| e-texts navigator |
| Wylie |
281a1 ཤེས་པར་བྱའོ། །སེམས་ནི་སྒྱུ་མའི་རང་བཞིན་ཏེ། །ཇི་ལྟར་བརྟགས་པ་དེ་ལྟར་སྣང་། །དེ་མ་ཐག་པར་མ་གྱུར་ཀྱང་། །དེ་ཉིད་གང་བརྟགས་དེ་ལྟར་སྣང་། །གདོས་བཅས་ཡུལ་ན་མི་སྣང་ཡང་། །ཡིད་གཟུགས་མངོན་ཤེས་ཀུན་མཁྱེན་སྣང་། །གང
281a2 བརྟགས་དེ་ལྟར་དེ་ལྟས་ནས། །མངོན་སུམ་གསལ་པོར་རེད་པར་འགྱུར། །ཡོད་མེད་ལེགས་ཉེས་རང་བཞིན་རྣམས། །ཆུ་ཁམས་རྟས་པ་ལྟ་བུར་ཟད། །ཐམས་ཅད་འདི་ཡིས་བྱེད་པར་འགྱུར། །དེས་ན་ཏིང་འཛིན་སེམས་ཉིད་གཙོ། །དཔེར་ན་རྒྱ་མཚོ་ནོར་ལེན་མི། །སྦྲུལ་དང
281a3 ཆུ་སྲིན་སྦྲང་མ་ལ། །སོགས་པ་གདུག་པའི་སྡུག་བསྔལ་ཀུན། །དཀའ་བས་ཉམས་སུ་བླངས་པ་འགྲུབ། །དེ་བཞིན་རྣལ་འབྱོར་རྣལ་ཚོལ་བ། །རྣམ་རྟོག་བྱིང་རྨུགས་འཕྱར་གཡེང་དགྲ། །གཞོམ་པར་དཀའ་བའི་ལས་འདི་དག་།ཉམས་སུ་བླངས་ན་བདེ་ཐོབ་རྙེད། །འདི་ནི
281a4 ཏིང་འཛིན་དམ་པ་ཡིན། །ཉམས་སུ་བླངས་པའི་བསླབ་པ་སྟེ། །སེམས་ཉིད་གོམས་པར་བྱ་བ་ལས། །འདྲིས་པར་བྱེད་པ་རབ་ཏུ་གཅེས། །གྲོགས་པོ་དག་དེ་དག་ནི་ཉམས་རྙེད་པ་ཉིད་དུ་ཤེས་པར་བྱའོ། །དེ་སྐད་ཅེས་སྨྲས་པས། དམན་པ་རྣམས་གང་གི་དགོངས་པ་དམ
281a5 པའི་ཉམ་དྲོད་རྙེད་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རྣལ་འབྱོར་དབང་སྒྱུར་གྱི་ལེའུ་ཞེས་བྱ་སྟེ་བདུན་ཅུ་གསུམ་པའོ།། །།དེ་ནས་ཡང་གསང་བ་པའི་བདག་པོ་དེས་དམན་པའི་ལུས་ཀྱི་སེམས་དཔའ་རྣམས་ལ་འདི་སྐད
281a6 ཅེས་སྨྲས་སོ། །གྲོགས་པོ་དག་གང་འདི་ལ་ཚེགས་ཆུང་བར་བྱ་བ་གང་ཞེ་ན། འདི་ལྟ་སྟེ། ཅི་ལ་ཡང་བྱ་བ་མེད་པ་ཉིད་དོ། །གང་ལ་བྱ་བ་མེད་པ་དེ་གང་ཞེ་ན། འདི་ལྟ་སྟེ། དེ་བཞིན་ཉིད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། སྔགས་ཀྱིས་ཡོངས་སུ་ཟིན་པའི་ནད་གང་ལའང
281a7 གནོད་པར་བྱེད་མི་ནུས། དེ་བཞིན་ཉིད་ཀྱིས་ཟིན་པ་ཡི། །དུག་གསུམ་དུག་ལྔས་གནོད་མི་འགྱུར། །དེ་བཞིན་ཉིད་ཀྱིས་མ་ཟིན་ན། །ལམ་གྱི་ཕྱོགས་རྣམས་ཀུན་སྤྱད་ཀྱང་། །བདེ་འགྲོ་ཙམ་དུ་ངེས་འབྱུང་གི། །གོ་འཕང་དམ་པར་ག་ལ་འགྱུར། །དེ་བཞིན་ཉིད་ཀྱིས་ཀུན
iiif viewer powered by OpenSeadragon
