| e-texts navigator |
| Wylie |
191b1 པ་བརྐྱང་སྟེ་སྒྲུབ་པ་པོ་ཕྱག་གཡས་པས་བཟུང་ནས་རྟ་མགྲིན་རྒྱལ་པོ་ལ་ཡང་དག་པར་གཏད་པར་གྱུར་ཏོ། །རིག་པའི་རྒྱལ་པོ་ཆེན་པོ་སྐྱེས་བུ་དམ་པ་འདི་བཟུང་ནས་མེ་ཏོག་གི་ཆར་རབ་ཏུ་འབབ་པའི་བདེ་བ་ཅན་གྱི་འཇིག་རྟེན་གྱི་ཁམས་སུ་སོང་ཞིག་།གང་དུ་དེ་བཞིན་གཤེགས་པ་འོད
191b2 དཔག་མེད་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་དང་བཅས་པ་དེར་བསྟོད་དུ་བཅུག་ནས་སླར་ཡང་གྲུ་འཛིན་གང་ན་ཡོད་པ་དེར་ཤོག་ཤིག་། དེ་ནས་རྟ་མགྲིན་རིག་པའི་རྒྱལ་པོས་སྒྲུབ་པ་པོ་བཟུང་ནས་མེ་ཏོག་གི་ཆར་འབེབས་པའི་བདེ་བ་ཅན་གྱི་འཇིག་རྟེན་གྱི་ཁམས་སུ
191b3 སོང་སྟེ། སྒྲུབ་པ་པོས་སྨྲས་པ། སྐྱེས་བུ་དམ་པ་དེ་བཞིན་གཤེགས་པ་འོད་དཔག་མེད་དེ་བྱང་ཆུབ་སེམས་དཔའ་རྣམས་ལ་ཆོས་སྟོན་པ་ལ་ལྟོས་ཤིག་ལྟོས་ཤིག་།དེ་ནས་རིག་པའི་རྒྱལ་པོས་དེ་བསྟོད་དུ་བཅུག་ནས་སླར་ཡང་འཕགས་པ་སྤྱན་རས་གཟིགས་དབང་ཕྱུག་གི
191b4 གྲུ་འཛིན་པ་དེར་འོང་བར་མཛད་དོ། །དེ་ནས་སྒྲུབ་པ་པོ་འཇིག་རྟེན་གྱི་ཁམས་དེར་འཕགས་པ་འོད་དཔག་མེད་ཀྱི་དྲུང་དུ་ཆོས་ཉན་ནོ། །དངོས་གྲུབ་འདི་ནི་གནས་མ་ཡིན་པ་རྣམས་ལ་གང་སྦྱར་བར་མི་བྱ་སྟེ། གང་ཞིག་བྱེད་ན་དམ་ཚིག་ལས་འདའ་བར་འགྱུར་རོ་ཞེས་བརྗོད་ནས་མཆོག
191b5 གི་སྒྲུབ་པ་རྣམས་ལ་འདི་གནས་མ་ཡིན་པ་རྣམས་ལ་རབ་ཏུ་མི་སྦྱོར་ཏེ་དེའི་དམ་ཚིག་མེད་དོ། །ལས་དེ་རྣམས་ཐམས་ཅད་རྩ་བའི་སྔགས་ཀྱིས་བྱེད་དུ་གཞུག་གོ། །ཐལ་བས་ཐལ་བའི་ར་བའོ། །སྒྲོན་མེ་གསུམ་གྱིས་མེའི་ར་བའོ། །ཆུ་ལ་ལན་བདུན་མངོན་པར་བསྔགས
191b6 པས་ནམ་མཁའ་བཅིང་བའོ། །ཡུངས་ཀར་དཀར་པོས་ས་གཞི་བཅིང་བའོ། །ཏིལ་གྱི་སྦྱིན་སྲེག་གིས་ལོག་པར་འདྲེན་པ་ཐམས་ཅད་དབང་དུ་འགྱུར་རོ། །སྐྱེ་ཚེའི་སྦྱིན་སྲེག་གིས་དང་། ཤ་ཟ་ཐམས་ཅད་དབང་དུ་འགྱུར་རོ། །ཀ་ར་བཱི་རའི་མེ་ཏོག་གི་སྦྱིན་སྲེག
191b7 གིས་ཁྲོ་བོ་ཐམས་ཅད་འགྲུབ་པར་བྱེད་དོ། །མེ་ཏོག་ཐམས་ཅད་ཚ་བའི་ཏིལ་མར་གྱིས་བཏགས་པའི་སྦྱིན་སྲེག་གིས་འཇིག་རྟེན་པའི་རིག་པའི་རྒྱལ་པོ་ཐམས་ཅད་དབང་དུ་འགྱུར་རོ། །དྷུ་དྷུའི་སྦྱིན་སྲེག་གིས་དབང་ཕྱུག་ཆེན་པོ་དབང་དུ་འགྱུར་རོ། །པྲི་ཡང་ཀུའི་མེ་ཏོག་དང་། མཱ་ལཱ་ཏི
iiif viewer powered by OpenSeadragon
