| e-texts navigator |
| Wylie |
272a1 སྣང་བ་ཆེ། །ཆོ་འཕྲུལ་ཆེན་པོ་སྣ་ཚོགས་ཆེ། །ཐབས་མཆོག་དཔག་གིས་མི་ལང་སྟེ། །ཆོས་ཀུན་མེ་དཔུང་འབར་བར་སྣང་། །དེ་ཉིད་ཡེ་ཤེས་གསལ་བའི་ཀློང་། །འབར་འཕྲོ་གསལ་བར་གྱུར་པ་ནི། །མུན་གསལ་དངོས་པོ་ཐམས་ཅད་བསྲེགས། །བདེ
272a2 ཆེན་དབྱིངས་སུ་ཀུན་རྫོགས་པར། །དཔའ་བོ་ཁྱོད་ཀྱིས་མཛད་པ་ལགས། །འབར་བ་ཆེན་པོ་ཨ་ལ་ལ། །གཟི་བརྗིད་ཟེར་འཕྲོ་ཨ་ལ་ལ། །མཐའ་ཡས་ཀུན་སྡུད་ཨ་ལ་ལ། །ཐམས་ཅད་སྲེག་བྱེད་ཨ་ལ་ལ། །ཟ་བྱེད་ཆེན་པོ་ཨ་ལ་ལ། །མཐའ་དང་དབུས་མེད་ཨ
272a3 ལ་ལ། །ཐུགས་རྗེ་བདེ་མཆོག་ཨ་ལ་ལ། །དབང་ཕྱུག་འཇིགས་བྱེད་ཨ་ལ་ལ། །གསང་མཆོག་རྨད་འབྱུང་བྱིན་བརླབས་ཀྱིས། །མེ་ཡི་རང་བཞིན་ཆེན་པོ་དག་།བདག་ཅག་རྣམས་ལ་བཤད་དུ་གསོལ། །དེ་སྐད་འདུས་པས་གསོལ་པ་ལས། །དེ་ཉིད་དགྱེས
272a4 པས་འདི་སྐད་དུ། །འདུས་པ་ཆེན་པོའི་རྣལ་འབྱོར་པ། །རྡོ་རྗེ་མེ་ཡི་རང་བཞིན་དག་།ངེས་པར་བཤད་ཀྱིས་གུས་པར་ཉོན། །ཁྱད་པར་བླ་མའི་ལམ་མཆོག་འདིས། །རྣལ་འབྱོར་ཐབས་སུ་བདེ་སྦྱར་བས། །རྒྱལ་བ་ཀུན་མཉེས་ཀུན་བསྲེགས་སྦྱངས། །དོན་གྲུབ
272a5 ལས་ཀྱི་མཆོག་ཏུ་སྦྱངས། །ཇི་བཞིན་པ་ཡི་ཧོམ་ཁུང་དུ། །ཇི་སྙེད་པ་ཡི་ཡམ་ཤིང་ལ། །དེ་བཞིན་ཉིད་ཀྱི་མེ་བྱུང་བས། །ཐམས་ཅད་ཐམས་ཅད་བསྲེགས་སྦྱངས་ཐིམ། །སྐྱེ་མེད་རྣམ་དག་ཧོམ་ཁུང་དུ། །སྐྱེ་བ་རྣམ་བཞིའི་ཡམ་ཤིང་ལ། །མ་སྐྱེས་སྤྲོས་བྲལ
272a6 མེ་བྱུང་བས། །མཚན་མའི་བག་ཆགས་བསྲེགས་སྦྱངས་ཐིམ། །བསམ་དུ་མེད་པའི་ཧོམ་ཁུང་དུ། །བསམ་གྱིས་མི་ཁྱབ་ཡམ་ཤིང་ལ། །འོད་དཔག་མེད་པའི་མེ་བྱུང་བས། །མཐའ་ཡས་རྡུལ་སྙེད་བསྲེགས་སྦྱངས་ཐིམ། །ཆོས་ཉིད་རྣམ་དག་ཧོམ་ཁུང་དུ། །ཆོས
272a7 ཅན་སྣ་ཚོགས་ཡམ་ཤིང་ལ། །སྟོང་ཉིད་ཡེ་ཤེས་མེ་འབར་བས། །དངོས་པོའི་བག་ཆགས་བསྲེགས་སྦྱངས་ཐིམ། །སེམས་ཉིད་རྣམ་དག་ཧོམ་ཁུང་དུ། །སེམས་ཅན་སྐྱེ་འགྲོ་ཡམ་ཤིང་ལ། །རང་འབྱུང་ཡེ་ཤེས་མེ་འབར་བས། །འཁོར་བའི་བག་ཆགས་བསྲེགས
iiif viewer powered by OpenSeadragon
