| e-texts navigator |
| Wylie |
2b1 ཅད་ཆོས་ཉིད་དུ་ལྡན་པར་བྱ་བའི་ཕྱིར་ཐམས་ཅད་བསྡུས་ནས་ཐིག་ལེ་ཆེན་པོ་གཅིག་ཏུ་བཞུགས་སོ། །དེ་ནས་སེམས་དཔའ་དེ་ཉིད་ཀྱི་རང་བཞིན་ཐིག་ལེ་ཆེན་པོ་གཅིག་ཏུ་བཞུགས་པ་དེ་ལས་བྱུང་ནས། བྱང་ཆུབ་ཀྱི་སེམས་ཀུན་བྱེད་རྒྱལ་པོའི་སྤྱན་སྔར
2b2 དགའ་བའི་སེམས་ཀྱིས་དང་བའི་མདངས་ཕྱུང་སྟེ་འཁོད་པས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་སེམས་དཔའ་རྡོ་རྗེ་ལ་སྨྲས་པ། སེམས་དཔའ་རྡོ་རྗེ་ཨེ་མ་ཧོ། །དགའ་བའི་སེམས་སྐྱེས་ཨེ་མ་ཧོ། །དང་བའི་མདངས་ཕྱུང་ཨེ་མ་ཧོ། །ང་ལས
2b3 བྱུང་བ་ཨེ་མ་ཧོ། །ཞེས་གསུངས་པས། དེ་ནས་སེམས་དཔའ་རྡོ་རྗེས་ཞུས་པ། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས། །སྟོན་པ་ཉིད་ཀྱང་ཐིག་ལེ་སྤྲོས་མེད་དམ། །འཁོར་རྣམས་ཀུན་ཀྱང་ཐིག་ལེ་སྤྲོས་མེད་དམ། །བསྟན་པ་ཀུན
2b4 ཀྱང་ཐིག་ལེ་སྤྲོས་མེད་དམ། །དུས་དང་གནས་ཀྱང་ཐིག་ལེ་སྤྲོས་མེད་དམ། །ཐམས་ཅད་ཀུན་ཀྱང་ཐིག་ལེའི་རང་བཞིན་ན། །སྟོན་པའི་སྟོན་པས་ཅི་ཞིག་སྟོན་པར་མཛད། །འཁོར་དུ་འཁོར་བའི་དོན་ནི་ཅི་ལ་འཁོར། །འཁོར་ལ་བསྟན་པ་ཅི་ཞིག་སྟོན
2b5 པར་བྱེད། །དུས་དང་གནས་ནི་གཅིག་པ་ཇི་ལྟ་བུ་ཞེས་ཞུས་སོ། །དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སེམས་དཔའ་རྡོ་རྗེ་ལ་འདི་སྐད་ཅེས་གསུངས་སོ། །ཀྱེ་སེམས་དཔའ་ཆེན་པོ་ཡིད་སྒྲ་ལ་ཆུག་ཅིག་།ངས་དོན་སྒྲར་བཤད་ཀྱིས། ཀྱེ
2b6 སེམས་དཔའ་ཆེན་པོ། སེམས་ཉིད་ཀུན་བྱེད་རྒྱལ་པོ་ང་ཉིད་ནི། །ཆོས་རྣམས་ཐམས་ཅད་ཀུན་གྱི་སྙིང་པོ་སྟེ། །སྙིང་པོ་མ་སྤྲོས་ཡེ་ནས་ཐིག་ལེ་ཡིན། །ཐིག་ལེ་ཡེ་ནས་སྤྲོས་པ་མེད་པའི་དོན། །སྟོན་པ་དང་ནི་བསྟན་པ་འཁོར་དུས་གནས། །
2b7 ང་ལས་བྱུང་བས་ཡེ་ནས་ཐིག་ལེ་སྟེ། །ང་ཡི་རང་བཞིན་ཐིག་ལེ་བསྟན་པ་ཡིན། །ཞེས་གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་གླེང་གཞིའི་ལེའུ་སྟེ་དང་པོའོ།། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས
iiif viewer powered by OpenSeadragon
