| e-texts navigator |
| Wylie |
81b1 སེམས་དཔའ་རྡོ་རྗེ་ད་སྒོམས་ཤིག་། རང་འབྱུང་ཡེ་ཤེས་དམིགས་པ་ཀུན་ལས་འདས། །རྟོགས་པ་དམིགས་པའི་དོན་དུ་གཞོག་མི་བྱེད། །ཡུལ་ལས་འདས་པས་རྣམ་ཤེས་སྲུང་མི་བྱེད། །དངོས་པོ་སྙིང་པོར་གསལ་བས་སྒོམ་མི་བྱེད། །རྣམ་པ་སྙིང་པོར
81b2 གསལ་བས་རེ་དོགས་མེད། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །མ་བཅོས་འཁོར་གྱི་ནང་དུ་ལུང་བསྟན་པ། །མ་བཅོས་སྙིང་པོ་ཆོས་ཀུན་རྩ་བ་ལ། །ཇི་ལྟར་སྣང་བ་གཏན་ལ་འབེབས་པར་བྱེད། །སྙིང་པོ་རང་བཞིན་གཅིག་གི་དོན་རྟོགས
81b3 ན། །ཀུན་གྱི་རང་བཞིན་ཀུན་བྱེད་ཉིད་དུ་འདུས། །དེས་ན་ཀུན་བྱེད་ང་ཡི་དོན་མཁས་ན། །བསམ་གྱིས་མི་ཁྱབ་ཆོས་ལ་མཁས་པར་འགྱུར། །ཀུན་བྱེད་ང་ཡི་དོན་ལ་གོམས་འགྱུར་ན། །ཀུན་གྱི་དོན་ལ་གནས་ཤིང་གོམས་པ་ཡིན། །ཀྱེ་སེམས་དཔའ་རྡོ
81b4 རྗེ་ལེགས་པར་ད་སྒོམས་ཤིག་། ཇི་ལྟར་སྣང་གྲགས་ཆོས་རྣམས་ཐམས་ཅད་ལ། །སྙིང་པོ་རྟོགས་གོམས་དོན་ཉིད་གཅིག་ལས་མེད། །སྙིང་པོ་མངོན་དུ་ཕྱུང་ནས་གང་བསྟན་པ། །རང་བཞིན་སྐྱེ་བ་མེད་པའི་དོན་དུ་རྟོགས། །མ་ཡེངས་རེ་དོགས་ཆད་པས་དགོངས
81b5 པ་ཡིན། །ཀྱེ་སེམས་དཔའ་རྡོ་རྗེ་ལེགས་པར་ད་སྒོམས་ཤིག་།ཇི་ལྟར་སྣང་བའི་ཆོས་སུ་གང་བསྟན་པ། །ཀུན་བྱེད་རྒྱལ་པོ་མཚོན་པའི་ཐབས་སུ་བསྟན། །ཐབས་དེའི་ལུང་དང་འགལ་བར་མ་བྱེད་ཅིག་།ཀུན་བྱེད་ང་ཡི་སྲས་སུ་ཞུགས་རྣམས་ཀྱིས། །ཀུན་ཀྱང
81b6 སྐྱེ་མེད་དོན་དུ་རྟོགས་འགྱུར་ན། །འཁོར་དང་མྱ་ངན་འདས་པར་མི་སེམས་ཏེ། །སྙིང་པོ་རང་བཞིན་རྟོག་དཔྱོད་བྲལ་བར་བསྟན། །ཞེས་གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་མི་སྒྲིབ་པའི་ལེའུ་སྟེ་བདུན་ཅུ་དགུ་པའོ།། །།དེ་ནས་བྱང་ཆུབ་ཀྱི
81b7 སེམས་ཀུན་བྱེད་རྒྱལ་པོས་ལྷུན་གྲུབ་རེ་དོགས་ལས་འདས་པའི་དགོངས་པ་འདི་གསུངས་སོ། །ཀྱེ་སེམས་དཔའ་རྡོ་རྗེ་ལེགས་པར་ད་སྒོམས་ཤིག་།ང་ནི་སྟོན་པ་ཀུན་བྱེད་རྒྱལ་པོ་སྟེ། །ཇི་ལྟར་སྣང་བའི་ཆོས་རྣམས་མ་ལུས་པ། །སྐྱེ་མེད་སེམས་ཀྱི་རང་བཞིན་ཉིད་དུ་བསྟན། །
iiif viewer powered by OpenSeadragon
