| e-texts navigator |
| Wylie |
222b1 དེ་ཉིད་རྙེད་པ་ཉིད་ལས་བྱུང་། །ཀུན་བརྟགས་ཀུན་ཉིད་དབེན་ན་སྣང་། །ཀུན་ལ་སྦྱོར་བས་དོན་བྱེད་ནུས། །ཐེ་ཚོམ་ཆད་པས་མཐུན་པར་སྣང་། །མདོར་ན་གསུམ་ཉིད་ཁོ་ན་ལ། །ལར་ན་གཉིས་ཉིད་ཁོ་ནར་ཟད། །ངེས་པར་གཅིག་ལས་མེད་པ་ཡིན། །ཐམས་ཅད
222b2 འདིར་འདུས་འདི་ལས་བྱུང་། །ཀུན་གྱི་རྩ་བ་འདི་ཤེས་ན། །ཀུན་ཀྱང་མ་བཅོས་ཇི་བཞིན་པ། །དེ་བཞིན་ཉིད་དེ་ཀུན་གྱི་མདོ། །སྒྱུ་མར་ཀུན་སྣང་དངོས་གཞི་མེད། །ཆགས་པ་མེད་པས་ཡིད་མི་འཁྲུག་།ནམ་མཁའི་ངང་ལ་རང་བཞིན་མེད། །བརྟག་ཏུ
222b3 མེད་པས་དངོས་དང་བྲལ། །སྙིང་པོ་ཉིད་ལས་གཞན་པ་མེད། །སྣ་ཚོགས་དག་གི་རྒྱུན་དུ་འཆར། །སྒྲོན་མར་སྣང་བས་མུན་པ་སེལ། །ཡིད་བཞིན་ནོར་བུ་ཉིད་ལས་བྱུང་། །སྐྱེ་འགག་མེད་པས་འཇིགས་དང་བྲལ། །ཅིར་ཡང་མ་ངེས་ཉམ་མི་ང་། །ཆུབ་ན
222b4 བྱ་བརྩལ་ཀུན་དང་བྲལ། །གོ་བའི་ཡུལ་ན་བགྲོད་པ་མེད། །དེ་ཉིད་ཆེན་པོའི་ཚིག་རེ་རེར། །རྒྱལ་བ་ཀུན་གྱི་དགོངས་པ་བརྒྱུད། །གཞན་དུ་རྩ་བ་གསུམ་བཅད་ཀྱང་། །གསང་བའི་དོན་ཉིད་ཉིད་ལས་འབྱུང་། །གང་ཞིག་གཞན་དུ་གང་ཚོལ་བ། །དེ་ནི་གོལ
222b5 བའི་ལམ་དུ་ཞུགས། །རྣམ་རྟོག་མུན་པའི་སྒྲིབ་པས་བསྒྲིབས། །གང་མ་རིག་པ་དེ་བསྒྲིབས་ཡིན། །རྣམ་པར་རྟོག་པ་དེ་ཉིད་བགེགས། །བགེགས་ནི་དེ་ཉིད་དེ་ལས་བྱུང་། །གང་ལ་རྣམ་རྟོག་མ་བྱུང་ན། །བདུད་ཅེས་བྱ་བ་ག་ལ་ཡོད། །བདུད་ནི་གང
222b6 ལས་བྱུང་ཞེ་ན། །རྟག་ཏུ་འགྲུས་ལས་བྱུང་བ་ཡིན། །འགྲུས་མེད་ཉིད་ལས་བདུད་མི་འབྱུང་། །ཅི་ཕྱིར་མི་འགྲུས་དེ་ཉིད་བདུད། །དེ་བཞིན་སྐྱོན་དང་གོལ་སྒྲིབ་ནི། །ཡོན་ཏན་མཉམ་དུ་མཐོང་ལས་འབྱུང་། །གལ་ཏེ་ཡོན་ཏན་མཉམ་མཐོང་མེད། །སྐྱོན་དང
222b7 གོལ་སྒྲིབ་ག་ལ་ཡོད། །དེ་ཉིད་སྐྱོན་དང་གོལ་སྒྲིབ་ཡིན། །གང་ཉིད་མངོན་དུ་མ་གྱུར་ན། །གསང་བའི་དོན་བྱུང་གང་བསྲེལ་ཡང་། །ནད་པ་སྨན་སྲེལ་ཐབས་མེད་བཞིན། །ངེས་པའི་ཐབས་མེད་གནས་ངན་འཁྱམ། །ཡུལ་དང་མཚན་མ་དངོས་པོ་དང་། །དྲན
iiif viewer powered by OpenSeadragon
