| e-texts navigator |
| Wylie |
113b1 མ་ཆག་སྙམ་མོ། །དེ་ནས་སྐྱེས་བུ་དམ་པ་དེ་རྣམས་ཀྱིས་བཅོམ་ལྡན་འདས་དེ་ཁོ་ན་ཉིད་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་སྔགས་དམ་པ་དེ་ཁོ་ན་ཉིད་དེ་ནི་གང་ཡོངས་སུ་བརྗོད་པ་ལས་འདས་ཏེ་གསུང་བར་མི་མངའ་བས་བསྟན
113b2 ཅིང་བརྟག་པར་རབ་ཏུ་དཀའ་བ་ལགས་ཞེ་ན། འོན་ཀྱང་བཅོམ་ལྡན་འདས་ཉིད་ནི་བློ་གྲོས་ཆེན་པོ་རྣམས་ཀྱི་ཡུལ་དུ་ངེས་ཤིང་ཐེ་ཚོམ་ཐམས་ཅད་གཅོད་པ། དམ་པ་རྣམས་ཀྱི་དམ་པ་ཉིད་ལགས་པས་ན་བདག་ཅག་གིས་བློ་གྲོས་ངེས་པར་ཆུབ་པ་དམ་པའི
113b3 ཕྱོགས་དགོངས་པ་དམ་པའི་མཉམ་པ་ཉིད་དུ་བསྟན་དུ་གསོལ་ཞེས་གསོལ་པ་ལས། བཅོམ་ལྡན་འདས་དེ་ཁོ་ན་ཉིད་དེས་བཀའ་སྩལ་པ། སྐྱེས་བུ་དམ་པ་རྣམས་ལེགས་སོ། །ངེས་སོ། །འདི་ལྟ་སྟེ། གསང་སྔགས་དམ་པ་དེ་ཁོ་ན་ཉིད་དེ་ནི་དཔྱོད་པ
113b4 ཐམས་ཅད་དང་བྲལ་བ། མཐའ་དང་དབུས་མི་དམིགས་པ། སྒྲོ་སྐུར་མེད་པ། བླང་དོར་མེད་པ། རྒྱུ་འབྲས་ལས་འདས་པ། ཡེ་ནས་དག་པ། ཡེ་ནས་ཟིན་པ། བྱ་བ་མེད་པ། བཙལ་བ་མེད་པ། བསྒྲུབ་ཏུ་མེད་པ། བརྩམ་དུ་མེད་པ།
113b5 གཞན་ནས་མི་འབྱུང་བ། གཉེན་པོ་མེད་པ། བྱེད་པ་པོ་མེད་པ། མ་བྱས་པ། མ་བརྟགས་པ། བདག་མེད་པ། མ་བཅོས་པ། མ་བསླད་པ། དེ་ཡིན་པར་ངེས་པ། མ་ནོར་བ། ཇི་བཞིན་པ། མ་འགགས་པ། མ་སྐྱེས་པ། མི་ནུབ་པ།
113b6 མི་རླག་པ། མི་སྣང་བ། མ་བྱུང་བ། མི་འགྲོ་བ། ཡེ་ནས་གནས་པ། ཀུན་ལ་ཁྱབ་པ། མིང་མེད་པ། གཟུགས་མེད་པ། མཚན་མ་མེད་པ། ཐ་སྙད་མེད་པ། བལྟར་མེད་པ། གཟུང་དུ་མེད་པ། མཚོན་དུ་མེད་པ། དཔེ་མེད་པ། ཚད
113b7 མེད་པ། བརྟག་ཏུ་མེད་པ། རྟོག་གེ་ལས་འདས་པ། དཔག་ཏུ་མེད་པ། བསམ་དུ་མེད་པ། བསམ་གྱིས་མི་ཁྱབ་པ། ཀུན་གྱི་འབྱུང་གནས། ཐམས་ཅད་ནས་ཐམས་ཅད་དུ་བཏང་སྙོམས་ཆེན་པོ་སྟོང་པ་ཉིད་རང་གི་རིག་པ་རང་བྱུང་བ་ཁོ་ནའོ། །
iiif viewer powered by OpenSeadragon
