| e-texts navigator |
| Wylie |
5b1 སྦྲང་རྩི་དང་མར་གྱིས་བཏགས་པའི་པདྨ་སྟོང་ཕྲག་བརྒྱར་སྦྱིན་སྲེག་བྱའོ། །མཐར་ཉིན་མཚན་དུ་སྨྱུང་བར་གནས་པ་སྟེ། དཔག་ཏུ་མེད་པ་བཟླས་པས་དངོས་གྲུབ་ཀྱི་མཚན་མ་རས་རིས་རབ་ཏུ་འགུལ་ན་ས་ཆེན་པོའི་བདག་པོར་འགྱུར་རོ། །མི་འགུལ་ན་ཡུལ
5b2 གྱི་བདག་པོར་འགྱུར་རོ། །རྟག་ཏུ་བཟླས་པས་གཏེར་མཐོང་བར་འགྱུར་རོ། །རས་རིས་ཀྱི་སྤྱན་སྔར་པདྨ་འབུམ་ཕྲག་བཅུ་དབུལ་བར་བྱ་སྟེ་གྲོང་རྙེད་དོ། །སྟོང་ཕྲག་སུམ་ཅུ་དབུལ་བར་བྱ་སྟེ་གྲོང་ལྔ་རྙེད་པར་འགྱུར་རོ། །རིག་པའི་རྒྱལ་པོའི་སྦྱོར་བས་རྟག་ཏུ
5b3 འདོད་ཅིང་དྲན་པར་བྱེད་ན་དེ་དབུལ་བར་མི་འགྱུར་རོ། །བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་འཛིན་ལས་ངེས་པར་བྱུང་བའི་འཇུག་པར་བྱེད་བཞིན་པ་རིག་པའི་རྒྱལ་པོ་ཆེན་པོ་ཡོངས་སུ་རྫོགས
5b4 སོ། ། །།དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ་སྒོམ་བཞིན་པས་བཅོམ་ལྡན་འདས་ལ་རྟོག་པའི་རྒྱལ་པོ་ཆེན་པོ་ཡི་གེ་བཅུ་པ་ཞེས་བྱ་བའི་རིག་པའི
5b5 རྒྱལ་པོ་ཆེན་པོར་དོན་ཆེན་པོ་རྨད་དུ་བྱུང་བ་སངས་རྒྱས་བྱེ་བ་ཕྲག་བཅུས་རྗེས་སུ་ཡི་རང་བར་མཛད་པ། ཕྲ་མོ་ཐམས་ཅད་སེལ་བར་བྱེད་པ། སེམས་ཅན་ཐམས་ཅད་སྲུང་བར་བྱེད་པའི་སྔགས་ཀྱི་རྒྱལ་པོ་ཆེན་པོ་གསུངས་པར་གྱུར་ཏོ། །ན་མོ་རཏྣ་ཏྲ་ཡཱ་ཡ།
5b6 ན་མ་ཨཱརྱ་ཨ་བ་ལོ་ཀི་ཏེ་ཤྭ་ར་ཡ། བོ་དྷི་སཏྭཱ་ཡ། །མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀ་ཡ། ཏདྱ་ཐཱ། ཨོ~ཾ་གྷཊྚ་ནི་ཕུ་མ་ཏ་ན་སྭཱ་ཧཱ། འདི་ནི་མཐུ་ཆེན་པོ་ཐོབ་པ་ཡི་གེ་བཅུ་པ་ཞེས་བྱ་བའི་རིག་པའི་རྒྱལ་པོ་ཆེན་པོ་ཐོགས་པ་མེད་པ་ལས་ཐམས་ཅད་པ། སངས་རྒྱས་བྱེ
5b7 བ་ཕྲག་བཅུས་གནང་བ། མངོན་པར་མཛེས་པ་སྲུང་བ་ལ། རྟག་པ་ཁོ་ནར་མཆོད་པ་བྱའོ། །དེ་ནས་འདི་སྒྲུབ་པའི་མཆོད་པར་འགྱུར་ཏེ། རིང་བསྲེལ་དང་བཅས་པའི་མཆོད་རྟེན་ལ་ཇི་ལྟར་འབྱོར་པའི་མཆོད་པ་བྱས་ནས་འདི་ཉིད་ཀྱི་དྲི་དང་བདུག་པ་ལ་སོགས་ཕུལ་ནས
iiif viewer powered by OpenSeadragon
