| e-texts navigator |
| Wylie |
23b1 དཔའ་ཐམས་ཅད་ཀྱིས་ཕྱག་བྱ་བའི་འོས་སུ་གྱུར་པ་ལྷ་རྣམས་ཀྱིས་ཀྱང་བསྟོད་པར་བྱ་བཞིན་པ། རིག་པ་འཛིན་པའི་རྒྱལ་པོ་རྣམས་ཀྱིས་ཀྱང་མཆོད་པར་བྱ་བཞིན་པ། རིག་པ་འཛིན་པ་བྱེ་བ་ཕྲག་བརྒྱས་ཡོངས་སུ་བསྐོར་ནས་འགྲོ་སྟེ་བདེ་བ་ཅན་གྱི་འཇིག་རྟེན་གྱི་ཁམས་སུ་སྐད
23b2 ཅིག་ཐང་ཅིག་ཡུད་ཙམ་ཞིག་ལ་སངས་རྒྱས་ཀྱི་ཞིང་བདུན་འདའ་བར་བྱེད་དོ། །རང་གི་འདོད་པས་སྐྱེ་བ་འཛིན་པར་བྱེད་ཅིང་རང་གི་འདོད་པས་འཆི་བར་བྱེད་དོ། །ཡང་དག་པར་རྫོགས་པའི་སངས་རྒྱས་འོད་སྲུང་ལ་རྣམ་པར་གནོན་པ་ཞེས་བྱ་བའི་རིག་པ་འཛིན་པའི་རྒྱལ་པོ་ཡོད
23b3 དེ། དེས་ལས་འདི་བསྒྲུབས་པའོ། །བཅོམ་ལྡན་འདས་མ་རིག་པའི་རྒྱལ་མོ་ཆེན་པོའི་ལེའུ་དང་པོ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་སྤྱན་རས་གཟིགས་དབང་ཕྱུག་ལ་དགའ་བས་ཆོ་ག་སྨྲས་པ། རི་མོ་མཁན
23b4 གསོ་སྦྱོང་ལ་གནས་པས་བཅོམ་ལྡན་འདས་ཀྱི་གཟུགས་བརྙན་འདྲིར་གཞུག་པར་བྱ་སྟེ། གསེར་ལྟར་སེར་བ། ཆོས་སྟོན་པར་མཛད་བཞིན་པ། གཡས་སུ་འཕགས་པ་སྤྱན་རས་གཟིགས་དབང་ཕྱུག་སྟོན་ཀའི་སྤྲིན་ལྟར་དཀར་བ། དམ་པར་བྱས་པ་དམར་སེར་མཆོད་ཕྱིར
23b5 ཐོགས་དཀར་པོ་དར་ལའི་སྟོད་གཡོགས་དང་། སྨད་གཡོགས་ཅན། ཕྱག་ན་ཤིང་གི་དབྱུག་པ་བསྣམས་པའོ། །གཡོན་དུ་རྡོ་རྗེ་འཆང་སྔོ་བསངས་རྣམ་པར་རྒྱན་དང་བཅས་པ་ཕྱག་གཡོན་པས་ཁྲོ་བོའི་རྡོ་རྗེ་འཕྱར་བཞིན་པའོ། །རྡོ་རྗེ་འཆང་གི་ཉེ་ལོགས་སུ་རྡོ་རྗེ་ལྕགས
23b6 ཀྱུ་མ་དང་རྡོ་རྗེ་ཁུ་ཚུར་མ་འདྲིར་གཞུག་པར་བྱའོ། །འཕགས་པ་སྤྱན་རས་གཟིགས་ཀྱི་ཉེ་ལོགས་སུ་བཅོམ་ལྡན་འདས་མའི་སྙིང་པོ་མཉམ་པར་འགྲོ་མ་འདྲིར་གཞུག་པར་བྱ་སྟེ། པྲི་ཡངྐུ་ལྟར་སྔོ་བསངས་རྒྱན་ཐམས་ཅད་ཀྱིས་བརྒྱན་པ། སྐུ་མདོག་དཀར་པོ་ཕྱག་གཡོན
23b7 པས་ཀུརྦ་འཛིན་པའི་སྙིང་པོ་མཆོག་བཅོམ་ལྡན་འདས་མའི་ཉེ་ལོགས་སུ་འདྲེར་གཞུག་པར་བྱའོ། །སྟེང་དུ་གནས་གཙང་མའི་ལྷའི་བུ་མེ་ཏོག་གི་ཕུར་མ་ལག་ན་ཐོགས་པ་འདྲིར་གཞུག་པར་བྱའོ། །ལྷའི་རྔ་བོ་ཆེ་འདྲིར་གཞུག་པར་བྱའོ། །འོག་ཏུ་སྤོས་ཕོར་ལག་ན་ཐོགས་པ
iiif viewer powered by OpenSeadragon
