| e-texts navigator |
| Wylie |
189a1 རྟེན་པའི་རིག་པ་འཛིན་པ་ཐམས་ཅད་འོངས་ཏེ་ཕྱོགས་གང་དུ་རིག་པ་འཛིན་པ་སྒྲུབ་པ་བྱེད་པ་དེར་སེམས་དཔའ་ཆེན་པོའི་དགའ་སྟོན་ལ་ཐམས་ཅད་ཉིད་འདུས་སོ། །སྒྲུབ་པ་པོས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་མཐོང་ནས་མཆོད་ཡོན་ཕུལ་ནས
189a2 ཕྱག་བྱའོ། །ལྷ་ཐམས་ཅད་དང་། རིག་པ་འཛིན་པ་ཐམས་ཅད་ལ་མཆོད་ཡོན་དང་གདན་ཕུལ་ནས་དེ་ནས་ལྷ་ཐམས་ཅད་དང་། རིག་པ་འཛིན་པ་ཐམས་ཅད་ཀྱིས་སྒྲུབ་པ་པོ། །བྱང་ཆུབ་སེམས་དཔའ་ལ་ལེགས་སོ་ཞེས་བྱ་བ་བྱིན་ཏེ་སྲིད་པ་གསུམ་གྱི་ཆུ་བོ་ཆེན་པོ་ལས་བསྒྲལ
189a3 བར་བྱས་པ་དེ་རྣམས་ངེས་པར་རྒྱལ་བ་ཀུན་ཏུ་སྣང་བས་མནན་པ་བྱང་ཆུབ་སེམས་དཔའི་ལམ་དང་ལྷན་ཅིག་འཚོ་བའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་ལྷ་ཐམས་ཅད་ལ་ལེགས་སོ་ཞེས་བྱ་བ་བྱིན་ཏེ། བྱང་ཆུབ་སེམས་དཔའི་ཕྱག་གཡས་པ། སྒྲུབ
189a4 པ་པོའི་སྤྱི་བོར་ཉུག་པར་མཛད་དོ། །དེ་ནས་སྒྲུབ་པ་པོས་གང་ཡིད་ལ་སྙིང་པོ་བསམ་པ་དེར་འགྱུར་རོ། །རིག་པ་འཛིན་པའི་འཁོར་ལོས་སྒྱུར་བ་དང་། རིག་པ་འཛིན་པའི་རྒྱལ་པོ་ལྷ་ཉིད་གང་འདོད་པ་དེ་རྣམས་ཆེས་གཞན་དུ་སྣང་སྟེ་འདི་སྐད་ཅེས་བརྗོད་པར་བྱའོ། །བཅོམ
189a5 ལྡན་འདས་འཕགས་པ་སྤྱན་རས་གཟིགས་དབང་ཕྱུག་གྲུ་འཛིན་དེང་མཐོང་བར་འཚལ་ལོ། །བྱང་ཆུབ་སེམས་དཔའ་སྐྱེས་བུ་ཆེན་པོ་ཕྱག་གཡས་པས་བཟུང་སྟེ་རིག་པའི་རྒྱལ་པོ་རྟ་མགྲིན་ལ་ཡང་དག་པར་གཏད་པར་གྱུར་ཏོ། །གྲུ་འཛིན་དུ་སོང་ཤིག་།གང་འདོད་པ་དེ
189a6 སྦྱིན་པར་འགྱུར་རོ། །དེ་ནས་རིག་པའི་རྒྱལ་པོ་རིག་པའི་རྒྱལ་པོའི་ཚོགས་ཀྱིས་བསྐོར་བ་དང་བཅས་པ་སྒྲུབ་པ་པོའི་ལག་པ་གཡས་བཟུང་ནས་རྒྱ་མཚོའི་དབུས་སུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ
189a7 ཅི་དང་། ལྟོ་འཕྱེ་ཆེན་པོ་ལ་སོགས་པ་སྒྲུབ་པ་པོའི་རིག་པའི་ཚོགས་ལ་མེ་ཏོག་གི་ཆར་འབེབས་པ་དང་། རྔ་བོ་ཆེ་དང་། རྔ་པ་ཊ་ཧ་དང་། རྔ་དང་། རྫ་རྔ་ཁ་གཅིག་པ་དང་། རྫ་རྔ་རྣམས་སྒྲ་འབྱིན་བཞིན་དུ་གྲུ་འཛིན་དུ་འགྲོ་བར་བྱེད་དོ། །རྒྱ་མཚོའི་སྟེང་དེར་རྒྱ
iiif viewer powered by OpenSeadragon
