| e-texts navigator |
| Wylie |
254b1 སྡོད་ཀྱི་བར། །ལྷ་མིན་བུ་མོ་རྣམས་དང་རྩེ། །དེ་རྣམས་ཀྱིས་བསྟན་ལམ་ནས་ནི། །ཅི་བདེ་བར་ནི་ངེས་པར་འདོང་། །ལྷ་མིན་གྲོང་དུ་བདེ་བར་འགྲོ། །ཇི་ལྟར་བདེ་བར་སླར་ཡང་འོང་། །གང་དག་དེར་ནི་སྔོན་སོང་བ། །རྡོ་རྗེ་ས་འོག་གིས་གཟིར་བས། །གལ་ཏེ་འོངས
254b2 པར་མ་གྱུར་ན། །དེར་ནི་རྨོངས་ནས་འཆི་བར་འགྱུར། །དེས་ན་སྔོན་རྒྱུ་ཞུགས་རྣམས་ལ། །བློ་གྲོས་ལྡན་པས་གཟིར་མི་བྱ། །འཕགས་པ་རྡོ་རྗེ་ས་འོག་གི་རྒྱུད་ལས་དཔལ་གྱི་སྒོར་འཇུག་པའི་ལེའུ་སྟེ་ལྔ་པའོ།། །།དེ་ནས་དཔལ་གྱི་སྒོའི་རྟོགས་པ་བརྗོད་པའི
254b3 རིམ་པར་ཕྱེ་བར་གྱུར་པ་ནི། དཔལ་གྱི་སྒོ་ཡི་ཕྱིར་གནས་པའི། །མཚན་ཉིད་མཐོང་ནས་ཤེས་པ་ཡིས། །སྨྲ་སྤངས་སློང་བ་ཟ་བ་དང་། །འཁྲུག་པ་མེད་པའི་སེམས་ལྡན་པས། །བློ་གྲོས་ཅན་གྱིས་འབུམ་ཕྲག་གསུམ། །དཔལ་གྱི་སྒོ་ལ་བརྟེན་ཏེ་བཟླས། །འབུམ་ཕྲག
254b4 དང་པོ་བཟླས་པ་ཡིས། །འཁྲུལ་འཁོར་རྣམས་ནི་ལྟུང་བར་འགྱུར། །གཉིས་པ་ཡིས་ནི་ས་གཡོ་ཞིང་། །དུ་བ་ཆེན་པོ་འཁྲུག་པར་འགྱུར། །གསུམ་པ་ཡིས་ནི་དྲོ་ལྡན་པའི། །རྒྱན་དང་སྐེ་རགས་གྲོལ་བ་ཡིས། །ལྷ་མིན་བུ་མོ་ངེས་པར་འོང་། །ཁྲོ་བོ་མེ་ཡིས་བསྲོས
254b5 པ་ན། །བསྐལ་པའི་མེ་སྙམ་སེམས་པ་ཡིས། །ཅ་ཅོ་འདོན་ཞིང་རྣམ་པར་འབྲོས། །དེར་ནི་ཞི་བར་བྱ་དོན་དུ། །ཙནྡན་ལྡན་མར་སྦྱིན་སྲེག་གིས། །དེ་ཡི་ལུས་ནི་རྣལ་མར་གནས། །བསམ་པ་ཐག་པས་འདུད་པར་འགྱུར། །དཔལ་གྱི་སྒོ་དེར་ནོར་རྣམས་དང་། །རལ
254b6 གྲི་ལྡོང་རོས་མིག་ལ་སོགས། །དངུལ་ཆུ་བཅུད་ལེན་བཟང་པོ་དང་། །བུད་མེད་སྟོང་ཕྲག་བརྒྱ་རྣམས་གནས། །བདག་གི་བདག་པོ་ཁྱོད་ཀྱིས་མཛོད། །མཐོ་རིས་ས་འོག་བཟང་པོ་སྟེ། །གལ་ཏེ་དེར་ནི་མི་འཇུག་ནའང་། །ཇི་ལྟར་བཞེད་པ་དེ་བཞིན་མཛོད། །རལ་གྲི་གྲུབ་པའི
254b7 མིག་སྨན་སོགས། །དེ་ཡི་མདུན་དུ་བཞག་ནས་ཀྱང་། །རྡོ་རྗེ་ཁྲ་བོས་གཟིར་བས་ན། །ཡིད་ལ་གཅགས་བཞིན་སྟེར་བར་འགྱུར། །ཇི་ལྟར་འདོད་པ་དེ་བཟུང་སྟེ། །དེ་ནི་བཏང་བ་ཉིད་དུ་བྱ། །དེར་ནི་དཀྱིལ་འཁོར་བསྡུ་བྱས་ཏེ། །ལྷ་དག་མཉེས་པར་བྱས་ནས་སུ། །
iiif viewer powered by OpenSeadragon
