| e-texts navigator |
| Wylie |
252b1 ཡང་ཀུན་དུ་སྣང་། །ཡོངས་རྫོགས་དོན་དུ་མ་མཐོང་བར། །རྫོགས་སྤྱོད་ལོག་པའི་ལམ་པ་ཡིན། །གསང་ཆེན་ཐེག་པའི་ཚིག་དང་སྒྲ། །གཅིག་ལ་མི་གཅིག་སོ་སོར་སྣང་། །ངོ་བོ་ཉིད་ཀྱིས་རྣམ་པར་ཕྱེ། །གང་ཉིད་ངེས་པར་གྲོལ་བར་སྣང་། །ངེས་པར་ཟག་འབྱུང
252b2 རྩར་འདོད་ན། །དེ་དག་དེ་བཞིན་མ་བཅོས་པར། །ཡེ་ནས་སྟོང་ཉིད་རྟོག་མེད་པ། །ཡིན་པར་ངེས་པ་དེ་ཁོ་ནའོ། །དེ་དག་ཅི་ཕྱིར་རྩི་ཞེ་ན། །རྣལ་འབྱོར་ནད་ནི་རྣམ་རྟོག་སྟེ། །རྟག་པར་འཁོར་བའི་གཏིང་མཐར་འཆི། །རྟོག་པའི་རྩ་བ་ཕྱི་ནང་གི། །ཀུན་ནས་ཟག་པ
252b3 རྣམ་ལྔ་ཡིན། །དེ་ཀུན་དེ་བཞིན་ཉིད་སྟོང་དུ། །རྟོག་བྲལ་མུ་མཐའ་མེད་འབྱུང་བས། །ནད་གསོ་ཤི་བ་སློང་བའོ། །དམ་པ་མཆོག་དེས་དེ་བླན་པས། །མཚན་མར་ཞེན་ལས་དེ་འགྲོལ་ཏེ། །དེ་ཉིད་དེར་ངེས་རྙེད་གཞན་མིན། །དེ་ཉིད་ཆེ་མཆོག་སྨན་པར་འགྱུར། །
252b4 ལང་ཀའི་བདག་པོ་དེ་དག་ནི་ནད་གསོ་བར་བྱའོ་ཞེས་ངེས་པར་ཐོས་པ་རྣམ་པར་བགྲོས་པ་སྟེ་འདི་ལྟར་ངེས་པར་ཤེས་པར་བྱའོ། །གསང་བ་པའི་བདག་པོས་དེ་སྐད་ཅེས་སྨྲས་པས། ལང་ཀའི་བདག་པོ་ལ་སོགས་པ་དམན་པ་དམ་པ་རྣམས་མཚན་པའི་རྟོག་པ་ལས
252b5 ཡོངས་སུ་གྲོལ་བར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རང་འབྱུང་བདུད་རྩིའི་ལེའུ་སྟེ་དྲུག་ཅུ་ལྔ་པའོ།། །།ཁམ་པོ་བཅུ་པ་སྟེ་ཐ་མར་ཟུག་པ། དེ་ནས་ཡང་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས
252b6 དཔའ་རྣམས་ཀྱིས་གསང་བ་པའི་བདག་པོ་ལ་གསོལ་པ། ཀྱེ་གསང་བ་པའི་བདག་པོ་ཉིད་ཀྱི་རྒྱ་ཆེར་བགྲོས་པའི་གསང་བ་དམ་པ་འདི་ཇི་སྐད་དུ་བརྗོད་པར་བགྱི། མདོ་ནི་གང་དུ་འདུས་པ་ལགས། །དེ་སྐད་ཅེས་གསོལ་པ་ལས། གསང་བ་པའི་བདག་པོས་སྨྲས
252b7 པ། ཀྱེ་ལང་ཀའི་བདག་པོ་ཁོ་བོས་ཇི་ལྟ་བ་བཞིན་བགྲོས་པའི་གསང་བ་དམ་པ་འདི་ནི་བརྗོད་པའི་རྣམ་གྲངས་བརྒྱད་དུ་བརྗོད་པར་བྱའོ། །མདོ་ནི་བཅུར་འདུས་པར་ཤེས་པར་བྱའོ། །ལང་ཀའི་བདག་པོ་དེ་ལ་རྣམ་གྲངས་བརྒྱད་གང་ཞེ་ན། སངས་རྒྱས་ཀུན་གྱི
iiif viewer powered by OpenSeadragon
