་ཆགས་དང
107b6 བྲལ་བ་འགོག་པ་ཞེས་བྱ་བ་ལ། སྲེད་པ་ཐམས་ཅད་ལ་ཞེན་པ་དང་། འདོད་པ་མ་ལུས་པ་ལུས་པ་མེད་པ། ལྷག་པ་མེད་པ། ཐམས་ཅད་ལས་འདོད་ཆགས་དང་བྲལ་བ་རྣམས
107b7 གཏན་དུ་རབ་ཏུ་ཞི་བར་གྱུར་པ་ནི། ཐར་པ་ཡིན་ཏེ། འཆིང་བ་ཐམས་ཅད་འགོག་པའོ། །དེ་ལྟར་འགོག་པ་གང་ཡིན་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །
iiif viewer powered by OpenSeadragon
