| e-texts navigator |
| Wylie |
96a1 བྱས་ནས་བཟླས་པར་བྱའོ། །དེ་ནས་རང་གི་ལྷའི་བཟླས་པ་བརྩམ་པར་བྱ་སྟེ་མྱུར་དུ་དངོས་གྲུབ་ཏུ་འགྱུར་རོ། །བཟླས་པའི་མཐར་ཡང་བགེགས་རྣམས་སྲིད་པ་གཞན་དུ་འགྱུར་རོ། །རྟག་ཏུ་བཟླས་པས་ཀྱང་ནད་མེད་པར་འགྱུར་རོ། །ཉེ་བར་འཚེ་བ་ཐམས་ཅད་དང་བྲལ་བ
96a2 དང་། རིང་དུ་འཚོ་བར་བྱེད་དོ། །བདེ་བ་ཡང་སོ་སོར་རྙེད་དོ། །སྲད་བུས་བདག་ཉིད་སྲུང་ཞིང་ཕྱིར་བཟློག་པ་ལ་སོགས་པ་རྣམས་ཀྱང་ངོ་། །དེ་ནས་འདིའི་ཕྱག་རྒྱ་ཉིད་ནི་སྒྲོལ་མ་ཐམས་ཅད་ཀྱི་སྤྱིའི་རྩ་བའི་ཕྱག་རྒྱ་སྟེ། དེ་ཉིད་སྡིགས་མཛུབ་བཅིངས་ནས་འཁྱིལ་བའི་རྣམ
96a3 པར་བྱ་སྟེ་མཐེ་བོང་ཟུང་ཡང་ཀུན་ཏུ་བཙིར་བ་ནི་གོས་དཀར་མོའི་ཕྱག་རྒྱའོ། །འདི་ཡང་ཕྱག་རྒྱའི་སྒྲུབ་ཐབས་ཀྱི་རིག་པ་མཉམ་པར་འགྲོ་མ་གདོན་མི་ཟ་བ་སྟེ་དང་པོར་ཞབས་ལ་ཕྱག་བྱས་ཏེ། དེ་ནས་ལས་ཐམས་ཅད་བྱའོ། །ཡང་རྟོག་པའི་རྒྱལ་པོའི་དབང་པོ་ཆེན་པོ་འདིར
96a4 འཕགས་མ་སྒྲོལ་མ་དང་། སྒྲོལ་མ་ཐམས་ཅད་ཀྱི་སྒྲུབ་པ་མངོན་པར་མཛེས་པ་ཐམས་ཅད་དང་། སྲུང་བ་དང་། ཉེས་པ་བྱས་པ་ཐམས་ཅད་ཟློག་པར་བྱེད་པ། འཕགས་མ་སྒྲོལ་མ་ཐམས་ཅད་ཀྱི་རྟོག་པའི་ཆོ་ག་རབ་ཏུ་སྦྱོར་བ་སྒྲུབ་ནུས་པར་འགྱུར་ཏེ། དེ་ཡང་གང་ཞེ་ན།
96a5 ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཙནྡྲེ་ཙནྡྲ་མ་ཏི་སཱུ་རྱེ། སཱུརྱ་མ་ཏི། གྷུ་ནི་གྷུ་ན། ལ་ལ། ལེ་ལེ། སཱུ་ཏེ་སཱུ་ཏ་ནི། སིདྡྷི་སིདྡྷི། པ་རཱ་ཀྲ་མེ་སྭཱ་ཧཱ། ཨ་མི་ཏཱ་བྷཱ་སུ་ཏཱ་སྭཱ་ཧཱ། སརྦེ་ཥཾ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ་སྭཱ་ཧཱ།
96a6 འདི་ཡང་འཕགས་པ་བཟང་པོ་ཞེས་བྱ་བ་འཕགས་མ་སྒྲོལ་མའི་རིག་པ་ཆེན་མོ་ཉེ་བར་འཚེ་བ་ཐམས་ཅད་འཇོམས་པར་བྱེད་པའོ། །གང་འདི་སྒྲོལ་མའི་རྟོག་པའི་ཆོ་ག་རབ་འབྱམ་སྤྱོད་པ་དང་། སྒྲུབ་ཐབས་དང་། ཕྱག་རྒྱའི་ཆོ་ག་ལ་སོགས་པ་དེ་ཐམས་ཅད་འཕགས་མ་སྒྲོལ
96a7 མའི་ཟླ་བས་བསྒྲུབ་པར་བྱའོ། །ཞེས་ཀུན་ཏུ་རྟོགས་པར་བྱའོ། །རྟོག་པ་གཞན་གྱི་ཆོ་གས་ཀྱང་སྒྲུབ་པར་བྱེད་དོ། །རྟོག་པ་མེད་པས་ཀྱང་མངོན་སྤྱོད་ཀྱི་ལས་འདི་བྱེད་དེ། ཕྱག་འཚལ་བའི་ཡི་གེ་སྤངས་ནས། རིག་པ་འབའ་ཞིག་གི་སྭཱ་ཧཱའི་གནས་སུ་ཧཱུ~ཾ་ཕཊ་སྦྱིན་པར་བྱའོ། །
iiif viewer powered by OpenSeadragon
