| e-texts navigator |
| Wylie |
39a1 དུ་ཡང་རུང་སྟེ་གཙང་མའི་ཕྱོགས་སུ་གཟུགས་བརྙན་གྱི་སྤྱན་སྔར་འོ་མ་དང་ནས་ཟན་བཟའ་བའམ། རིག་པ་སོ་སོར་སྒྲུབ་པའི་སྟོན་མོའི་བཟའ་བ་ཡོངས་སུ་སྤངས་ལ་མཆོད་པ་ཡོངས་སུ་རྫོགས་པས་གསོ་སྦྱོང་ལ་གནས་པའམ། གསོ་སྦྱོང་ལ་མི
39a2 གནས་པར་ཡང་རུང་སྟེ་འབུམ་ཕྲག་ཕྱེད་དང་གསུམ་བཟླས་པར་བྱའོ། །སྔོན་སྤྱད་པ་བྱས་པར་འགྱུར་རོ། །མཆོད་པ་བྱས་ནས་བསྙེན་པ་ཡང་ས་གའི་ཉ་འམ་ཆོ་འཕྲུལ་གྱི་ཕྱོགས་ཀྱི་ཉ་ལ་མཆོད་པ་བྱས་ནས་སྟོང་ཕྲག་བརྒྱད་བཟླས་པར་བྱའོ། །སྙིང་པོ་སྒྲུབ་པར་འགྱུར་རོ། །དེ
39a3 ནས་ལས་རྣམས་སུ་འགྱུར་ཏེ། ཆོ་འཕྲུལ་གྱི་ཕྱོགས་ཀྱི་ཉ་ལ་ཨ་ག་རུའི་ཡམ་ཤིང་ཞོ་དང་སྦྲང་རྩི་དང་མར་ལས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱའོ། །མེ་ཏོག་སྟོང་ཕྲག་བརྒྱད་རྣམས་ཀྱིས་བཅོམ་ལྡན་འདས་མཐོང་བར་འགྱུར་རོ། །མེ་ཏོག་སྟོང་ཕྲག་བརྒྱད་པོ་རྣམས
39a4 ཀྱིས་གཟུགས་བརྙན་ལ་བསྣུན་པར་བྱའོ། །ཡང་ན་སླར་ཡང་མཚན་མོ་ཐམས་ཅད་དུ་བཟླས་ན་བཅོམ་ལྡན་འདས་མཐོང་བར་འགྱུར་རོ། །དེ་ནས་མཐོང་ན་དོང་ཙེ་ལྔ་རྟག་ཏུ་རྙེད་དོ། །མཚན་མོ་བདུན་དུ་ཐུན་མཚམས་གསུམ་དུ་མར་གྱིས་བཏགས་པའི་སྦྱིན་སྲེག་སྟོང
39a5 ཕྲག་བརྒྱད་བྱས་ན་རྒྱལ་པོ་དབང་དུ་འགྱུར་རོ། །མྱོས་བྱེད་ཀྱི་ཤིང་ལ་གཟུགས་བརྙན་བྱས་ནས་རྒྱན་ཐམས་ཅད་ཀྱིས་རྣམ་པར་བརྒྱན་ལ། རྒྱལ་པོའི་ཡམ་ཤིང་གིས་མེ་སྦར་ནས་ཐུར་མས་རྐང་པ་ཕུག་སྟེ་ཐུན་མཚམས་གསུམ་དུ་བརྒྱད་བརྒྱར་སྦྱིན་སྲེག་བྱས་ན་ཉི་མ་གཉིས་པ
39a6 ལ་རྐང་པ་དག་གིས་འོང་བར་བྱེད་དོ། །མྱ་ངན་མེད་པའི་ཤིང་གིས་སོར་མོ་དྲུག་པའི་ཤ་ལ་བྷཉྫི་ཀ་བྱས་ནས་རིའི་རྩེ་མོར་གནས་ཏེ་འོ་མ་དང་ནས་ཟན་བཟའ་ཞིང་འབུམ་ཕྲག་གསུམ་བཟླས་པར་བྱའོ། །མཐར་ཟླ་བ་ཉ་ལ་མཆོད་པ་བྱ་སྟེ་མཚན་མོ་གསུམ་སྨྱུང་བར་གནས
39a7 པས་རིང་བསྲེལ་དང་བཅས་པའི་མཆོད་རྟེན་དུ་ཨ་ཤྭཏྠའི་འདབ་མར་བཞག་སྟེ་ཇི་སྲིད་འོངས་པ་དེ་སྲིད་བཟླས་པར་བྱའོ། །ལེགས་པར་འོངས་སམ་ཞེས་བརྗོད་པར་བྱ་ཞིང་མཆོག་སྦྱིན་པར་བྱའོ་ཞེས་ཟེར་ན་ཆུང་མའམ་སྲིང་མོ་འམ་གྲོགས་མོའང་རུང་སྟེ། བདག་ཉིད་དང
iiif viewer powered by OpenSeadragon
