| e-texts navigator |
| Wylie |
253a1 སྨོན་ལམ་དབང་གིས་འགྲོ་དོན་བྱེད། །བསྒོམ་པའི་ལམ་ལ་རབ་གནས་ནས། །ད་ལྟར་ཉོན་མོངས་སྒྲིབ་པ་སྦྱོང་། །འདི་ནས་དུས་འདི་ཕྱི་མའི་ཚེ། །མཁའ་འགྲོ་ལྷ་མོ་ནག་མོ་འདི། །བྱང་ཤར་མཚམས་ཀྱི་འཇིག་རྟེན་ཁམས། །པདྨོ་རྣམ་པར
253a2 རོལ་པ་དེར། །ཡང་དག་རྫོགས་པའི་སངས་རྒྱས་སུ། །པདྨའི་དཔལ་ཞེས་བྱ་བར་ནི། །ངས་ནི་ལྷ་མོ་ལུང་བསྟན་ཏོ། །དེ་ཡི་གཡོག་མོ་རེ་མ་ཏི། །པདྨ་ཅན་གྱི་ཞིང་ཁམས་དེ། །བདེ་བའི་བྱང་ཆུབ་སེམས་དཔའ་ནི། །བློ་གྲོས་བཤེས་གཉེན་བྱ་བར་ནི། །དེ་འདིར
253a3 ངས་ནི་ལུང་བསྟན་ནོ། །མཁའ་འགྲོ་མ་མེ་ལྕེ་འབར་བའི་རྒྱུད་ལས་ཡོངས་སུ་ལུང་བསྟན་པའི་ལེའུ་སྟེ་ཉི་ཤུ་རྩ་གཉིས་པ་རྫོགས་སོ།། །།མཆོད་ན་རྒྱལ་བ་རིགས་ལྔ་རྟག་ཏུ་མཆོད། །སྲུང་ན་དམ་ཚིག་ཉི་ཤུ་རྩ་བརྒྱད་སྲུངས། །དགྲ་བྱུང་ལྷ་མོ
253a4 ནག་མོ་མཚོན་ཆར་ཕྱུང་། །ཉེས་ཆུང་ཁ་འཐབ་ཙམ་ལ་མཚོན་མི་དབྱུང་། །ང་ཡི་དཀོར་ཁང་འཇིག་ན་མཚོན་ཆར་ཕྱུང་། །དཀོན་མཆོག་དབུ་འཕང་སྨོད་ན་མཚོན་ཆར་ཕྱུང་། །སངས་རྒྱས་བསྟན་པ་འཇིག་ན་མཚོན་ཆར་ཕྱུང་། །དཀོན་མཆོག་སྐུ་དགྲ་དར་ན་མཚོན་ཆར
253a5 ཕྱུང་། །ཞེས་སློབ་དཔོན་པདྨས་སློབ་བུ་གླང་དཔལ་གྱི་སེང་གེ་ལ་དེ་སྐད་ཅེས་བཀའ་སྩལ་ཞིང་གདམས་སོ།། @#། །རྒྱ་གར་སྐད་དུ། བཛྲ་མནྟྲ་བྷི་རུ་སནྟི་མ་ར་ཏནྟྲ་ནཱ་མ། བོད་སྐད་དུ། དྲག་སྔགས་འདུས་པ་རྡོ་རྗེ་རྩ་བའི་རྒྱུད
253a6 ཅེས་བྱ་བ། བཅོམ་ལྡན་འདས་མཐུ་སྟོབས་ཀྱི་བདག་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེ་འཛིན་པ་ཆེན་པོ་ཉིད། རི་རབ་ཆེན་པོའི་ཡང་སྟེངས། ལྕང་ལོ་ཅན་གྱི་གནས་མཆོག་།རབ་ཏུ་བརྒྱན་པའི་ཕོ་བྲང་ཆེན
253a7 པོ་ན། ཡུམ་ཆེན་མོ་འབྱུང་བ་ལྔའི་བདག་མོ་དང་། གཉིས་སུ་མེད་པར་སྙོམས་པར་ཞུགས་ཏེ། སྐུ་ལས་འོད་ཟེར་སྣ་ཚོགས་རབ་ཏུ་སྤྲོས་ནས། འཇིག་རྟེན་གྱི་ཁམས་ཀྱི་གདུག་པ་ཅན་དང་། དྲེགས་པ་ཅན་དང་། གཟི་བརྗིད་ཅན་དང་། དྲག་ཤུལ་ཅན་ལ་སོགས་པ
iiif viewer powered by OpenSeadragon
