| e-texts navigator |
| Wylie |
179b1 ཡི་གེ་གཞན་གྱི་རང་བཞིན་དུ་མི་འགྱུར་ལ། ཡི་གེ་གང་གིས་ཡི་གེ་གང་དག་གི་རང་བཞིན་རྣམ་གྲངས་སུ་མཚོན་པར་མི་ནུས་སོ། །ལང་ཀའི་བདག་པོ་དེ་ལ་གང་གི་རང་བཞིན་གང་དུ་མི་འགྱུར་བ་ནི་འདི་ལྟ་སྟེ། ཨའི་རང་བཞིན་སྐྱེ་བ་མེད་པ་ཡིན
179b2 ལ། དེ་ནི་ཨ་འབའ་ཞིག་ལས་མ་གཏོགས་པ་ཡི་གེ་གཞན་གང་གིས་ཀྱང་སྐྱེ་བ་མེད་པའི་རང་བཞིན་ཤེས་པར་འགྱུར་བ་མ་ཡིན་ནོ། །དེ་བཞིན་དུ་ཀའི་རང་བཞིན་བྱེད་པ་ཡིན་ལ་བྱེད་པ་ནི་ཀ་འབའ་ཞིག་ལས་མ་གཏོགས་པ་ཡི་གེ་གཞན་གང
179b3 གིས་ཀྱང་བྱེད་པར་ཤེས་པར་འགྱུར་བ་མ་ཡིན་ནོ། །ལང་ཀའི་བདག་པོ་དེ་ལྟར་ན་མིང་དུ་བཏགས་པ་གང་ཞིག་ལ་དངོས་གཞི་གང་ཡིན་པ་དེ་མིང་གི་རྣམ་གྲངས་གཞན་བརྗོད་པས་ཀྱང་ཤེས་པར་རུང་བ་ནི་ཡོད་མོད་ཀྱི། ཡི་གེ་ནི་ཤེས་པར་མི་རུང
179b4 བའི་ཕྱིར་ཡི་གེའི་རང་བཞིན་ནི་མི་འགྱུར་བ་ཁོ་ནར་ཤེས་པར་བྱའོ། །ལང་ཀའི་བདག་པོ་དེ་ལ་ཡི་གེའི་སྒྲ་གང་ཞེ་ན། འདི་ལྟ་སྟེ། རང་བཞིན་གྱི་སྒྲ་དང་། བསྒྱུར་བའི་སྒྲ་དང་། སྦྱར་བའི་སྒྲ་དང་། དྲངས་པའི་སྒྲའོ། །དེ་ལ་རང་བཞིན་གྱི་སྒྲ་གང
179b5 ཞེ་ན། འདི་ལྟ་སྟེ། ཡི་གེ་གང་ལ་དབྱིབས་དང་། ཁ་དོག་དང་། སྐད་དང་། བརྡ་ཐ་དད་ཀྱང་ཨ་དང་ཀ་ལ་སོགས་པའི་མིང་དུ་བཏགས་པའི་སྒྲ་ཇི་ལྟ་བ་དེ་ཁོ་ན་ཉིད་ལྟར་གྲགས་པའོ། །བསྒྱུར་བའི་སྒྲ་གང་ཞེ་ན། འདི་ལྟ་སྟེ། ཡི་གེ་གང་དང
179b6 གང་དུ་བསྒྱུར་བའི་སྒྲ་དེས་དོན་དང་ཚིག་ཐ་དད་པར་འགྱུར་བའོ། །སྦྱར་བའི་སྒྲ་གང་ཞེ་ན། འདི་ལྟ་སྟེ། དབྱིབས་གང་དང་གང་ལ་ཡི་གེ་གང་དང་གང་གི་གཟུགས་སུ་སྦྱར་བས་དེ་དང་དེའི་དོན་འབྱུང་བ་གང་ཡིན་པའོ། །དྲངས་པའི་སྒྲ་གང་ཞེ་ན། འདི་ལྟ་སྟེ།
179b7 ཡི་གེ་གང་དང་གང་ལས་ཚིག་གང་ལྟར་དྲངས་པའི་སྒྲ་དེ་དང་དེ་ལས་དོན་གང་འབྱུང་བ་གང་ཡིན་པའོ། །ལང་ཀའི་བདག་པོ་འདི་ལ་ཡི་གེའི་ལས་གང་ཞེ་ན། འདི་ལྟ་སྟེ། གང་དུ་སྤེལ་བ་དང་། གང་ཤེས་པར་བྱེད་པ་ཉིད་དོ། །གང་དུ་སྤེལ་བ་ནི་འདི་ལྟ་སྟེ།
iiif viewer powered by OpenSeadragon
