| e-texts navigator |
| Wylie |
190b1 གང་ཞིག་བཏུང་བའི་ཆུ་འདོད་པ། །སྨིག་རྒྱུ་བསྙགས་པས་ཚིམ་མེད་ལྟར། །དམན་པ་དམ་པར་སྨིན་འདོད་པ། །མཉམ་ལ་དམན་སྤྱོད་འགྱུར་མ་ཡིན། །སྦྲུལ་འབྲས་ཁྱུང་གིས་བརྣོས་འགྱུར་ཡང་། །ཕྱིན་ཅི་ལོག་འགྱུར་མི་སྲིད་པས། །དེ་ཉིད་ཁོ་ནར་སྣང་བ
190b2 བཞིན། །དམན་པ་དམ་པར་འགྱུར་མི་སྲིད། །གང་གི་གསང་བ་ལས་ལོག་པའི། །གང་འདིར་ལོག་སྤྱོད་དམན་པ་དག་།ཐམས་ཅད་རང་བཞིན་མེད་སྟོང་པས། །ཉོན་མོངས་བྱང་ཆུབ་སྟོང་མཉམ་ཟེར། །འཚོ་བའི་སྨན་དང་འཆི་བའི་དུག་།འབྱུང་བས་བསྐྱེད་པར
190b3 རྒྱུ་གཅིག་ཀྱང་། །འཚོ་དང་འཆི་བར་བྱེད་པའི་མཐུ། །དེ་ཉིད་མི་མཐུན་སོ་སོར་སྣང་། །དེས་ན་གང་འདིར་ལ་ལ་ཞིག་།འབྱུང་བས་བསྐྱོད་པས་གཅིག་མཉམ་ཞེས། །དུག་ཀྱང་ཟ་ཞིང་བཏུང་ངམ་ཅི། །དེ་བཞིན་དམ་པ་དམན་པའི་ལས། །རང་བཞིན་མེད་པར་དོན
190b4 གཅིག་ཀྱང་། །མཉམ་ཞེས་དམ་པ་ཉིད་བཞག་ཅིང་། །དམན་པ་ཆེད་དུ་སྤྱོད་དམ་ཅི། །དེས་ན་དམ་པ་དམན་པ་དང་། །གཙང་དང་མི་གཙང་ཆེ་ཆུང་གཉིས། །བཟང་ངན་བདེ་སྡུག་ལ་སོགས་དང་། །བསྟི་གནས་སྤྱད་བྱར་སྙོམས་མེད་པ། །མཉམ་སྦྱོར་རྟགས་སྤྱོད
190b5 ཡིན་ཞེ་ན། །དུག་དང་ཁ་ཟས་བདེ་སྡུག་རྣམས། །མི་མཉམ་མཉམ་པར་ག་ལ་སྙོམས། །མ་བཅོས་མཉམ་པའི་ཆོས་ཉིད་ལ། །གློ་བུར་ལས་ཀྱིས་མི་མཉམ་སྟེ། །ནམ་མཁའ་དྲི་མེད་ཡེ་ནས་གསལ། །དག་པར་བྱ་ཕྱིར་འཁྲུ་འདོད་འདྲའོ། །གང་དུ་ནད་རྣམས
190b6 འཇོམས་པའི་སྨན། །ནད་མེད་རྣམས་ཀྱི་དུག་ཏུ་འགྱུར། །ལྟ་ལོག་འཇིག་རྟེན་དྲང་བའི་ཐབས། །རྣལ་མར་སྤྱོད་ན་ཉེས་པར་ངེས། །མཐུན་འཇུག་སྤྱོད་པ་དྲང་བའི་ཐབས། །གང་གི་དབང་དུ་སྤྱོད་བྱེད་པ། །གང་སྟོབས་རིག་དང་ལྡན་པ་ཡིས། །མི་མཐུན་བཅོས
190b7 ནས་མཐུན་འགྱུར་བཞིན། །ཚིག་མཐུན་དོན་ལྡན་དམ་པ་ཡིས། །ཇི་ལྟར་རིགས་པ་དེ་ལྟར་ངེས། །ཇི་ལྟར་ཞུམ་པས་ཁེ་བརྐམ་གྱི། །གྲགས་པ་འདོད་ཕྱིར་གདེང་མེད་པར། །གཡུལ་ཞུགས་སྟོབས་རིག་འགྲན་བཟླས་ན། །གཞན་དབང་དེ་ཉིད་བརླག་པར་འགྱུར། །
iiif viewer powered by OpenSeadragon
