| e-texts navigator |
| Wylie |
240a1 ལྡན་དང་། དུས་ཀྱི་མུ་ཁྱུད་དང་། གཞན་ལེན་དང་། དབྱིག་ཟའོ། །ནུབ་ཀྱི་སྒོར་འཁྲུལ་འཁོར་བརྒྱ་རྩ་བརྒྱད་གཞག་པར་བྱའོ། །དེ་ཡང་བརྒྱད་རྣམ་པ་དང་བཅས་པ་བྲི་སྟེ། སྲད་བུ་དང་། གྲི་གུག་དང་། བུད་མེད་དང་། སེང་གེ་དང་། ལུག་དང་། མདའ་དང
240a2 བཅས་པའི་གཞུ་དང་། ཆུ་རྒྱུན་དང་། སྦྱིན་དང་། འོད་ལི་དང་། བདག་ཉིད་ཀྱི་འཁྲུལ་འཁོར་རྣམས་སོ། །བྱང་གི་སྒོར་བུ་ག་བརྒྱད་རྣམ་པ་དང་བཅས་པ་བྲི་སྟེ་དེ་ཡང་ལུག་གི་རྣམ་པ་དང་། ཆུ་སྲིན་གྱི་རྣམ་པ་དང་། གླང་པོའི་གདོང་གི་རྣམ་པ་དང་། ལྟོ་འཕྱེའི་རྣམ་པ་དང་། བྱི་བའི་རྣམ་པ་དང་།
240a3 མིའི་གདོང་གི་རྣམ་པ་དང་། དཀྱིལ་འཁོར་གྱི་རྣམ་པ་དང་། མ་བྱས་པའི་གདོང་གི་རྣམ་པའོ། །སྟེགས་བུའི་མཚམས་རྣམས་སུ་སྒོ་བྲལ་བཞི་བྲི་བར་བྱའོ། །མེའི་ཕྱོགས་སུ་མེའི་ཐབ་ཁུང་ངོ་། །བདེན་བྲལ་དུ་བདུག་སྤོས་ཀྱི་ཐབ་ཁུང་ངོ་། །རླུང་གི་མཚམས་རྣམས་སུ་ཆུའི་ཐབ་ཁུང་ངོ་། །
240a4 དབང་ལྡན་དུ་རུས་སྦལ་གཞག་པར་བྱའོ། །དེ་ནས་དྲི་ཐམས་ཅད་དང་། མེ་ཏོག་ཐམས་ཅད་དང་། བདུག་པ་ཐམས་ཅད་དང་། འབྱུང་པོ་ཐམས་ཅད་པའི་གཏོར་མ་དང་མཆོད་པ་སྦྱིན་པར་བྱའོ། །དེ་ནས་སྐྱེས་བུ་དཔའ་བོ་དག་གིས་དྲི་ཞིམ་པོས་ཡན་ལག་བྱུགས་ལ་ཤིན་ཏུ་ཕྲ་བའི་རས་ཀྱིས
240a5 གདོང་གཡོག་ཏུ་བསྲུང་བ་བྱས་ལ་འཁྲུལ་འཁོར་གྱི་བླ་མའི་བྱ་བ་བྱས་ལ་འཇུག་པར་བྱའོ། །སྤྱན་དང་བ་དང་གཤེགས་སུ་གསོལ་བ་ལ་སོགས་པའི་སྒོ་ནས་སོ། །འདིར་རྡུལ་ཚོན་གྱིས་བྲིས་པའི་དཀྱིལ་འཁོར་བསྟན་པར་བྱའོ། །དེ་ལྟ་བུའི་དཀྱིལ་འཁོར་མཐོང་བའི་སྐྱེས་བུ་དཔའ་བོ་དེ་ལ་བླ་མས་རྗེས
240a6 སུ་གནང་བ་བྱིན་ལ་དམ་ཚིག་ཤེས་པས་འཁྲུལ་འཁོར་གྱི་བླ་མའི་ཕྱག་རྒྱའམ། ལྷ་མ་ཡིན་གྱི་ཕྱག་རྒྱ་བཅིངས་པས་དབང་དུ་བྱེད་པར་འགྱུར་རོ། །ལྷ་མ་ཡིན་གྱི་ཆུང་མ་དང་ཁྱིམ་རྣམས་སུ་འཇུག་པར་འགྱུར་རོ། །གཞན་ལེན་གྱིས་བྱས་པའི་འཁྲུལ་འཁོར་ཐམས་ཅད་ལས་ཁྱད་པར་དུ
240a7 འཕགས་པའི་རྫས་རྣམས་དབང་དུ་འགྱུར་རོ། །བཅོམ་ལྡན་འདས་རྡོ་རྗེ་འཛིན་པ་རྡོ་རྗེ་ཁྲོ་བོའི་རྒྱལ་པོ་རྡོ་རྗེས་འོག་གི་དམ་ཚིག་གི་དཀྱིལ་འཁོར་གྱི་ལེའུ་སྟེ་དང་པོའོ།། །།དེ་ནས་གཞན་ཡང་ཕྱག་རྒྱ་དང་སྔགས་སུ་གྱུར་པ་ནི་སོར་མོ་ཕན་ཚུན་ཁུ་ཚུར་དུ་བྱས་ལ་མཐེ་བོ་སྦྲུལ་མགོའི་རྣམ
iiif viewer powered by OpenSeadragon
