| e-texts navigator |
| Wylie |
85b1 སེམས་ཀུན་བྱེད་རྒྱལ་པོས་མཚན་གྱི་རྣམ་གྲངས་རྣམ་པར་ཕྱེ་བ་འདི་གསུངས་སོ། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །མཚན་གྱི་ཁྱད་པར་ཕྱེ་སྟེ་བཤད་པ་ནི། །ཇི་ལྟར་སྣང་བའི་ཆོས་རྣམས་ཐམས་ཅད་ཀུན། །མ་ལུས་ཀུན་བྱས་བྱེད་ཅིང་བྱེད་འགྱུར་ཏེ། །
85b2 ཉིད་ལ་བྱ་མི་དགོས་ཏེ་ལྷུན་གྲུབ་པས། །ཀུན་བྱེད་རྒྱལ་པོ་ཞེས་སུ་བསྟན་པ་ཡིན། །ཀྱེ་སྙིང་པོ་ང་ལ་དྲི་མ་མེད་པ་དང་། །མ་བཙལ་ལྷུན་གྱིས་གྲུབ་པའི་དོན་ལྡན་པས། །འདི་ལ་བཙལ་ཞིང་སྒྲུབ་པ་མི་མངའ་སྟེ། །བྱང་ཆུབ་སེམས་ཞེས་ངེས་པར་བསྟན་པ་ཡིན། །ཀྱེ
85b3 མ་གདོད་ནས་གྲུབ་པའི་ཆོས་ཉིད་ལ། །རྒྱུ་དང་རྐྱེན་མེད་བཙལ་མེད་སྙིང་པོ་འདི། །མ་བསྒྲིབས་ཀུན་ལ་ཕྱོགས་རིས་མེད་གསལ་བས། །རང་འབྱུང་ཡེ་ཤེས་ཞེས་སུ་བསྟན་པ་ཡིན། །ཀྱེ་ཇི་ལྟར་སྣང་བའི་ཆོས་རྣམས་ཐམས་ཅད་ཀུན། །མ་བཅོས་ཇི་བཞིན་ངང་ལ་ཀུན
85b4 སྣང་བས། །ཕྱོགས་རིས་གཉིས་སུ་ཆད་པའི་དོན་མེད་དེ། །བཀའ་ཡི་འགྲེལ་པ་ཆོས་ཀྱི་མེ་ལོང་ཡིན། །ཀྱེ་ཇི་བཞིན་མ་བཅོས་སྙིང་པོ་རྣལ་མ་ལ། །འཁོར་དང་མྱ་ངན་འདས་པ་འབྱུང་སྡུད་པ། །བླང་དོར་འཛིན་ཆགས་རྒྱ་ལས་རྣམ་གྲོལ་ཏེ། །སྙིང་པོ་དོན་གྱི
85b5 ཐེག་པ་བསྟན་པ་ཡིན། །ཀྱེ་འདས་དང་མ་བྱོན་ད་ལྟར་རྒྱལ་བ་ལ། །སྐྱེ་མེད་འདི་ལས་མ་གཟིགས་མི་དགོངས་པས། །མ་བཅོས་ཐིག་ལེ་གཟུང་འཛིན་ལས་འདས་པས། །ལྟ་བའི་མེ་ལོང་ཞེས་སུ་བསྟན་པ་ཡིན། །ཀྱེ་ང་ནི་མ་བཅོས་ཇི་བཞིན་སྙིང་པོ་ལ། །སྒྲོ
85b6 འདོགས་སྐུར་འདེབས་དོན་ལས་ཀུན་འདས་ཏེ། །དུས་གསུམ་རྒྱལ་བ་ང་ལས་བྱུང་བས་ན། །རྒྱལ་བའི་ཡུམ་ཞེས་ངེས་པར་བསྟན་པ་ཡིན། །ཀྱེ་མ་བཅོས་སྐྱེ་མེད་ཀུན་བྱེད་རྒྱལ་པོ་ལ། །མ་བཙལ་དགོས་པའི་ཡོན་ཏན་ཚད་རྫོགས་པས། །བཙལ་ཞིང་བསྒྲུབ་པ་ཀུན་ལས་འདས
85b7 པས་ན། །རྒྱུད་ཀྱི་རྒྱལ་པོ་ཞེས་སུ་བསྟན་པ་ཡིན། །ཀྱེ་མ་བཅོས་དོན་ལ་མ་ནོར་བློ་འཇོག་པས། །སྙིང་པོ་དོན་ལ་སྒྲོ་དང་སྐུར་པ་བྲལ། །གཉི་ག་མི་འགལ་དོན་དུ་གང་སྟོན་པ། །མ་བཅོས་དོན་གྱི་ལུང་དུ་བསྟན་པ་ཡིན། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོས་ལུང་བསྟན
iiif viewer powered by OpenSeadragon
