| e-texts navigator |
| Wylie |
275b1 མཆོག་ཏུ། །མིང་གིས་མེད་དུ་མི་རུང་ངོ་། །ཇི་ལྟར་རོ་དག་གསེར་འགྱུར་དང་། །དེ་བཞིན་མེ་ཡིས་བསྲེགས་སྦྱངས་བཞིན། །དངོས་པོར་སྤྱོད་པ་ཇི་སྙེད་པ། །དེ་ཉིད་དམ་པ་ལ་མི་གཡོ། །དེ་ལ་སོགས་པ་མཐའ་ཡས་སྤྱོད། །དངོས་པོ་བཞི་ལ་གནས་སྤྱོད་པ། །རྡོ་རྗེ་སེམས
275b2 དཔའི་ཆོས་ཉིད་དེ། །སྤྱོད་པ་རྨད་འབྱུང་དམ་པ་ཡི། །ཇི་ལྟར་གླང་པོ་ཆུར་ཞུགས་པ། །ཐོགས་ཆགས་འཇིགས་པ་ཡོང་མེད་པར། །དགའ་བའི་ལོངས་སྤྱོད་བྲོད་ཚུལ་གྱིས། །མི་ལྡོག་ཕ་རོལ་ཕྱིན་པ་ལྟར། །རྣལ་འབྱོར་ངེས་པར་སྤྱོད་པ་ཡང་། །བརྟུལ་ཞུགས་རྒྱ་མཚོའི
275b3 ཆུར་འཇུག་པ། །རྩལ་ཆེན་སྦྱོང་བའི་བྲོད་ཚུལ་གྱིས། །ཐོགས་ཆགས་མེད་པར་ལ་དོར་བའོ། །སྤྱོད་པ་གང་བར་བྱ་བའི་ཐབས། །གོམས་པ་ཀློང་དུ་གྱུར་པ་གཅེས། །གྲོགས་པོ་དག་དེ་དག་ནི་ལ་དོར་བར་ཤེས་པར་བྱའོ། །སངས་རྒྱས་ཀུན་གྱི་དགོངས་པ་འདུས་པའི་མདོ
275b4 ཆེན་པོ་ལས་རྣལ་འབྱོར་སྤྱོད་འཇུག་གི་ལེའུ་ཞེས་བྱ་སྟེ་བདུན་ཅུ་གཅིག་པའོ། ། །།དེ་ནས་ཡང་གསང་བ་པའི་བདག་པོས་དམན་པ་རྣམས་ལ་སྨྲས་པ། ཀྱེ་གྲོགས་པོ་དག་གང་གིས་གཅད་པར་བྱ་བ་ནི་འདི་ལྟ་སྟེ། དགོངས་པ་དམ་པ་དེ་ཁོ་ན་ཉིད་དོ། །དེ་ཅིའི་ཕྱིར
275b5 ཞེ་ན། དགོངས་པ་དེ་ཁོ་ན་ཉིད་གཅིག་བསླབས་པས་བསམ་གྱིས་མི་ཁྱབ་པའི་ཆོས་ལ་བསླབས་པའོ། །དེ་ཁོ་ན་ཉིད་གཅིག་ལ་མཁས་ན་བསམ་གྱིས་མི་ཁྱབ་པ་ལ་མཁས་པའོ། །དེ་ཁོ་ན་ཉིད་དེ་ལ་གོམས་ན་བསམ་གྱིས་མི་ཁྱབ་པ་ལ་སྒོམ་པའོ། །དེ་ཁོ་ན
275b6 ཉིད་དེ་ལས་མ་འདས་ན་བསམ་གྱིས་མི་ཁྱབ་པའི་དམ་པ་བསྲུངས་པའོ། །དེ་ཁོ་ན་ཉིད་དེ་ལ་ཞུགས་ན་བསམ་གྱིས་མི་ཁྱབ་པའི་སྒོར་ཞུགས་པའོ། །དེ་ཁོ་ན་ཉིད་དེ་ལ་སྤྱོད་ན་བསམ་གྱིས་མི་ཁྱབ་པའི་ཡོ་བྱད་ལ་སྤྱོད་པའོ། །དེ་ཁོ་ན་ཉིད་མངོན་དུ་བྱས་ན་བསམ
275b7 གྱིས་མི་ཁྱབ་པའི་རྒྱ་མཚོ་སྙེད་བྱས་པའོ། །དེ་ཁོ་ན་ཉིད་དེ་མ་ནོར་བར་བསྟན་ན་ཆོས་ཀྱི་སྒོ་དཔག་ཏུ་མེད་པ་བསྟན་པའོ། །དེ་ཁོ་ན་ཉིད་དེ་ཕྱིན་ཅི་མ་ལོག་པར་ཐོས་ན་བསམ་གྱིས་མི་ཁྱབ་པའི་ཆོས་ཀྱི་སྒོ་ཐོས་པའོ། །དེ་ཁོ་ན་ཉིད་དེ་མངོན་དུ་གྱུར་ན། དཔག་ཏུ་མེད
iiif viewer powered by OpenSeadragon
