| e-texts navigator |
| Wylie |
48b1 རྒྱས་རྣམས། །རང་འབྱུང་སེམས་ཉིད་འདི་ལ་ནི། །སྔ་བར་འཆོས་པར་ལུང་མ་བསྟན། །ད་ལྟར་ཏིང་འཛིན་སེམས་མི་འཆོས། །མ་བཅོས་ལམ་དུ་ཞུགས་ནས་བྱོན། །ཇི་ལྟར་སྣང་བའི་ཆོས་རྣམས་ལ། །བྱང་ཆུབ་སེམས་སུ་མ་རྟོགས་ཏེ། །བཅོས
48b2 ཤིང་བསྒྲུབས་པས་འགྲུབ་མི་འགྱུར། །མ་རྟོགས་བཅོས་པས་གྲུབ་པར་བྱེད། །བསྐལ་པ་དུ་མའི་གྲངས་པ་གྲངས་ཀྱང་། །མི་རྩོལ་བདེ་བ་ཕྲད་མི་འགྱུར། །ཀྱེ་སྐུ་གསུམ་སེམས་ལས་མ་བཅོས་ཕྱིར། །སྐུ་གསུམ་སྟོན་པའི་མདོ་ལུང་ལས། །འཆོས་པར
48b3 བྱེད་པའི་དོན་འབྱུང་བ། །དེ་ནི་སྟོན་པ་སྐུ་གསུམ་ཡང་། །ཉིད་ཀྱི་སྟོན་པ་རང་བཞིན་སྟོན་པ་མིན། །དེ་བཞིན་འཆོས་པར་བྱེད་པ་ཡི། །སྟོན་པས་བདེན་ཚུལ་ཇི་བསྟན་ཡང་། །ངེས་ལུང་མ་ཡིན་དྲང་ལུང་ཡིན། །ཞེས་གསུངས་སོ། །བྱང་ཆུབ་ཀྱི་སེམས
48b4 ཀུན་བྱེད་རྒྱལ་པོ་ལས་བཅོས་སུ་མེད་པའི་ལེའུ་སྟེ་ཞེ་གཉིས་པའོ། ། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་ཆོས་ཐམས་ཅད་ཀྱི་སྟོན་པ་ཉིད་ཡིན་པར་ཞལ་གྱིས་བཞེས་པ་འདི་གསུངས་སོ། །ཀྱེ་སེམས་དཔའ་ཆེན་པོ་ཉོན་ཅིག་།ང་ནི
48b5 ཆོས་རྣམས་ཀུན་གྱི་སྟོན་པ་སྟེ། །ང་ཡི་རང་བཞིན་རྣམ་པ་གསུམ་ལས་ནི། །སྟོན་པ་ཡང་ནི་རྣམ་པ་གསུམ་དུ་བསྟན། །བསྟན་པ་ཡང་ནི་རྣམ་གསུམ་ང་ཡིས་བསྟན། །དེ་འཛིན་འཁོར་ཚོགས་གསུམ་ཡང་ང་ཡིས་བསྟན། །སྟོན་པ་གསུམ་ཡང་གང་དང་གང
48b6 ཞེ་ན། །ཆོས་ཀྱི་རང་བཞིན་སྟོན་པའི་སྟོན་པ་དང་། །ཆོས་ཀྱི་ངོ་བོ་སྟོན་པའི་སྟོན་པ་དང་། །དོན་གྱི་སྒྲ་ཚིག་སྟོན་པའི་སྟོན་པའོ། །ཆོས་ཀྱི་རང་བཞིན་སྟོན་པའི་སྟོན་པ་ནི། །སྐྱེ་བ་མེད་ལས་བྱིན་གྱིས་བརླབས་ཕྱུང་སྟེ། །ཇི་ལྟར་སྣང་བའི་ཆོས་རྣམས་ཐམས
48b7 ཅད་ཀུན། །ཆོས་ཀྱི་དེ་བཞིན་ཉིད་དུ་སྟོན་པར་བྱེད། །ཆོས་ཀྱི་ངོ་བོ་སྟོན་པའི་སྟོན་པ་ནི། །ཇི་ལྟར་སྣང་བའི་ཆོས་རྣམས་ཐམས་ཅད་ཀུན། །སྟོན་པ་ཉིད་ཀྱི་སྐུ་རུ་ཕྱུང་ནས་ནི། །ཆོས་ཀྱི་ངོ་བོར་དེ་ལས་མེད་པར་སྟོན། །ཆོས་ཀྱི་སྒྲ་ཚིག་སྟོན་པའི་སྟོན་པས་ནི། །
iiif viewer powered by OpenSeadragon
