| e-texts navigator |
| Wylie |
51a1 ཆོས་ཉིད་ལ། །བརྐམ་ཆགས་ལྔ་ཡི་སྡུག་བསྔལ་ཡིན་ཟེར་ནས། །མ་བཅོས་མི་འཇོག་བརྟུལ་ཞུགས་སྤོང་འགེགས་བསྒོམ། །དེ་ལུང་བསྟན་པས་མ་བཅོས་དོན་དང་འགལ། །མུ་སྟེགས་སྡེ་བཞི་སྤྲུལ་པའི་ཐུགས་རྗེ་ཡིས། །བྱིན་བརླབས་འཁོར
51a2 དུ་བཀོད་ནས་ལུང་བསྟན་པས། །བྱ་བྲལ་བདེ་བ་དེ་ཉིད་ཐོབ་མི་འགྱུར། །ཀྱེ་སེམས་དཔའ་ཆེན་པོ། །ང་ལས་མངོན་དུ་ཕྱུང་བའི་ཆོས་ཉིད་ལ། །བརྐམ་ཆགས་ལྔ་ཡིས་སྡུག་བསྔལ་སྐྱེ་ཟེར་ནས། །དང་པོ་ས་ནས་བཅུ་པར་སེམས་དཔའ་ལ། །བདེན་པ་རྣམ་པ་གཉིས
51a3 ཀྱི་རྟོག་དཔྱོད་ཀྱིས། །དོན་དམ་མེད་ལ་ཀུན་རྫོབ་ཡོད་པ་རུ། །སྤྲུལ་པས་ལུང་བསྟན་རྟོག་དཔྱོད་སྒོམ་པ་བྱེད། །མ་བཅོས་ཇི་བཞིན་ང་ཡི་དོན་དང་འགལ། །ཀྱེ་སེམས་དཔའ་ཆེན་པོ། །ང་ལས་མངོན་དུ་ཕྱུང་བའི་ཆོས་ཉིད་དེ། །མ་བཅོས་ཇི་བཞིན་པ་ཡི་ཆོས་ཉིད
51a4 ལ། །ལོངས་སྤྱོད་རྫོགས་པས་འཁོར་ལ་ལུང་བསྟན་པ། །ཇི་བཞིན་བཅོས་པ་མེད་པར་མ་རྟོགས་ཏེ། །ཕྱི་ནང་སྣོད་བཅུད་དག་པར་བྱིན་བརླབས་ཏེ། །བྱང་ཆུབ་ཡན་ལག་ཆོ་ག་ཀུན་སྒོ་ནས། །བསྒོམ་པའི་ཡེ་ཤེས་ལྷ་ནི་སྣང་བར་བྱེད། །སྐད་ཅིག་མཆོད
51a5 ནས་གཤེགས་གསོལ་ཏིང་འཛིན་བཤིག་། ཡང་བསྒོམས་ཡང་བཤིག་བྱིས་པའི་འདག་ཁང་འདྲ། །ཇི་བཞིན་མ་བཅོས་ང་ཡི་དོན་དང་འགལ། །ཀྱེ་སེམས་དཔའ་ཆེན་པོ་ཉོན་ཅིག་།ང་ལས་བྱུང་བའི་སྟོན་པ་ལུང་སྟོན་གྱིས། །ང་ཡིས་བྱུང་བའི་ཆོས
51a6 ཉིད་མངོན་ཕྱུང་ལ། །ཏིང་འཛིན་མཚན་མ་ཡོད་མེད་སྒོར་ཞུགས་ནས། །ཆོས་ཉིད་གཅིག་ལ་བླང་དོར་བྱས་ནས་ནི། །ཡེ་ཤེས་དམ་ཚིག་སོ་སོར་བསྒོམས་ནས་ནི། །གྲོགས་པོ་དག་གིས་དངོས་གྲུབ་སྟེར་རེ་བ། །གཅིག་ལ་གཉིས་སུ་ལྟས་པའི་བསྒོམ་པ་ནོར། །
51a7 ངོ་བོ་གཅིག་ལ་གཉིས་ཀྱིས་ཐོབ་པ་མེད། །ཀྱེ་སེམས་དཔའ་ཆེན་པོ་ཉོན་ཅིག་།ང་ཡི་རང་བཞིན་མངོན་དུ་ཕྱུང་བ་ལ། །ཕུང་པོ་འབྱུང་བ་རྣམ་ཤེས་དབང་པོ་ཡུལ། །རང་རྒྱུད་དག་པ་རྡོ་རྗེ་ལྟར་བྱས་ཏེ། །བསྙེན་བསྒྲུབ་རྣམ་བཞི་ཆོ་ག་བསྒོམ་བྱས་ནས། །
iiif viewer powered by OpenSeadragon
