| e-texts navigator |
| Wylie |
251a1 དཀྱིལ་འཁོར་གྱི་ཆོ་ག་རབ་འབྱམ་གྱི་ལེའུ་སྟེ་གཉིས་པ་རྫོགས་སོ།། །།དེ་ནས་སེམས་དཔའ་ཆེན་པོ་དེ་སླར་ཡང་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་རྣམ་པར་གཟིགས་ནས་ལྷའི་བུ་རྣམས་ཐམས་ཅད་ལ་སྨྲས་པར་གྱུར་ཏེ། ཁྱེད
251a2 རྣམས་ཉོན་ཅིག་། མཆོག་གི་གྲུབ་པ་མཆོག་ཏུ་གསང་བ་སྒྲུབ་ཐབས་ཐམས་ཅད་ཀྱི་ཆོ་ག་རིག་པའི་ལས་ཐམས་ཅད་བྱེད་པ་དང་། རིག་པའི་ལས་བཟང་པོ་བྱེད་པ། ཆེན་པོ་ཉིད་དང་། དོན་ཆེན་པོ་བྱེད་པ། ཕུང་ཁྲོལ་ཐམས་ཅད་ཟློག་པར་བྱེད་པ། དོན་ཐམས་ཅད་སྒྲུབ་པར་བྱེད
251a3 པ། མཆོག་ཏུ་བཀྲ་ཤིས་པ་ཐམས་ཅད་ཀུན་ནས་བཀྲ་ཤིས་པ། སངས་རྒྱས་ཐམས་ཅད་ཀྱིས་གསུངས་པ། བདག་གི་མཆོག་ཏུ་གསང་བའི་སྙིང་པོ་ཡང་དག་པར་གྱུར་པ། ལས་ཕྲན་ཚེགས་ཐམས་ཅད་ལ་ཉེ་བར་སྦྱར་བར་བྱ་བ། རིག་པའི་རྒྱལ་མོ་ཆེན་མོའི་ལས་ཆེན
251a4 པོ་ཐམས་ཅད་ཀྱི་དངོས་གྲུབ་བྱེད་པའི་སྒྲོལ་མ་གང་ཞེ་ན། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། གྲོགས་པོ་དག་འདི་ནི་འཕགས་མ་སྒྲོལ་མ་ལས་ཆེན་པོ་ཐམས
251a5 ཅད་བྱེད་པ་ལས་ཕྲན་ཚེགས་ཐམས་ཅད་བཀླགས་པས་གྲུབ་པ། མཆོག་ཏུ་གསང་བ་ཤིན་ཏུ་གསང་བ་མཆོག་ཏུ་གྲུབ་པ་གཞན་གྱིས་རབ་ཏུ་སྦྱར་བའི་ལས་ཐམས་ཅད་འཇིག་པར་བྱེད་པའི་རིག་པ་འདི་འང་དཀྱིལ་འཁོར་གཉིས་པའི་ཆོ་ག་དང་། སྒྲུབ་ཐབས་སུ་གྱུར་ཏེ། འཕགས
251a6 མ་སྒྲོལ་མས་ལས་ཆེན་པོ་ཐམས་ཅད་མདོར་བསྡུས་པ་དང་། ལས་ཕྲན་ཚེགས་ཐམས་ཅད་ལའང་ཉེ་བར་སྦྱར་བར་བྱ་ཞིང་། དཀྱིལ་འཁོར་ཐམས་ཅད་ཀྱི་ཆོ་ག་དང་སྒྲུབ་ཐབས་རྣམས་ལའང་ངོ་། །ཉིན་མཚན་གང་དུ་འམ་དེར་ཡང་རུང་སྟེ། གཙང་མའི་ཕྱོགས་སུ་བྲི་བར
251a7 བྱའོ། །བདག་ཉིད་ཉེས་པ་མེད་པ་དཀྱིལ་འཁོར་གྱི་སློབ་དཔོན་གྱིས་གཅིག་པུས་དང་པོ་རེ་ཞིག་གྲུ་བཞི་མཉམ་པ་སྒོ་བཞི་པ་ཁྲུ་བཞིའི་ཚད་དང་ལྡན་པའི་དབུས་པདྨའི་ཕྱག་རྒྱ་དེའི་གཡས་སུ་ཨུཏྤ་ལ་སྔོན་པོ་དང་། དབྱུག་པའི་ཕྱག་རྒྱ་དང་། རིལ་བ་སྤྱི་བླུགས་ཀྱི་ཕྱག་རྒྱ
iiif viewer powered by OpenSeadragon
