| e-texts navigator |
| Wylie |
86a1 མི་འཆད། ད་ལྟར་བྱུང་བ་ཞེས་མི་འཆད། དངོས་པོར་མི་འཆད། དངོས་པོ་མེད་པར་མི་འཆད། མཚན་མ་དང་། མཚན་མ་མེད་པར་མི་འཆད། ཆོས་གང་སྐྱེ་བའི་ཕྱིར་རམ། འགག་པའི་ཕྱིར་མི་འཆད་མོད་ཀྱི། ཤཱ་རིའི་བུ
86a2 འོན་ཀྱང་བྱང་ཆུབ་སེམས་དཔའ་ལ་ཕན་པར་བཞེད་པའི་ཕྱིར་སྟོན་ཏེ། གང་འདི་གཟུངས་ཀྱི་ཆོས་ཀྱི་རྣམ་གྲངས་ཀྱི་གཟུངས་ནི་གཟུགས་མེད་པ། བྱ་བའི་ལམ་དུ་གྱུར་པ། རིགས་པའི་སྟོབས་ཀྱིས་གནས་པ། སངས་རྒྱས་ཀྱི་ཡོན་ཏན། སངས་རྒྱས་ཀྱི་ལྷག
86a3 པར་བྱ་བ་སྒྲུབ་པ། སངས་རྒྱས་ཀྱི་ཚུལ་ཁྲིམས། སངས་རྒྱས་ཀྱི་བསྡུས་པ། སངས་རྒྱས་ཀྱི་མཚམས་སྦྱོར་བ། སངས་རྒྱས་འབྱུང་བའོ། །དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་གང
86a4 ལ་གནས་ཤིང་། གཟུངས་དེ་ཐོབ་ན་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང་། དམ་བཅའ་བ་བཟང་བ་དང་། ཆོས་ལ་མི་གནས་པ་དང་། བདག་ཐེ་ཚོམ་མ་མཆིས་པ་དང་། སློབ་དཔོན་མ་མཆིས
86a5 པ་དང་། རང་གི་ལམ་ལ་གནས་པ་བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལེགས་སོ་ལེགས་སོ། །ཤཱ་རིའི་བུ་གཟུངས་ཐོབ་པའི་བྱང་ཆུབ་སེམས་དཔའ་ནི་སངས
86a6 རྒྱས་ཉིད་དུ་བརྗོད་དོ། །ཤཱ་རིའི་བུ་གང་ལ་ལ་ཞིག་བྱང་ཆུབ་སེམས་དཔའ་གཟུངས་ཐོབ་པ་ལ་བསྟི་སྟང་དུ་བྱེད་དམ། བླ་མར་བྱེད་དམ། རིམ་གྲོར་བྱེད་དམ། མཆོད་ན་དེས་སངས་རྒྱས་ཐམས་ཅད་ལ་བསྟི་སྟང་བྱས་པར་འགྱུར་རོ། །གང་དག་གིས་གཟུངས
86a7 འདི་ཐོས་པ་དང་། གང་དག་མོས་པ་དེ་དག་ཀྱང་སངས་རྒྱས་རྣམས་ཇི་ལྟ་བ་དེ་བཞིན་དུ་མཆོད་པའི་འོས་སུ་འགྱུར་ཞིང་བྱང་ཆུབ་ཀྱི་སེམས་དང་མི་འབྲལ་བར་འགྱུར་རོ། །ཤཱ་རིའི་བུ་གཟུངས་ནི་འདི་ཡིན་ཏེ། སནྡྷཱ་ར་ཎཱི། ཨུད་དྷཱ་ར་ཎཱི། སཾཔྲ་ཏིཥྤི་ཏ། སུ་ཏ་མ།
iiif viewer powered by OpenSeadragon
