| e-texts navigator |
| Wylie |
133a1 དང་། །མར་མེ་དྲི་ཆབ་གང་ཕྱིར་བརྗོད། །རྣམ་རྒྱལ་གཤིན་རྗེ་གཤེད་པོ་དང་། །རྟ་མགྲིན་བདུད་རྩི་འཁྱིལ་པ་ཅི། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་ཞེས་པ་གང་ཕྱིར་བརྗོད། །ཡིད་དང་ཆོས་བཟང་གཉིས་ཅི་ཕྱིར། །གཙོ་བོས་བདག་ལ་ངེས་པར
133a2 གསུངས། །གང་ཕྱིར་ཐུན་མོང་མ་ཡིན་པའི། །ནང་དང་གསང་བའི་གླེང་གཞི་ལས། །སྟོན་པ་བསྟན་པ་གནས་དང་འཁོར། །དུས་དང་སྡུད་པ་ཇི་ལྟར་བརྗོད། །གྲགས་པ་ཐུན་མོང་གླེང་གཞི་ལས། །སྟོན་པ་འཁོར་གནས་དུས་ཇི་ལྟར། །བསྟན་པ་སྡུད་པ་ཇི་ལྟ་བུ། །སྐྱེས་བུ
133a3 ཆེན་པོས་བཤད་དུ་གསོལ། །འདི་ནི་གླེང་གཞིའི་དྲི་བ་ཚིགས་སུ་བཅད་པའོ། །ཐུན་མོང་ཐུན་མོང་མ་ཡིན་པའི། །གླེང་བསླང་གཉིས་སུ་ཅི་ཕྱིར་འགྱུར། །གང་གིས་གང་ལ་གླེང་བསླང་ཞིང་། །ཐབས་དང་འབྲས་བུ་ཅི་ཡིན་སྟོན། །ཐུན་མོང་ཐུན་མོང་མ་ཡིན་པའི། །སེམས་ལྔ
133a4 ཡེ་ཤེས་ལྔ་ཡི་རིམ། །གང་དང་འབྲེལ་པ་བཤད་དུ་གསོལ། །འདི་ནི་གླེང་བསླང་བའི་ཚིགས་སུ་བཅད་པའོ། །སྐྱེས་བུ་ཆེན་པོ་སྟོན་པའི་གཙོ། །སྒྱུ་འཕྲུལ་དྲ་བར་མངའ་བརྙེས་ཤིང་། །ཕུན་སུམ་ཚོགས་པ་ཆོས་ཀྱི་རྗེ། །གཟི་བརྗིད་ཕུང་པོ་ཕུན་སུམ་ཚོགས། །བལྟ་བྱ་གང
133a5 ལ་ཅི་ཡི་ཕྱིར། །གང་གིས་རྟོགས་པས་ཇི་ལྟར་འགྱུར། །རྟོགས་དང་མ་རྟོགས་ཁྱད་པར་ཅི། །རྟོགས་པའི་སྒོ་ནི་དུ་རུ་གསུངས། །གཏན་ཚིགས་ཚུལ་དང་འབྲས་བུ་ཅི། །འདི་ནི་ལྟ་བའི་དྲི་བའོ། །ཐུན་མོང་སྤྱོད་པ་ཅི་ཡི་ཕྱིར། །ཐུན་མོང་ཐུན་མོང་གང་ཅིའི་ཕྱིར། །ཤེས་རབ
133a6 ཚོགས་དང་ཐུགས་རྗེ་དང་། །རྟོགས་དང་ཕྱོགས་གཅིག་སྤྱོད་པ་དང་། །འབྲེལ་དང་རིག་འཛིན་སྤྱོད་པ་ཅི། །གང་གིས་གང་ལ་ཇི་ལྟར་སྤྱད། །དེ་ཡི་འབྲས་བུ་གང་ཕྱིར་འགྱུར། །གང་དུ་དེ་དང་མི་ལྡན་པའི། །སྤྱད་པའི་སྐྱོན་ཉིད་བདག་ལ་གསུངས། །འདི་ནི་སྤྱོད
133a7 པའི་ཁྱད་པར་གྱི་དྲི་བའོ། །ཐུན་མོང་སྤྱི་དང་ཁྱད་པར་གྱི། །རང་བཞིན་ཉིད་དང་ལྷུན་གྲུབ་ཀྱི། །དཀྱིལ་འཁོར་ཞེས་པ་གང་ཅིའི་ཕྱིར། །དེ་ཉིད་ཕྱི་ནང་གསང་བ་དང་། །འདུལ་ཐབས་གཉིས་སུ་ཇི་ལྟར་འགྱུར། །ཏིང་འཛིན་དཀྱིལ་འཁོར་རིམ་གསུམ་གང་། །ལྷག་པ
iiif viewer powered by OpenSeadragon
