| e-texts navigator |
| Wylie |
74b1 འབྱོར་རྣམས་ཀྱི་བླ་མ་གྱིས། །གསང་བ་ཀུན་གྱི་རྒྱལ་པོ་སྟེ། །བསྟན་པ་ཕྱི་མ་གསང་བ་འདི། །རྣལ་འབྱོར་པ་ལ་ལུང་སྟོན་ཅིག་།ཅེས་གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་རྟོགས་པ་བསྒྲགས་ཤིང་བསྟོད་པའི་ལེའུ་སྟེ་དྲུག་ཅུ་རྩ
74b2 དགུ་པའོ། ། །།རྒྱུད་ཕྱི་མ་ཞེས་བྱ་བ་མདོ་ལུང་བཅུ་གཉིས་པ་རྫོགས་སོ།། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཆོས་ཐམས་ཅད་སྐྱེ་བ་མེད་པར་མཉམ་པ་ལ་གཟིགས་ཤིང་དགོངས་ནས་ཅང་ཡང་མི་གསུང་བར་བཞུགས་སོ། །
74b3 དེའི་ཚེ་སེམས་དཔའ་རྡོ་རྗེ་དེ་ཉིད་ཀྱང་སྟོན་པ་དེ་ལྟར་གྱུར་པ་ཡང་རིག་།ཆོས་ཐམས་ཅད་སྐྱེ་བ་མེད་པར་རྟོགས་པ་ལ་དགོངས་ནས་ཅང་ཡང་མི་སྨྲ་བར་འཁོད་དོ། །དེ་ནས་ཕྱོགས་བཅུ་ནས་ལྷགས་ཤིང་འཁོད་པའི་འདུས་པ་ཕལ་མོ་ཆེ་དག་གིས་དེ་ལྟར་རྟོགས
74b4 ནས་སེམས་དཔའ་རྡོ་རྗེ་ལ་འདི་སྐད་ཅེས་བསྐུལ་ལོ། །ཡང་དག་པར་བསྐུལ་ཏོ། །ངེས་པ་དམ་པར་བསྐུལ་ཏོ། །ེ་མ་ཧོ། སེམས་དཔའ་རྡོ་རྗེ་ཆེན་པོ་བདག་ཅག་ལ་ཕན་གདགས་པའི་སླད་དུ་རྟོགས་པའི་དོན་ལ་ཇི་ལྟར་བསྒོམ་པ་དེ་སྟོན་པ་ལ་ཞུ་བའི
74b5 དུས་ལ་བབ་བོ། །ངེས་པར་དུས་ལ་བབ་པོ་ཞེས་བསྐུལ་བས་སེམས་དཔའ་རྡོ་རྗེ་དེ་དགའ་བའི་མདངས་དང་བཅས་ཏེ་དང་ཞིང་མོས་པའི་མདངས་ཕྱུང་ནས་སྟན་ལས་ལངས་ཏེ་སྟོན་པའི་མདུན་དུ་འདི་སྐད་ཅེས་ཞུས་སོ། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ
74b6 ལགས། །ཁྱོད་ཀྱི་མདུན་དུ་བདག་འདུས་འཁོད་པ་དེ། །བདག་འཚལ་བ་ཡི་དོན་ནི་ཅི་ཞིག་མཆིས། །བདག་འཚལ་དོན་ནི་ཁྱོད་ཀྱིས་བསྟན་དུ་གསོལ། །ཞེས་ཞུས་པ་ལས་བྱང་ཆུབ་ཀྱི་སེམས་ཀུན་བྱེད་ཉིད་ཅང་ཡང་མི་གསུང་བར་བཞུགས་ཏེ་སེམས
74b7 དཔའ་རྡོ་རྗེས་འདི་སྐད་ཅེས་ཞུས་སོ། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས། །ཆོས་སྐུ་སྐྱེ་མེད་ཐིག་ལེའི་རང་བཞིན་ལ། །སྟོན་པ་གསུམ་པོ་ཉིད་ཀྱིས་ཇི་ལྟར་བསྒོམ། །བསྟན་པ་གསུམ་དུ་ཉིད་ཀྱིས་ཇི་ལྟར་བསྒོམ། །སྡུད་པ་གསུམ་དུ་ཉིད
iiif viewer powered by OpenSeadragon
