| e-texts navigator |
| Wylie |
206b1 ནའོ། །མཐོང་བ་མངོན་ཐོས་རྣམ་གཉིས་ལ། །མཐར་ཕྱིན་དམ་པ་མངོན་སུམ་པ། །བློ་གྲོས་རྣལ་འབྱོར་སྤྱོད་ཡོན་ཅན། །ཐོས་པས་མཐོང་བར་འགྱུར་ཕྱིར་རོ། །སྟུག་པོ་བཀོད་པའི་རྒྱལ་བ་ཡང་། །ཆོས་སྐུ་སྙིང་པོར་གྱུར་པས་ན། །དེ་ཡི་འགྲོ་བ་མི་སྨིན་ཕྱིར། །
206b2 གཟུགས་སྐུ་བསྟན་ནས་ཚིག་ལམ་བརྗོད། །འདས་དང་མ་འོངས་ད་ལྟར་གྱི། །དཔག་ཏུ་མེད་པའི་དུས་རྣམས་སུ། །རྒྱལ་བ་རྣམས་ཀྱི་དགོངས་པ་གང་། །ཇི་ལྟར་རྣམ་པར་བགྲོས་པ་ཉོན། །ལང་ཀའི་བདག་པོ་འདི་ལྟ་སྟེ། །དམ་པ་རྣམས་ཀྱི་དགོངས་པ་ལ་འཇུག
206b3 པར་འདོད་ན་མཛོད་དུ་འཇུག་པར་བྱའོ། །རང་བཞིན་མ་བཅོས་པར་བྱའོ། །ལྗོན་ཤིང་བསྐྱེད་པར་བྱའོ། །དམ་པར་འཇུག་པར་བྱའོ། །སྒྲོན་མ་བསྲེལ་བར་བྱའོ། །ཁྱད་པར་དུ་འགྲོ་བར་བྱའོ། །ཡུལ་ལ་འཇུག་པར་བྱའོ། །མེ་ལོང་བརྟག་པར་བྱའོ། །མཐུན་པར་འཇུག་པར
206b4 བྱའོ། །ནད་གསོ་བར་བྱའོ། །སྨྲས་པ། གསང་བ་པའི་བདག་པོ་ཆོས་ཀྱི་རྣམ་གྲངས་བཅུ་པོ་དེ་དག་ཇི་ལྟར་ཡོངས་སུ་ཤེས་པར་བགྱི། སྨྲས་པ། ལང་ཀའི་བདག་པོ་ཆོས་ཀྱི་རྣམ་གྲངས་བཅུ་པོ་དེ་དག་ལས་དང་པོ་དམ་པ་རྣམས་ཀྱི་མཛོད་དུ་འཇུག་པར་བྱ་ན་སྒོ་གསུམ
206b5 ནས་ཞུགས་པས་གང་མེད་ལ་མི་ཟད་པའི་མཛོད་དུ་འཇུག་པ་ཉིད་དོ། །སྨྲས་པ། གསང་བ་པའི་བདག་པོ་སྒོ་གསུམ་གང་ལགས། སྨྲས་པ། ལང་ཀའི་བདག་པོ་སྒོ་གསུམ་འདི་ལྟ་སྟེ། སྤྱོད་པས་འདྲེན་པའི་སྒོ་དང་། ཐབས་ཀྱི་སྦྱོར་སྒོ་དང་། ངེས་པའི་གསང་སྒོ
206b6 དང་གསུམ་མོ། །སྨྲས་པ། གསང་བ་པའི་བདག་པོ་སྒོ་དེ་དག་གང་གིས་འབྱེད་པ་ལགས། སྨྲས་པ། ལང་ཀའི་བདག་པོ་སྒོ་དེ་དག་ནི་ལྡེ་མིག་གསུམ་གྱིས་འབྱེད་པར་རིག་པར་བྱ་སྟེ། གསུམ་གང་ཞེ་ན། འདི་ལྟ་སྟེ། འབྱེད་པ་དང་། འགྲོལ་བ་དང་། འབྱིན་པའོ། །
206b7 ལང་ཀའི་བདག་པོ་དེ་ཡང་འདི་ལྟ་སྟེ། ཡན་ལག་དྲུག་དང་། མདོ་བཞི་དང་། རྩ་བ་གསུམ་གྱི་ལྡེ་མིག་གིས། །རྒྱལ་བ་ཀུན་གྱི་དགོངས་པའི་མཛོད། །ངེས་པར་འབྱེད་ཅེས་རྒྱལ་བས་བཤད། །ལང་ཀའི་བདག་པོ་དེ་ལ་སྤྱོད་པའི་འདྲེན་སྒོ་ལྡེ་མིག་གསུམ་གྱིས
iiif viewer powered by OpenSeadragon
