| e-texts navigator |
| Wylie |
220b1 ནས་མོད་ལ་ལྟུང་བར་འགྱུར། །བག་མེད་དམ་ཚིག་ཉམས་པ་ཡིས། །ལྟུང་ངམ་ལྟུང་བར་གྱུར་ཀྱང་རུང་། །རིག་རྒྱལ་ཉིད་ཀྱིས་བཟླས་ན་ནི། །དེ་ནས་མོད་ལ་ལྡང་བར་འགྱུར། །ནམ་མཁའ་གཟུགས་མེད་པ་ལ་ཡང་། །རབ་ཏུ་གྲུབ་པ་ལྷ་མིག་ཅན། །རང་གི
220b2 ལས་རྣམས་རིག་འགྱུར་ཏེ། །རྣལ་འབྱོར་ཅན་རྣམས་འགྲོ་བ་བཞིན། །དེ་བས་སྔོན་ཆད་སྤྲུལ་པ་ཡིས། །ལམ་ནས་འགྲོ་དང་འོང་བར་འགྱུར། །བསོད་ནམས་དབང་གིས་གནས་ཀྱི་ཕྱིར། །ཁྱིམ་ཡང་ཅི་ལྟར་འདོད་པ་འབྱུང་། །ཀུན་ནས་ལྗོན་ཤིང་མང་པོས་བརྒྱན། །
220b3 སྣ་ཚོགས་བྱ་རྣམས་འཕུར་ཞིང་ལྡིང་། །ལྷ་ཡི་བུ་མོ་རྒྱུ་བ་ཡི། །རྒྱན་གྱི་སྒྲ་ནི་སིལ་ཁྲོལ་ཅན། །དེ་ཡི་གླུ་གར་སིལ་སྙན་གྱིས། །མངོན་པར་དགའ་བའི་ཡོན་ཏན་གསལ། །མེ་ཏོག་བཟང་པོ་གསུམ་གྱིས་ཁྱབ། །མར་མེའི་འོད་ནི་རབ་ཏུ་གསལ། །གང
220b4 དང་གང་དུ་ཀུན་བརྟགས་པ། །དེར་ཡང་དཔག་བསམ་ལྗོན་ཤིང་ཆེ། །འདོད་པ་ཐམས་ཅད་འབྱོར་པ་ཡི། །རྨད་དུ་བྱུང་བའི་མཚན་ཉིད་འབྱུང་། །རིན་ཆེན་རྡོ་ལེབ་ངལ་བསོའི་ཕྱིར། །ནོར་བུའི་གཞི་ལས་འབབ་ཆུ་ཅན། །ས་གཞི་ནེའུ་གསིང་གིས་བརྒྱན་པ། །
220b5 ཐམས་ཅད་དུ་ཡང་མངོན་པར་འབྱུང་། །རྒྱན་རྣམས་དང་ནི་གོས་རྣམས་དང་། །རྩེད་མོ་རྣམས་ཀྱི་ཆ་བྱད་དང་། །བདུད་རྩི་ལ་སོགས་འབྲས་ལྡན་པའི། །དཔལ་གྱི་ཤིང་ཡང་དེ་ལས་བྱུང་། །དེ་ལྟར་གྲུབ་པ་འདོད་པ་རྣམས། །ཅི་ལྟར་འདོད་པ་ཐམས་ཅད་འགྲུབ། །གྲུབ
220b6 པར་གྱུར་ནས་དེ་ནས་ནི། །བསྲུང་བའི་ཕྱིར་ནི་འབད་པ་བྱ། །དབེན་པའི་སྐྱེད་མོས་ཚལ་དག་གམ། །རི་རྣམས་ཀྱི་ནི་རྩེ་མོའམ། །རྒྱ་མཚོ་ཡི་ནི་གླིང་དག་གམ། །མཚོ་ཆེན་དག་གི་གླིང་མའང་རུང་། །རང་འཕྲུལ་སྤྲུལ་པ་ལས་བྱུང་བ། །གྲུབ་པར་དགའ་ཕྱིར
220b7 སྤྱོད་པར་བྱེད། །གྲུབ་པ་གཞན་དང་ལྷན་ཅིག་ཏུ། །སྔོན་གྲུབ་པ་ཡི་གནས་སུའང་རུང་། །དེ་ལྟར་གྲུབ་པ་བྱས་ན་ཡང་། །གལ་ཏེ་གྲུབ་པར་མ་གྱུར་ན། །རྫས་དེས་བསྲུངས་ཏེ་བཞག་པའམ། །ཆོ་ག་བཞིན་དུ་གནས་པར་བྱ། །སྔོན་དུ་བསྙེན་པ་ཅི་ལས
iiif viewer powered by OpenSeadragon
