| e-texts navigator |
| Wylie |
194b1 ཏེ། །ཡོན་ཏན་སྒྲ་བསྒྲགས་སུས་ཐོས་པ། །མིང་ཙམ་གྱིས་ཀྱང་བདེ་ཐོབ་ཅིང་། །དྲན་པས་ངན་འགྲོ་ལས་སྐྱོབ་ཡིན། །དེ་ཡང་ཇི་ལྟ་བུ་ཞེ་ན། །ཤིན་ཏུ་གསང་བའི་སྙིང་པོ་འདི། །མ་བྱུང་བ་ཡི་སྔོན་དུས་ན། །ལྷ་གནས་གསུམ་དུ་གྲགས་པ
194b2 ལས། །ལྷ་ཡི་བུ་ནི་འོད་ལྡན་ཏེ། །མི་རྟག་འཆི་བའི་དུས་བབ་ནས། །སྔོན་བྱུང་སྔ་ལྟས་བྱུང་བ་ན། །མི་བདེ་བར་ནི་འདུ་ཤེས་གྱུར། །མ་འོངས་འདུ་ཤེས་བཞག་པ་ལས། །མི་གཙང་ཟས་ཀྱིས་འཚོ་བ་ཡི། །སྲོག་ཆགས་བླུན་པའི་ལུས
194b3 ལེན་པར། །རང་གི་མངོན་པར་ཤེས་པས་མཐོང་། །ཤིན་ཏུ་སྐྲག་པའི་འདུ་ཤེས་ཀྱིས། །སྐྱབས་ཀྱི་ཡུལ་ནི་ཡིད་ལ་བྱས། །གང་དེར་གང་དྲན་མ་བྱུང་བར། །ཐེག་ཆེན་གསང་བའི་སྙིང་པོའི་མཚན། །ཚིག་གི་ལམ་དུ་གྲགས་པ་བཞིན། །ཐོས
194b4 པ་ཡིད་ལ་བྱས་པ་ཡིས། །ངན་འགྲོར་འགྲོ་ལས་སླར་ལོག་སྟེ། །བདེ་བ་ཆེན་པོའི་གནས་སུ་འཁོད། །དེ་འདྲའི་ཚུལ་བྱུང་དེ་བཞིན་སྤྱོད། །གཞན་ཡང་གསང་བའི་བདག་པོ་ཉོན། །ཐེག་ཆེན་གསང་བར་རབ་ངེས་ན། །རྣམ་སྨིན་དྲག་པོས་གར
194b5 འཕངས་ཀྱང་། །ཇི་ལྟར་ཕོ་ལོང་བརྡབས་པ་བཞིན། །འཕེན་འགྲོ་དོན་གྱིས་དེར་མི་གནས། །ཅི་ཕྱིར་ཐམས་ཅད་སྟོང་ཉིད་པས། །སྡུག་བསྔལ་གནས་སུ་བཅས་དེ་ཡང་། །སེམས་ཅན་བཅས་ཏེ་སྟོང་པའི་ཕྱིར། །རེག་འགྱུར་མྱོང་བར་འགྱུར་མ
194b6 ཡིན། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །དམིགས་པ་ཅན་གྱི་རྣལ་འབྱོར་པ། །ཐེག་ཆེན་ཟབ་མོའི་ཚིག་ཐོས་པས། །ཤིན་ཏུ་སྐྲག་ཅིང་དངང་འགྱུར་ཏེ། །སྐུར་བཏབ་རྒྱབ་ཕྱོགས་སྙིང་རལ་ནས། །ངུ་འབོད་གནས་ལྟུང་མ་མྱོང
194b7 བར། །བདེ་འགྲོ་ཐར་པའི་གནས་སུ་ཐོན། །དེ་འདྲའི་ཚུལ་བྱུང་ཤེས་པར་གྱིས། །རྒྱལ་བ་རྣམས་ཀྱི་གསང་འདི་ལ། །གང་དགའ་གང་ཞིག་འདུན་སྐྱེད་པ། །གཞན་གྱི་བར་ཆད་མི་འབྱུང་བར། །ཇི་ལྟར་མོས་པ་དེ་མྱུར་ཐོབ། །དེ་ཡང་ཇི་ལྟ་བུ་ཞེ་ན། །
iiif viewer powered by OpenSeadragon
