| e-texts navigator |
| Wylie |
80a1 དཀྱིལ་འཁོར་ལས་བརྩམས་ཏེ་ཆོས་བསྟན་པ་ལ་མཐར་ཐུག་པ་མེད་དོ། །མོའུ་དགལ་གྱི་བུ། འདི་ཇི་སྙམ་དུ་སེམས། སྒྱུ་མ་མཁན་བཟང་པོས་རླུང་གི་དཀྱིལ་འཁོར
80a2 དེ་དག་གི་ནང་དུ་འདུག་པར་ནུས་སམ། གསོལ་པ། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མོའུ་དགལ་གྱི་བུ། ང་ནི་རླུང་གི་དཀྱིལ་འཁོར་དེ་དག་ཐམས་ཅད་ཀྱི་ནང་དུ་སྤྱོད་ལམ
80a3 བཞིས་གནས་པར་བྱེད་དོ། །དེ་བཞིན་གཤེགས་པ་ནི་བཞེད་ན། རླུང་གི་དཀྱིལ་འཁོར་ཐམས་ཅད་ཡུངས་འབྲུ་གཅིག་གི་ནང་དུ་འཇོག་པར་མཛད། འཇུག་པར་མཛད་ལ། ཡུངས་འབྲུ
80a4 དེ་ཡང་རྣམ་པར་འཇིག་པར་མི་འགྱུར་ཞིང་། ཡུངས་འབྲུ་དེའི་ནང་དུ་རླུང་གི་དཀྱིལ་འཁོར་དེ་དག་ཐམས་ཅད་ཀྱི་བྱ་བ་ཐམས་ཅད་ཀྱང་ཉེ་བར་སྟོན་པར་མཛད་ལ། རླུང་དེ་དག་ཕན་ཚུན་ཐུག
80a5 པར་ཡང་མི་འགྱུར། ལྟུང་བར་ཡང་མི་འགྱུར་རོ། །མོའུ་དགལ་གྱི་བུ་ང་ནི་སྒྱུ་མའི་ཆོས་ཉིད་དེ་ལྟ་བུ་དང་། དེ་མ་ཡིན་པ་གཞན་ཡང་ཚད་མེད་པ་དང་ལྡན་ནོ། །དེ་ནས་ཚེ་དང་ལྡན་པ་མོའུ་དགལ
80a6 གྱི་བུ་ཆེན་པོ་དང་། ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ངག་མཐུན་པར་ཚིག་ཏུ་སྨྲས་པ། བཅོམ་ལྡན
80a7 འདས། བདག་ཅག་གིས་རྙེད་པ་ལེགས་པར་རྙེད་དེ། སྟོན་པ་འདི་ལྟར་རྫུ་འཕྲུལ་ཆེ་བ། འདི་ལྟར་དབང་ཆེ་བར་གྲགས་པ། འདི་ལྟར་མཐུ་ཆེ་བ་ནི་བདག་ཅག་གིས་རྙེད་པ་ལེགས་པར
iiif viewer powered by OpenSeadragon
