| e-texts navigator |
| Wylie |
47a1 སྤྱན་རས་གཟིགས་དབང་ཕྱུག་དང་ལྷན་ཅིག་ཏུ་ལྷ་མོ་སྒྲོལ་མ་མཐོང་བར་བྱེད་དོ། །མཆོག་གང་སློང་པ་རྒྱལ་སྲིད་དམ། མི་སྣང་བའམ། ཕུག་ཏུ་འཇུག་པའམ། གཏེར་འཕོ་བའམ། ཡུལ་གྱི་བདག་པོ་ཡང་རུང་སྟེ། གང་བསླངས་པ་དེ་རྙེད་ཅིང་རྟག་ཏུ
47a2 རྙེད་དོ། །མ་བསྒྲུབས་པར་ཡང་རིག་པས་གཏན་ལ་འགེམས་པར་བྱེད་པ་དང་། རྡུལ་དུ་བྱེད་པ་དང་། གནོན་པར་བྱེད་པ་དང་། འབྱིན་པ་དང་། མཚོན་ཆ་འཆང་བ་དང་། ཕུག་གི་འཁྲུལ་འཁོར་ཐམས་ཅད་འགེམས་པར་བྱེད་པ་ལ་བདག་ཉིད་བསྲུང་བ་བྱས་ཏེ། གཡུལ
47a3 དུ་མངོན་པར་ཞུགས་ན་རྣམ་པར་རྒྱལ་བར་བྱེད་དོ། །གཞན་སྲུང་ན་གྲུབ་པའི་བྱ་བ་ཐམས་ཅད་བྱེད་དོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། པོ་དྷི་སཏྭཱ་ཡ། མ་ཧཱ་སཏྭཱ་ཡ། ཏ་དྱ་ཐཱ། ཏཱ་རེ་ཏཱ་རེ་སྭཱ་ཧཱ། རིག་པ་འདིས་ཟླ་བ་གཟས་བཟུང་བའི་དུས
47a4 སུ་མཚན་མོ་གསུམ་དུ་སྨྱུང་བར་གནས་པ་སྔོན་དུ་བསྙེན་པ་བྱས་པའམ། བསྙེན་པ་མ་བྱས་པ་ཡང་རུང་སྟེ། རིང་བསྲེལ་དང་བཅས་པའི་མཆོད་རྟེན་དུ་བྱང་ཆུབ་ཤིང་གི་ཡམ་ཤིང་གིས་མེ་སྦར་ནས་སྣ་མའི་མེ་ཏོག་དཀར་པོའི་སྦྱིན་སྲེག་སྟོང་ཕྲག་བརྒྱད་བྱས་ན་དངུལ་སྟོང་ཕྲག་བརྒྱ
47a5 རྙེད་དེ་ཡང་ན་མཐོང་ངོ་། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཏདྱ་ཐཱ། ཏཱ་རེ། ཏུ་ཏྟཱ་རེ་ཏུ་རེ་སྭཱ་ཧཱ། རིག་པ་འདིས་དཀར་པོའི་ཕྱོགས་ཀྱི་ཚེས་གཅིག་ནས་བརྩམས་ནས་སྔར་བརྗོད་པའི་བྲིས་སྐུའི་མཆོག་བྱ་སྟེ་མཐར་ཟླ་བ་ཉ་བ་ལ་དྲི་དང་།
47a6 བདུག་པ་དང་གཏོར་མ་དང་། མེ་ཏོག་རྣམས་ཕུལ་ནས་ཐུན་གསུམ་དུ་སྟོང་ཕྲག་བརྒྱད་བཟླས་པར་བྱའོ། །མཚན་མོ་གསུམ་དུ་སྨྱུང་བར་གནས་ཏེ་འོ་མ་ཅན་གྱི་ཡམ་ཤིང་གིས་མེ་སྦར་ནས་ཨུཏྤལ་སྔོན་པོ་ལ་ཞོ་དང་། སྦྲང་རྩི་དང་། མར་གྱིས་བཏགས་པའི་སྦྱིན་སྲེག་སྟོང་ཕྲག
47a7 བརྒྱད་བྱའོ། །དེ་ནས་ནམ་མཁའ་ལ་གྲུབ་བོ་གྲུབ་བོ་ཞེས་པའི་སྒྲ་འབྱུང་ངོ་། །ཡང་ན་རས་རིས་གཡོ་བར་བྱེད་དོ། །དེ་ལྟ་བུས་ནི་གྲུབ་པར་འགྱུར་ཏེ། ཡུལ་དང་གྲོང་དང་གྲོང་ཁྱེར་རམ་རྒྱལ་སྲིད་ཀྱི་དབང་ཕྱུག་སོ་སོར་རྙེད་དོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ
iiif viewer powered by OpenSeadragon
