| e-texts navigator |
| Wylie |
237b1 གྲགས། །བླ་མེད་མཆོག་ལ་དམ་པར་སྣང་། །གཅིག་གི་དོན་ལས་མ་གཡོས་ཀྱང་། །འདུལ་བའི་ངོ་ལ་སོ་སོར་གྲགས། །དེ་བཞིན་ཉིད་ལྡན་དམ་པ་སྟེ། །དེ་ལས་འདས་ན་ཚིག་པར་འགྱུར། །གཅིག་བསྲུངས་པས་ན་ཀུན་བསྲུངས་པའི། །དམ་པའི་དམ་ཚིག
237b2 ཆེན་པོ་འདི། །ཀུན་དང་འགལ་བར་མི་བྱ་ཞིང་། །གང་གི་དོན་དུ་འགྱུར་བར་བྱ། །གྲོགས་པོ་དག་དེ་དག་ནི་མི་འདའ་བའི་རང་བཞིན་དུ་ཤེས་པར་བྱའོ་ཞེས་ཐོས་པ་ཡོངས་སུ་བགྲོས་པའོ། །ཀྱེ་གྲོགས་པོ་དག་དེ་ལྟར་སྤྱོད་པའི་རང་བཞིན་གང་ཞེ་ན། འདི་ལྟ་སྟེ།
237b3 ལུས་དང་ངག་དང་ཡིད་གསུམ་གྱི། །མཐའ་གསུམ་ཡོངས་སུ་དག་རྫོགས་ན། །དམ་པའི་སྤྱོད་པ་ཡིན་པས་ན། །དམན་མིན་དམ་པའི་རིགས་ཤེས་བཤད། །རྡོ་རྗེ་ལུས་ཀྱི་སྤྱོད་པ་ནི། །ཕྱིན་པ་མེད་ལས་ལུས་མི་བཅོས། །གཅིག་པུ་ཉིད་པས་གཅིག་ཏུ་གནས། །
237b4 གླང་པོའི་ལྟ་སྟངས་ཇི་བཞིན་དང་། །དེ་བཞིན་རྣལ་མས་གནས་པར་བྱ། །གང་དུ་གནས་པས་རྟག་པར་གནས། །གནས་པ་དེ་ལ་ཆགས་མི་བྱ། །སྤྱོད་ལམ་རྣམ་བཞིར་གར་ལྡན་པ། །མ་བཅོས་རྣལ་མར་གནས་པར་བྱ། །གང་གིས་གདུང་བ་མི་ཉེན་པའི། །གནོད
237b5 པ་སྐྱོབ་པ་དག་ཙམ་ལས། །བཟང་དང་རྒྱན་ཕྱིར་བཅོས་མི་བྱ། །གང་དུ་ཇི་ལྟར་བདེ་ལྡན་སྦྱར། །རྡོ་རྗེ་སྔགས་ཀྱི་སྤྱོད་ཡུལ་ནི། །བྱ་བ་མེད་པའི་རྣལ་འབྱོར་པས། །མཆོད་རྟེན་དག་གི་ལས་མི་བྱ། །གླེགས་བམ་བཀླག་པར་མི་བྱ་ཞིང་། །གཟུགས་བརྙན་བརྩམ
237b6 པའི་ལས་མི་བྱ། །ལག་གི་ཕྱག་རྒྱ་མི་བཅིང་ཞིང་། །ངག་གི་བཟླས་པ་དེ་ལ་སྒྲིབ། །རྣལ་འབྱོར་ལུས་ཀྱི་ཕྱག་མི་བྱ། །རྙེད་དང་བཀུར་སྟི་བལྟ་མ་ཡིན། །ཁེ་ཕྱིར་མ་ཡིན་གྲགས་ཕྱིར་མིན། །ཅི་ཕྱིར་ཕྱི་རོལ་གཡེང་བ་དང་། །ཤིན་ཏུ་གཡེང་བ་ཡིན་པའི་ཕྱིར། །
237b7 དེ་ལ་ཉེ་བ་མ་ཡིན་པས། །ལུས་འདི་རྣལ་མས་གནས་པར་བྱའོ། །རྣལ་འབྱོར་ངེས་པའི་བསམ་གཏན་པས། །རྡོ་རྗེ་སྔགས་ཀྱི་ཁ་ཟས་ནི། །ལུས་ཟུངས་འཛིན་པའི་རྟེན་ཙམ་དུ། །གར་ལྡན་འབྱོར་ལྡན་མ་གཏོགས་པ། །ཟས་ཕྱིར་ཆེད་དུ་བསྒྲུབ་མི་བྱ། །
iiif viewer powered by OpenSeadragon
