| e-texts navigator |
| Wylie |
83b1 པ། །ལྔ་བཅུ་བ་དང་ལྔ་བཅུ་གསུམ་པས་རྫོགས། །གཏན་ལ་ཕེབས་ན་མ་བཅོས་བཅོས་མེད་པས། །བཞི་བཅུ་གཉིས་པས་དགོས་པ་བསྟན་པ་ཡིན། །ལྔ་བཅུ་བཞི་པས་རྩ་བའི་གཞི་བསྟན་ནས། །ལྔ་བཅུ་བདུན་པས་གཏད་ཅིང་གདམས་པ་སྟེ། །རྩ་བའི་རྒྱུད་དེ་ཐོས
83b2 པར་གཅེས་པ་ཡིན། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ངས། །བསམ་པས་གཏན་ལ་ཕབ་སྟེ་བསྟན་པ་ནི། །རྩ་བའི་རྒྱུད་དུ་གསུངས་པའི་དོན་རྣམས་ཀྱང་། །རྫོགས་པའི་རང་བཞིན་བཅུ་རུ་བསྟན་པའི་ཕྱིར། །རྟོགས་པའི་མདོ་ལུང་བཅུ་རུ་བསྟན་པ་ཡིན། །
83b3 ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །བསྒོམས་པས་ངེས་པར་འབྱིན་པར་བཤད་པ་ནི། །རང་བཞིན་བཅུ་རུ་དགོངས་པས་བཤད་པ་ཡང་། །སྐྱེ་བ་མེད་པའི་དོན་དུ་བསྡུས་ཏེ་བསྟན། །སྐྱེ་མེད་རྟོགས་པའི་དོན་ལས་མ་ཡེངས་པས། །བསྒོམ་པའི་མདོ་ལུང
83b4 བཅུ་རུ་བསྡུས་ཏེ་བསྟན། །འདི་ལས་འཕྲོས་ཤིང་ཐམས་ཅད་འདིར་འདུས་པས། །ཀུན་གྱི་རྩ་བ་དོན་གྱི་འགྲེལ་པའི་ལུང་། །ཀུན་བྱེད་ང་ཡི་སྲས་སུ་གྱུར་པ་ལ། །མིང་གིས་དོན་མཚོན་སྐྱེ་མེད་རྟོགས་ཕྱིར་བསྟན། །ཀྱེ་སེམས་དཔའ་རྡོ་རྗེ་ལེགས་པར་ནན་ཏན་གྱིས། །ཐེག
83b5 པའི་རྩ་བ་བྱང་ཆུབ་སེམས་ཀྱི་ལུང་། །ཀུན་བྱེད་རྒྱལ་པོས་བསྡུས་པའི་རྩ་བ་འདི། །སེམས་དཔའ་རྡོ་རྗེ་ལེགས་པར་རྟོགས་འགྱུར་ན། །རྒྱལ་བའི་རྒྱལ་བ་ཀུན་བྱེད་རྒྱལ་པོར་འགྱུར། །དེ་ཕྱིར་ཀུན་བྱེད་ང་ཡི་འཁོར་རྣམས་ལ། །སེམས་དཔའ་རྡོ་རྗེས་དོན་འདི་ལུང་སྟོན
83b6 ཅིག་། སྐྱེ་མེད་བྱང་ཆུབ་སེམས་སུ་ལུང་སྟོན་ཅིག་།འཁོར་འདས་དབྱིངས་སུ་གཅིག་པར་ལུང་སྟོན་ཅིག་།རྒྱུ་འབྲས་དུས་གཅིག་རྫོགས་པར་ལུང་སྟོན་ཅིག་།ཅེས་གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་དགོངས་དོན་ལྡེ་མིག་གི་ལེའུ་སྟེ་བརྒྱད་ཅུ
83b7 རྩ་གཅིག་པའོ། ། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལ་སེམས་དཔའ་རྡོ་རྗེས་གུས་པའི་ཚུལ་གྱིས་བསྟོད་པ། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཁྱོད། །དུས་གསུམ་རྒྱལ་བའི་རང་བཞིན་ཆོས་ཀྱི་དབྱིངས། །འཁོར་བ་མི་སྤོང་ཐུགས་རྗེ་ཕྱོགས་རིས
iiif viewer powered by OpenSeadragon
