| e-texts navigator |
| Wylie |
15b1 རལ་པ་གྱེན་དུ་བརྫེས་པ། པདྨ་ལ་བཞུགས་པ། ཕྱག་གཡོན་ན་པདྨ་བསྣམས་པ། གཡས་པས་མཆོག་སྦྱིན་པ། ཐུགས་ཀར་དཔལ་བེའུའི་མཚན་མས་བརྒྱན་པའོ། །གཡས་སུ་གུར་གུམ་གྱིས་དཔལ་བེའུ་བྲི་བར་བྱའོ། །རིང་བསྲེལ་དང་བཅས་པའི་མཆོད་རྟེན་ལ་རས་རིས་ཞལ
15b2 ནུབ་ཏུ་ཕྱོགས་པར་བཞུགས་ནས། མཆོད་རྟེན་དེ་ཉིད་ཀྱིས་བདུག་པ་བསྲེགས་ཏེ་འབུམ་ཕྲག་གསུམ་བཟླས་པར་བྱའོ། །མཐར་ཉིན་མཚན་དུ་སྨྱུང་བར་གནས་ཏེ། ནཱ་ག་གེ་སར་རེ་རེ་ལ་ཡོངས་སུ་བཟླས་ནས་འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀར་བསྣུན་པར་བྱའོ། །
15b3 དེ་ལྟ་བུ་ཟླ་བར་རྫོགས་པར་བྱས་ན་གཏེར་ཆེན་པོ་མཐོང་བར་བྱེད་དོ། །ཉི་མ་བདུན་གྱིས་གསེར་སྟོང་རྙེད་དོ། །ཕྱོགས་ཀྱི་ཡུལ་རྙེད་དོ། །བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཡངས་པ་དང་ལྡན་པའི་ཏིང་ངེ་འཛིན་ལས་ངེས་པར་སྐྱེས་པ་དཔལ
15b4 བེའུ་ཞེས་བྱ་བའི་རིག་པའི་རྒྱལ་པོ་ཆེན་པོ་ཡོངས་སུ་རྫོགས་སོ། ། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སླར་ཡང་ཡངས་པ་དང་ལྡན་པའི་ཏིང་ངེ་འཛིན་གྱི་རྒྱལ་པོ་སྒོམ་བཞིན་དུ་བཅོམ་ལྡན་འདས་མའི་རྟོག་པའི་རྒྱལ་པོར་མི
15b5 འཇིགས་པ་སྦྱིན་པ་ཞེས་བྱ་བའི་སྔགས་ཀྱི་རྒྱལ་པོ་གསུངས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། གོ་པ་ཏི་བ་ཏི། ཙ་ར་པ་ཏི་པ་ཏི། ཤ་ས་ནི། ཤ་སི་ནི། བྷཱུ་བྷཱུ། ཙི་ལི་ཅི་ལི་ཙི་ལྤ་ཡ་སྭཱ་ཧཱ།
15b6 འདི་ནི་མཐུ་ཆེན་པོ་ཐོབ་པ་དང་བཅས་པ་སྟེ། མི་འཇིགས་པ་སྦྱིན་པ་ཞེས་བྱ་བའི་སྔགས་ཀྱི་རྒྱལ་པོ་ཆེན་པོ་རྟག་ཏུ་བཟླས་པས་སའི་རྒྱལ་པོར་འགྱུར་རོ། །འདིའི་སྒྲུབ་ཐབས་ཀྱི་ཆོ་གར་འགྱུར་བ་ནི་རས་ལ་ལི་ཁྲིའི་ཕྱེ་མ་དང་བསྲེས་པའི་ཚོན་གྱིས་འཕགས་པ་སྤྱན་རས་གཟིགས་དབང་ཕྱུག
15b7 འདྲིར་གཞུག་པར་བྱ་སྟེ། རལ་པ་གྱེན་དུ་བརྫེས་པ། རིལ་བ་སྤྱི་བླུགས་ཕྱག་ན་བསྣམས་པ། གཞོགས་སུ་སོན་པ། པདྨའི་གདན་ལ་བཞུགས་པ། མི་འཇིགས་པ་རབ་ཏུ་སྦྱིན་པའོ། །དེ་ནས་རས་རིས་དེ་རིང་བསྲེལ་དང་བཅས་པའི་མཆོད་རྟེན་ལ། མཆོད་རྟེན་གྱི་བྱང་དུ
iiif viewer powered by OpenSeadragon
