| e-texts navigator |
| Wylie |
239a1 གཟིར་བས་སྐྱབས་མེད་པར་གྱུར་ཏེ། བཅོམ་ལྡན་འདས་ག་ལ་བ་དེར་དོང་ངོ་། །དོང་ནས་ཀྱང་བཅོམ་ལྡན་འདས་ཀྱི་ཞབས་ལ་གཏུགས་ནས་འདི་སྐད་ཅེས་སྨྲ་ཞིང་འདུད་པར་བྱེད་དོ། །བཅོམ་ལྡན་འདས་བདག་བསྲུང་དུ་གསོལ་བདེ་བར་གཤེགས་པ་ཡོངས་སུ་བསྐྱང་དུ
239a2 གསོལ། རྡོ་རྗེ་ཁྲོ་བོས་བདག་ཅག་ཡོངས་སུ་གཟིར་ཏོ། །བཅོམ་ལྡན་འདས་རྡོ་རྗེ་ཁྲོ་བོ་འདི་བཤད་པས་བདག་ཅག་གི་ཁང་པ་རྣམས་ཀྱི་འཁྲུལ་འཁོར་རྣམས་མེད་པར་གྱུར། སྒོ་གཏན་རྣམས་མེད་པར་གྱུར། སྒོ་རྣམས་གྲོལ་བར་གྱུར་ཏོ། །བཅོམ་ལྡན་འདས་མ་བྱུང་བའི་སེམས་ཅན
239a3 རྣམས་ཀྱང་བྱུང་བར་གྱུར་ཏོ། །བཅོམ་ལྡན་འདས་འདིར་ཇི་ལྟར་གནས་པར་བགྱི་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གྲོགས་པོ་དག་མ་འཇིགས་ཤིག་མ་འཇིགས་ཤིག་།ལག་ན་རྡོ་རྗེའི་དམ་ཚིག་ལ་མནོས་ཤིག་།དེ་ལྟར་ན་བདེ་བ་ལ་གནས་པར་འགྱུར
239a4 རོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་གཟིགས་ཏེ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ལྷ་མ་ཡིན་གྱི་དབང་པོ་ལ་སོགས་པ་ལ་རྨད་དུ་བྱུང་བའི་དམ་ཚིག་སྟོན་ལ་བདེ་བར་གྱིས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཕྱག་ན་རྡོ་རྗེས་ལྷ་མ་ཡིན་དང
239a5 ལྷ་མ་ཡིན་གྱི་ཆུང་མ་དག་ལ་བཀའ་སྩལ་པ། འདིར་ཐོག་མར་རྡོ་རྗེ་ས་འོག་གི་ཁྲོ་བོ་ཆེན་པོའི་ས་འོག་གི་དཀྱིལ་འཁོར་གྱི་དམ་ཚིག་ལ་གང་འཇུག་པ་དེ་དག་འདིར་འཁྲུལ་འཁོར་ཆེན་པོའི་བླ་མའི་རྩི་སྨན་དང་། ཕྱེ་མ་དང་། རྩ་བ་དང་། སྦྱར་སྨན་དང་། གྲུབ་པའི་རྫས་དང་། དངུལ་ཆུ་དང་།
239a6 བཅུད་ལེན་དང་། གཞོན་ནུ་མ་དང་། ལྷ་མ་ཡིན་གྱི་བུ་ག་དང་། སྒོར་འཇུག་པ་དང་། འཁྲུལ་འཁོར་ཐམས་ཅད་འཇོམས་པ་དང་། སྐེམས་པར་བྱེད་པ་དེ་དག་ནི་འཇུག་ངོགས་བདེ་བར་འགྱུར་རོ། །གཞན་དུ་ན་དེ་དག་འགྲུབ་པར་མི་འགྱུར་བ་དེའི་ཕྱིར་ས་འོག་གི་དཀྱིལ་འཁོར་དུ་འཇུག
239a7 པར་བྱའོ། །ལྷ་མ་ཡིན་རྣམས་ལ་བཀའ་སྩལ་པ། བུ་གར་འཇུག་ནུས་པ་དང་། བྱ་བའི་རྒྱུད་ཀྱི་ཁམས་དང་། གསེར་འགྱུར་དང་། དུག་སྨན་དང་། ས་འོག་དང་། ཞིང་གི་དངོས་གྲུབ་དག་རང་ཉིད་ཀྱི་ཁང་པར་འཇུག་པ་ལྟར་རྡོ་རྗེའི་བྱེ་བྲག་གིས་འགྲུབ་པར་འགྱུར་རོ་ཞེས་པ་སྨྲའོ། །
iiif viewer powered by OpenSeadragon
