| e-texts navigator |
| Wylie |
297b1 དེ་བཞིན་དུ་རིག་པའི་རྒྱལ་པོ་འདི་ནི་སྔགས་ཐམས་ཅད་ཀྱི་མཆོག་ཏུ་བསྟན་ཅིང་། གཙོ་བོ་དམ་པ་ཡིན་ཏེ། དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་བརྗོད་དུ་མེད་པ་རྣམས་ཀྱིས་སྔར་གསུངས་པ་དེ་བཞིན་གཤེགས་པ་རིན་ཆེན་ཏོག་གི་མཆོག
297b2 གི་སྙིང་པོ་མཆོག་ཏུ་གསང་བ་ཀུན་ནས་བཀྲ་ཤིས་པར་འདོད་པ་སངས་རྒྱས་ཐམས་ཅད་ཀྱིས་ཡང་དག་པར་བསྟོད་ཅིང་རབ་ཏུ་བསྔགས་ལ། སེམས་ཅན་ཐམས་ཅད་ལ་དབུགས་འབྱིན་པ། སྡིག་པ་ཐམས་ཅད་རབ་ཏུ་ཞི་བར་བྱེད་པ། འདོད་པ་ཐམས་ཅད་སྦྱིན་པ། རེ་བ་ཐམས་ཅད
297b3 ཡོངས་སུ་རྫོགས་པར་བྱེད་པ་དེ་གང་ཞེ་ན། །བར་སྐབས་འདིར་བཅོམ་ལྡན་འདས་ཤཱཀྱ་ཐུབ་པའི་སྨིན་མཚམས་ཀྱི་མཛོད་སྤུ་ནས་སངས་རྒྱས་ཐམས་ཅད་ཡང་དག་པར་སྐུལ་བར་བྱེད་པ་ཞེས་བྱ་བའི་འོད་ཟེར་བྱུང་བར་གྱུར་ཏོ། །གང་འདི། ཕྱོགས་བཅུ་སྟེང་འོག་ཐམས་ཅད་དང
297b4 ལྡན་པའི་སངས་རྒྱས་ཀྱི་ཞིང་རྣམས་ཀུན་དུ་སྣང་ཞིང་སེམས་ཅན་ཐམས་ཅད་ཀྱི་ཡིད་ཀྱང་ཚིམ་པར་བྱས་ནས་སླར་ཡང་བཅོམ་ལྡན་འདས་ཤཱཀྱ་ཐུབ་པའི་གཙུག་ཏོར་དུ་ནུབ་པར་གྱུར་ཏོ། །བཅོམ་ལྡན་འདས་ཀྱི་གཙུག་ཏོར་ནས་ཀུན་ནས་འབར་བའི་འཕྲོ་བའི་ལུས་ཅན་བལྟ
297b5 བར་མི་ནུས་པའི་སེམས་ཅན་ཀུན་གང་གིས་ཀྱང་མི་ཐུབ་པ། འོད་ཆེན་པོ་ཡང་དག་པར་བྱུང་བ། འོད་ཀྱི་དཀྱིལ་འཁོར་གྱིས་ལུས་བརྒྱན་པ། རྣམ་པ་སྣ་ཚོགས་པའི་གཟུགས་ཅན། འཁོར་ལོས་སྒྱུར་བ་ཆེན་པོའི་གཟུགས་དང་ལྡན་པ། རིག་པའི་རྒྱལ་པོ་ཡི་གེ་གཅིག་པ
297b6 ཞེས་བྱ་བར་གྱུར་ཏོ། །བྱུང་ནས་ནམ་མཁའི་དཀྱིལ་ཀུན་དུ་སྣང་བར་བྱས་ཏེ། རིག་པའི་རྒྱལ་པོ་ཐམས་ཅད་ཀྱིས་ཡོངས་སུ་བསྐོར་བ། རིག་པ་འཛིན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་མདུན་དུ་བདར་ནས་མཆོད་བཞིན་པ། འཇིག་རྟེན་ཐམས་ཅད་ཀྱི་བླ་མ། རིག
297b7 པའི་འཁོར་ལོས་སྒྱུར་བའི་རྒྱལ་པོས་མངོན་པར་བསྔགས་བཞིན་པ། སངས་རྒྱས་ཐམས་ཅད་ལ་མངའ་སྒྱུར་བཞིན་པ། སངས་རྒྱས་དང་བྱང་ཆུབ་སེམས་དཔའ་ས་བཅུ་ལ་བཞུགས་པ་རྣམས་ཀྱི་རིམ་གྲོ་བྱེད་བཞིན་པའི་བློ་གྲོས་ཆེན་པོ། ནམ་མཁའི་དཀྱིལ
iiif viewer powered by OpenSeadragon
