| e-texts navigator |
| Wylie |
155b1 དབང་སྒྱུར་གཉིས་མེད་གང་ཡིན་པས། །ཡབ་ཡུམ་འབྲེལ་བའི་ངོ་བོར་བཤད། །རྩ་བཅུད་ཐིག་ལེར་བཅས་པའི་རྟེན། །སོ་སོའི་ནུས་པར་བཅས་པ་ཉིད། །གང་ལ་དེ་དབང་དེ་ཡི་ཕྱིར། །འདི་ནི་ཕྱི་ཡི་རིམ་པར་བཤད། །གང་དེ་ཁམས་ལྔའི་བདེ་བ་ཡིས། །མཉེས་དང་ཐིག་ལེ
155b2 བཀོད་པ་དང་། །ནམ་མཁའི་ཡེ་ཤེས་གསལ་བ་དང་། །དེ་ཉིད་ཁྱབ་པའི་རང་བཞིན་ཏེ། །ཟག་མེད་བདེ་བའི་རང་བཞིན་གྱིས། །ཕྱོགས་བཅུའི་ཞིང་ཁམས་མཉེས་པར་མཛད། །དགུག་དང་བཅིང་དང་མཉེས་དང་གསལ། །ཐབས་ལམ་བཅུད་དུ་འབྲེལ་བར་གསུངས། །གང
155b3 དེ་ཐབས་ཆེན་གསལ་བྱས་པས། །ལུས་ཀྱི་ཆོས་བཞི་རྟག་ཆད་སྤངས། །བདེ་བའི་ཐིག་ལེ་རང་སྣང་བ། །མ་ལུས་འཇོམས་ལས་ཁྲོ་བོའོ། །བཅུད་ལས་འདས་པའི་ཧཱུ~ཾ་གསུམ་ཉིད། །བྱེད་པ་བྲལ་བའི་ངོ་བོ་ཉིད། །ཡུལ་གསུམ་བྲལ་བས་ཆོས་ཀྱི་དབྱིངས། །མ་ལུས་རྣམ་དག
155b4 ཀུན་དུ་བཟང་། །དངས་སྙིགས་སྙིང་པོར་འབྲེལ་བ་ཡིས། །ཉོན་མོངས་ས་བོན་དྲུག་བཅས་པས། །ཐིག་ལེས་བཏུལ་ནས་བསྟན་པ་འཆད། །སྤྲུལ་པའི་སྐུ་རུ་བཤད་པ་ཡིན། །ཀུན་ཀྱང་ཡེ་ཤེས་ལྔ་ཡི་རོ། །ཁྱབ་པར་གནས་པས་རྒྱས་བཏབ་ཅིང་། །སྣང་སྲིད་བདེ་ཆེན་སྐུ་གསུང
155b5 ཐུགས། །དྲན་པ་རྟག་ཏུ་གསལ་བཟུང་བའོ། །དེ་ནས་གཞན་ཡང་བཤད་པར་བྱ། །གསང་རྩེ་སྣ་ཚོགས་འདུས་པའི་དབུས། །ཕྱི་ནང་རིམ་པའི་དབུ་རྩེ་ཅན། །ངོ་བོ་བྱིན་བརླབས་འཕགས་པ་སྟེ། །ཡོན་ཏན་བྱིན་བརླབས་ཀུན་གྱི་གནས། །གསང་བའི་པདྨའི་རང་བཞིན་དུ། །
155b6 རྡོ་རྗེ་གཉིས་མེད་ཐིག་ལེར་བལྟ། །ཉི་ཟླ་ཟིལ་བའི་ཐིག་ལེ་ཉིད། །ཕན་ཚུན་འདྲེས་པ་རླུང་གིས་ཕྱེ། །གསང་བའི་ཁམས་ལྔས་ཡེ་ཤེས་རོལ། །སྙིགས་མའི་ཕུང་པོ་ལྔ་དག་ནས། །དངས་མ་ལྔ་ཡི་རང་བཞིན་གསལ། །རྒྱལ་པོ་དེ་བཞིན་གཤེགས་པར་གསལ། །གསང
155b7 བའི་འབྱུང་བ་ལྔར་བསྟན་པ། །དབང་ཡུལ་ཕྲད་པའི་སྐབས་ལས་ཤེས། །རིགས་མཆོག་ཡུམ་གྱི་ཕྱག་རྒྱ་ལྔ། །སྙིགས་མ་བྲལ་བའི་དུས་ན་བལྟ། །ཐིག་ལེ་ཐུགས་ཀྱི་བདེ་བ་རྣམས། །རང་རང་ཐིག་ལེ་བདེ་བར་གསལ། །ཡེ་ཤེས་རྣམ་ཤེས་དངས་མ་རྣམས། །བདེ་བ་ཆེན
iiif viewer powered by OpenSeadragon
