| e-texts navigator |
| Wylie |
179b1 བ་ཚད་དུ་སྒྲོགས་པ་དང་། །གསང་བ་ཉམས་སུ་མི་ལེན་པར། །འཕྱར་བས་ཀུན་ལ་སྤེལ་བ་ནི། །ཚད་ལས་འདས་པའི་གང་ཟག་སྟེ། །སངས་རྒྱས་ཀུན་ལ་བརྙས་བྱེད་པས། །དུས་གསུམ་སངས་རྒྱས་ཁྲོས་པ་ཡིས། །བདུན་རྒྱུད་ཚུན་ཆད་བརླག་པར་མཛད། །བླ་མ་དང་ནི་གྲོགས
179b2 རྣམས་དང་། །ཕ་མ་གཉེན་བཤེས་རྒྱལ་བློན་དང་། །རྒྱལ་འབངས་འཕངས་ཉེས་མེད་སྡང་བ་ནི། །དམ་ཚིག་ཉམས་པའི་རྟགས་སུ་བཤད། །ཟབ་མོ་དག་ལ་གེགས་འབྱུང་དང་། །བསྒྲུབས་པས་འདོད་པ་མི་འབྱུང་ཞིང་། །བསྲུང་བའི་ལྷ་རྣམས་གཡེལ་བ་དང་། །མ་ཉེས་ཡ་ཁ་འབྱུང་བ
179b3 དག་། དམ་ཚིག་ཉམས་པའི་རྟགས་སུ་བཤད། །དང་པོར་བླ་མའི་ལུང་ཐོབ་ནས། །རང་རིག་ཉམས་པ་མ་ཚོར་ཞིང་། །བདེ་ལེགས་བསམ་པ་འགྲུབ་འགྱུར་ཞིང་། །བདག་གཞན་བསམ་པའི་ཁྱད་པར་དག་།སྔོན་དུ་ཡིད་བཞིན་ནོར་བུ་བཞིན། །འགྲུབ་ཅིང་བསྔགས་པས
179b4 ཐོབ་པ་ནི། །མ་ཉམས་དོན་དང་ལྡན་པའི་རྟགས། །རྣལ་འབྱོར་དབང་ཕྱུག་རྒྱལ་པོ་ཡིན། །གལ་ཏེ་མ་ཉམས་རྟགས་བྱུང་ན། །བསྐང་གསོའི་ཆོ་ག་མྱུར་དུ་བརྩམ། །གལ་ཏེ་ཉམས་ལ་རྟགས་མེད་ཅིང་། །ལེགས་པར་སྣང་ན་མི་རུང་སྟེ། །བདག་གི་ས་བོན་ཚིག་པ་སྟེ། །བདེ
179b5 བ་ཟད་བྱས་གཏན་དུ་སྡུག་། མ་ཉམས་རྟགས་བྱུང་མྱུར་བསྐངས་ན། །སྔོན་གྱི་བག་ཆགས་ཟད་པར་འགྱུར། །རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ལས་དམ་ཚིག་མ་ལུས་པ་བཤད་པའི་ལེའུ་སྟེ་བརྒྱད་པའོ།། །།དེ་ནས་ཡང་དག་བཤད་བྱ
179b6 བ། །མཆོག་དང་ཐུན་མོང་ལ་སོགས་པ། །བསྒྲུབ་པའི་ཁྱད་པར་ཇི་སྙེད་པའི། །རྟོག་པའི་ཆོ་ག་མདོར་བསྡུས་བཤད། །རྒྱུད་ཀྱི་རྒྱལ་པོ་མ་ལུས་ལས། །ཐུན་མོང་དག་ལ་མོས་ཞུགས་པས། །ཐུན་མོང་ཡོ་བྱད་ཏིང་འཛིན་དང་། །སྔགས་དང་ཕྱག་རྒྱ་འབྲལ་གོམས
179b7 པས། །རྟགས་དང་ནུས་པ་མཐར་ཕྱིན་པས། །གང་ལྟར་དམིགས་པ་འགྲུབ་འགྱུར་ཏེ། །ཟག་བཅས་ཐུན་མོང་དངོས་གྲུབ་ཡིན། །དེ་ལས་གཞན་པ་བཤད་པར་བྱ། །གང་དུ་མཆོག་གི་རྣལ་འབྱོར་པ། །དབང་དང་དམ་ཚིག་ཏིང་འཛིན་དག་།ཕྱི་ནང་གསང་བའི་རིམ
iiif viewer powered by OpenSeadragon
