| e-texts navigator |
| Wylie |
296b1 རྣམས་སྨོས་ཅི་དགོས། །སྡེ་དཔོན་བདག་པོ་དེ་བཞིན་དུ། །ཁྱད་པར་འཇིག་རྟེན་དབང་ཕྱུག་དང་། །འབྱུང་པོ་ཐམས་ཅད་ཀུན་དབང་བྱེད། །དེ་བཞིན་ཉིད་དུ་མི་བདག་ཉིད། །འབྱུང་པོ་ཐམས་ཅད་དབང་དོན་དང་། །ཡང་ན་ས་སྟེངས་རྒྱལ་པོ་མཉམ། །དེ་བཞིན་རྟག་ཏུ་ལས
296b2 ཀུན་ལ། །ཐམས་ཅད་སྦྱིན་སྲེག་གིས་ནི་བྱ། །ཀུན་ནས་ཀུན་ཏུ་བརྩོན་ལྡན་པས། །ལས་ཀུན་ཡང་དག་བསྟེན་པར་བྱ། །དེ་ཆེད་ངེས་པར་བསྒྲུབ་པར་བྱ། །དཔལ་དོན་ལས་ནི་མཆོག་ཡིན་ཏེ། །བར་མ་ཉིད་ཀྱང་སྒྲུབ་པར་བྱེད། །ཡང་ན་ཆུང་ངུ་ཉིད་ཀྱང་ངོ་། །དེ་བཞིན་དུ
296b3 ནི་རྫས་རྣམས་ཀུན། །དེ་བཞིན་སླར་ཡང་འགྲུབ་པར་གསུངས། །སྦྱིན་སྲེག་ལས་ལ་རབ་འཇུག་པས། །འབྲས་བུར་བཅས་པའི་དངོས་གྲུབ་མཐོང་། །ཕྱག་རྒྱ་བཅིང་དང་རིག་པ་ཉིད། །ལས་རྣམས་ཀུན་ལ་རྟག་ཏུ་བྱ། །སྦྱིན་སྲེག་ལས་ལ་རབ་འཇུག་པས། །བདག་ཉིད
296b4 སྲུང་བར་འགྱུར་བ་ཡིན། །དེ་ནས་སྔགས་འདི་བཀླག་པར་བྱ། །འདི་ནི་རྟག་ཏུ་ལས་རྣམས་ལ། །བདུན་བཟླས་པའམ་བརྒྱད་བཟླས་སོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ཨ་པྲ་ཏི་ཧ་ཏ་ག་ཏི་མ་ག་ཏཱ་ནཱཾ། ཏདྱ་ཐཱ། ཨོ~ཾ་ཛྭཱ་ལ་ཏིཥྠ་ཧཱུ~ཾ། རུ་རུ་བི་ཤྭ་སམྦྷ་བེ་སྭཱ་ཧཱ། །
296b5 སྔགས་ཀྱི་རབ་སྦྱོར་འདི་ཡིས་ནི། །སླར་ཡང་ཤིང་ལ་བཟླས་བྱ་བ། །གཉིས་བཟླས་པའམ་བདུན་བཟླས་པ། །སྔགས་རིག་དེས་མེར་སྦྱིན་སྲེག་བྱ། །མེ་ཏོག་བདུག་པ་དྲི་དག་གམ། །མདོར་ན་ཐམས་ཅད་ཉིད་ཀྱང་ནི། །གསང་སྔགས་བཟླས་པའི་ཆུ་རྣམས་ཀྱིས། །འདི
296b6 ཉིད་ཀྱིས་ནི་བསང་གཏོར་བྱ། །དེ་ནས་ལས་རྣམས་ཐམས་ཅད་ནི། །རྒྱུ་འདིས་ཆོ་ག་བརྩམ་པར་བྱ། །ལས་རྣམས་དག་ནི་ཐམས་ཅད་ལ། །སྔ་མའི་རབ་སྦྱོར་ཉིད་ཀྱིས་བྱ། །སྔར་གྱི་སྐྲ་ཅན་མ་བཅིངས་ནས། །ཕྱག་རྒྱ་ཆེན་མོར་གྲགས་ལྡན་མ། །བསྲུང་བ་བྱས་པར
296b7 གྱུར་དེ་ནས། །ཟློས་པོས་རིག་པ་གཅིག་གིས་ནི། །ལས་རྣམས་ཐམས་ཅད་བརྩམ་པར་བྱ། །དངོས་གྲུབ་རྒྱུ་ལ་མཁས་པ་ཡིས། །གལ་ཏེ་དགེ་མཚན་མཐོང་གྱུར་པ། །རྟག་ཏུ་དགེ་བའི་སྒྲ་གྲགས་ན། །དེ་ལ་སྔགས་ཀྱི་འབྲས་བུ་ནི། །ཇི་ལྟར་འདོད་བཞིན་མཆོག
iiif viewer powered by OpenSeadragon
