| e-texts navigator |
| Wylie |
64b1 གཉིས་ལ་གནས། །དེ་བས་དང་པོར་རང་སེམས་མ་ནོར་བསྟན། །བསྟན་པས་མ་ནོར་བཙལ་མེད་ལམ་ཕྲད་ནས། །ད་ལྟ་ཉིད་ནས་མི་རྩོལ་ས་ལ་གནས། །བཙལ་དུ་མེད་པའི་ལམ་དང་དེ་ཕྲད་འགྱུར། །ཏིང་འཛིན་བསྒོམ་མི་དགོས་དང་དེ་ཕྲད་འགྱུར། །མི
64b2 རྩོལ་བདེ་ལ་གནས་པ་དེ་ཡིས་ཐོབ། །མ་ནོར་ངེས་པར་རང་སེམས་དེ་ཐོབ་པས། །མ་བཙལ་ལྷུན་གྱིས་གྲུབ་པའི་ཡོན་ཏན་ནི། །སེམས་བསྐྱེད་མི་དགོས་ལམ་ལ་བགྲོད་མི་དགོས། །ས་ལ་མི་སྦྱོང་ལྟ་བ་བསྒོམ་མི་དགོས། །སྡོམ་པ་ཚུལ་ཁྲིམས་དམ་དུ
64b3 གཉེར་མི་དགོས། །ཀྱེ་སེམས་དཔའ་ཆེན་པོ་ལུང་སྟོན་ཅིག་།འཇིག་རྟེན་མཚན་མའི་ཆོས་འདི་བསྒྲུབ་པ་བཞིན། །ལུས་ཀྱི་ལས་སུ་བྱ་བྱེད་ལྷ་མི་སྒོམ། །ངག་གི་ལས་སུ་སྔགས་དང་ཚིག་མི་བརྗོད། །ཡིད་ཀྱི་ལས་སུ་ཏིང་འཛིན་གསལ་མི་སྒོམ། །ཞེས
64b4 གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ཆོས་ཐམས་ཅད་བྱང་ཆུབ་ཀྱི་སེམས་ལས་མེད་པའི་ལེའུ་སྟེ་ང་ལྔ་པའོ།། །།དེ་ནས་སེམས་དཔའ་རྡོ་རྗེ་དེས། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེ་ཆོས་ཐམས་ཅད་ཀྱི་ངོ་བོ་དང
64b5 བྱེད་པ་པོ་ཡིན་པར་ཉིད་ཀྱི་འཁོར་ཐམས་ཅད་ལ་ཚིག་བསྒྲགས་པ་དང་རྟོགས་པ་ཕུལ་བ་འདི་བསྒྲགས་སོ། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས། །བདག་གིས་ཁྱོད་ཀྱི་རང་བཞིན་རྟོགས་པ་ནི། །ཆོས་རྣམས་ཐམས་ཅད་ཁྱོད་ཀྱི་རང་བཞིན་གཅིག་།
64b6 ཆོས་ཉིད་ཆོས་ཀྱི་དབྱིངས་ཀྱི་ཕོ་བྲང་དེ། །ཀུན་བྱེད་རྒྱལ་པོ་ཡིན་པར་རབ་ཏུ་གྲགས། །ནམ་མཁའི་ཁམས་ཀྱི་གཞལ་ཡས་ཁང་འདི་ཡང་། །ཀུན་བྱེད་རྒྱལ་པོ་ཡིན་པར་རབ་ཏུ་གྲགས། །སྐྱེ་མེད་ཆོས་ཀྱི་སྐུ་ཡི་སྟོན་པ་ཡང་། །ཀུན་བྱེད་རྒྱལ་པོ་ཡིན་པར
64b7 རབ་ཏུ་གྲགས། །འདོད་སྤྱོད་ལོངས་སྤྱོད་རྫོགས་པའི་སྐུ་འདི་ཡང་། །ཀུན་བྱེད་རྒྱལ་པོ་ཡིན་པར་རབ་ཏུ་གྲགས། །ཐུགས་རྗེ་ཡེ་ཤེས་སྤྲུལ་པའི་སྐུ་འདི་ཡང་། །ཀུན་བྱེད་རྒྱལ་པོ་ཡིན་པར་རབ་ཏུ་གྲགས། །འདོད་པའི་ཁམས་ཀྱི་འདོད་ཆགས་ཁམས
iiif viewer powered by OpenSeadragon
